Dialuilu 24 - O Mikanda Ikola

Mizambu ia Balamu, ia katatu ni kauana

¹ Balamu kia zubha kumona kuma Jihova kia mu uabhela kuzediuisa Izalaiele, kaii dingi kala mʼokulu kutala isuma, u lunga pholo mu kikangalakata.

² Balamu anga u bhetula mesu, u mona Izalaiele, kia te kibangu kiâ ku miji-miji; Nzumbi ia Nzambi anga i mu tula.

³ U kuata kifika kiê, uixi: Zuela, u Balamu dia monʼa Beola, zuela, u mukua diesu dia kumona,

⁴ u zuela, ió uevu maka ma Nzambi, u mona kisukila kia Muteni-a-ioso, uia ku kiambu, maji mesu a tono;

⁵ Kuuabha kuahi! Jibalaka jé, Jakobo! Kuiuka kuahi, mabhata ma Izalaiele!

⁶ Ma di zale kala jihonga jauisu, kala mabhia mazukamena ku ngiji, kala miẋi ia mixitu ia phaphe Jihova, kala miẋi ia misédulu bhu mbandu ia menha.

⁷ Itabhu iê i subhajaka menha, mbutu iê a i kuua ku menha mavulu, sobha iê u tunda Akake mu kijingu, utuminu uê u zangalala.

⁸ Nzambi ua mu katula mu Ijitu; uala ni nguzu kala phakasa; ifuẋi iamukuá u i dia, andala a bhânga-nê, ifuba iâ u i bukujula, u a asa muene mifula ié.

⁹ Ua butama, ua zeka kala hoji, mamʼa hoji mukuâ; nanhi u mu lokalala? A-zediue oso a ku zediuisa, a a bhubhidile oso a ku bhubhidila.

O mizambu ia Balamu

¹⁰ Bhenhobho Balake njinda i mu kuata ia Balamu, u beta makanda a maku; Balake anga u ambela Balamu, uixi: Nga ku kolomona phala jinguma jami u ngi tele-nâ mázui; ua mono-phe, ua a te kizediuise kioso, mu lutatu luosʼulu!

¹¹ Muangana-phe kiá uie kʼoxi ienu ku ua tundu; eme ngʼambele ku ku bhanga ujitu uavulu, maji ua mono Jihova ua ku fudisa-u.

¹² Balamu anga u ambela Balake, uixi: Ki ngi ki tangelele ku jiphunga jé, jele ku ngi takana, ngixi:

¹³ Balake né u ngi bhana inzu iê iezala phalata ni ulu, ki ngi tena kusomboka kizuelu kia Jihova, mu bhanga kima kiauabha mba kiaiibha kia muxima uami; kioso kizuelu kia ngi bhana Jihova, ki kiene ki ngi zuela?

¹⁴ Kiki-phe, ngiia kiá koʼkuetu; imana-phe, ngi ku tangele kioso o kifuẋi kiki ki kia kà bhanga ku kifuẋi kié izuua ia hádia.

¹⁵ Anga u kuata kifika kiê uixi: Zuela, u Balamu dia monʼ a Beola, Zuela, u mukua diesu dia kumona;

¹⁶ u zuela ió uevu maka ma Nzambi, uejiia ni uijidilu ua Suke-ku, u mona kisukila kia Muteni-a-ioso; uia ku kiambu, maji mesu a tono;

¹⁷ nga mu mono, maji ki lelu; bhu nga mu muena, ki bhabha; kua kà tunda théthembua mua Jakobo ku kala mbasá muʼaxaxi ka Izalaiele, Mouabhe a ka mu beta mbandu ni mbandu, akua jimvunda a kà a xinina bhoxi, ana oso a Sete a kà a jikinisa

¹⁸ Idomo u di bhanga mbole iê, ni Siiele kiómuene, kua iá a mu kexile jinguma jê, kioso Izalaiele kia kà bhanga undanda.

¹⁹ Mua Jakobo mua kà tunda ngûngu, u tumina, ua kà buidisa oso a subhuka mu jimbanza.

²⁰ Anga u tala kua Amaleke, u kuata kifika kiê, uixi: Amaleke ua kexile ku pholo, ku ifuẋi ioso; maji o ku dizubhilu kua kàia-phe, u buika.

²¹ Anga utala akua Kene, u kuata kifika kiê, uixi: Bhua kolo muene bhu ua tungu, kikalanga mukuâ, ku ditadi dia kipena,

²² kiene kimoxi, mukua Kene hinu a mu sengulula, hadia, Asula u ku kuta hé u ku ambata.

²³ Anga u kuata dingi kifika kiê, uixi: Aiué! Ebhi-phe a kà kala-ku, kizuua Nzambi kia kà bhanga kiki?

²⁴ Kua kà tunda jinaviiu ku kibumu kia Kitimi, a kà tatesa Asula, a kà tatesa ue Ebele, kuma muene ue a kà mu buidisa.

²⁵ Balamu anga u balumuka-bhu, uenda, u vutuka ku bhata diâ; Balake ue uela ni njila iê.