Dialuilu 25 - O Mikanda Ikola

Undumbu ua akua Izalaiele ni ahatu a Mouabhe

¹ Izalaiele anga a kala bhu Xitimi; kifuẋi anga a kuata kubhanga undumbu ni anʼa ahatu a Mouabhe;

² kuma a exana ku jisata ja mahamba mâ; kifuẋi anga a dia, a fukamena nzambi jâ.

³ Izalaiele kifua a di bande kua Baale-peole; njinda ia Jihova anga i uama ia kuatela Izalaiele.

⁴ Jihova anga u ambela Mozé, uixi: Kuata Makota oso ku kifuẋi, a bhange kiki, u a nhenge bhu pholo ia Jihova, mu muanha uatu, phala njinda iavulu ia Jihova i ile kuengi.

⁵ Mozé anga u ambela afundixi a Izalaiele, uixi: Jibhenu kala muthu athuʼê oso a di bande kua Baale-peole.

⁶ Bhenhobho, bhu kala muthu ku anʼa Izalaiele, u bheka muʼaxaxi ka jiphange jê, muhatu mukua Midiiane, ku mesu muene a Mozé ni ku mesu a kilômbo kioso kia anʼa Izalaiele, kioso kiala kudila bhu muelu ua balaka ia kutakanena.

⁷ Finehase, monʼa Eleazale, monʼa nganga Alá, kia ki mono, ua balumuka muʼaxaxi ka kilômbo, u kuata ngumba bhu lukuaku luê;

⁸ u kaiela diiala dienhidi dia Izalaiele katé mu balaka, u toma kiiadi kiâ, ni diiala dia Izalaiele ni muhatu, mu mala muene. Kiene kia sukika kibhuika, kia kuatele kiá anʼa Izalaiele.

⁹ Afu-phe ku kibuika kienhókio makuinhi aiadi a midi ni midi jiuana.

¹⁰ Jihova anga u ambela Mozé, uixi;

¹¹ Finehase, monʼa Eleazale, monʼa nganga Alá, muene uebhesa njinda iami iandekela kukuata Izalaiele, kuma kituxi muʼaxaxi kenu kia mu iibhila kala eme ki kia ngi iibhila, kiene kia ngi fudisa kubuikisa anʼa Izalaiele, kuma kia ngi iibhila kiavulu kia bhange.

¹² Kala kiki, u mu ambela; Nga bangana-nê kikutu kia uembu;

¹³ ki kala kia muene, ni anʼê a mu bhingana, kikutu kia unganga u nangenena; kuma ua kexile ni muanu ua kuzokela Nzambi iê, iú ua bhitisa kiamenga phala anʼa Izalaiele.

¹⁴ Diiala dienhidi a mu jibhila kumoxi ni muhatu mukua Midiiane, dijina diê Nzidi, monʼa Salu, kilamba mu dibhata dia jitata ku muiji ua Ximinhá.

¹⁵ Muhatu mukua Midiiane, dijina diê Kosbi monʼa Zule; tatʼâ kilamba ue mu dibhata dia jitata ku Midiiane.

¹⁶ Jihova anga u ambela dingi Mozé, uixi:

¹⁷ Akua Midiiane mu a tatesa, mu a kuame,

¹⁸ kuma ene a mi tatesa ni midiangu iâ ia mi tobhesa na-iu mu mulonga ua Peole, ni mu mulonga ue ua Kosbi, monʼa kilamba kia Midiiane, phange iâ ia muhatu, a mu jibhile kizuua kia kibuika mu mulonga ua Peole.