Dialuilu 23 - O Mikanda Ikola

Balake u tunga sambuadi dia kalatódio

¹ Balamu anga u uambela Balake, uixi; Ngi tungile bhabha sambuadi dia kalatódio, u ngi hingile sambuadi dia ngombe ni sambuadi dia ilumbe ia jimbudi.

² Balake anga u bhanga kala kia mu ambela Balamu, ni Balake ni Balamu anga a satela Kalatódio ngombe ni kilumbe, kalatódio ngombe ni kilumbe.

³ Balamu anga u ambela Balake, uixi: Sata ié ia kuoha u i imanena kiá; eme ngiie bhobho; sumba Jihova ngi takana-nê; kioso-phe kia ngʼidikiza, ngi ku tangele. Anga uia bhu tala diengi.

⁴ Nzambi anga u takana ni Balamu, o Balamu u mu ambela, uixi: Nga iudika sambuadi dia kalatódio, kalatodio ni kalatódio nga satela-ku ngombe ni kilumbe.

⁵ Jihova anga u ta kizuelu mu kanu dia Balamu, uixi: Vutuka kua Balake, u zuele kienhiki.

⁶ Anga u vutuka kua muene, u mu sanga iú uemanʼú bhu mbandu ia sata iê ia kuoha, ni muene ni ilamba ioso ia Mouabhe.

Mizambu ia Balamu, ia kamoxi ni kaiadi

⁷ Anga u kuata kifika kiê, uixi: Balake dia sobha ia Mouabhe ua ngi takana ku Alame, Mouabhe ua ngi kolomona muene ku milundu ia thunda, uixi: Zá u ngi bhubhidile Jakobo, uta muene mázui kua Izalaiele.

⁸ Ngi bhubhidila kiebhi, Nzambi ka mu bhubhidila? Mázui a kuata kiebhi, Jihova ka a te?

⁹ Tundé ku thandu dia matadi nga mu mono, ku milundu ngi mu tala iuná; kifuẋi kiê, kifuẋi kia di tungidila, ka moneka akuâ a soko-nâ.

¹⁰ Nanhi u alula Jakobo, avulu kala fufuta ia mavu? U tanga ngó mbandu ia kauana ia Izalaiele? Ngi fue ufuilu ua athu aiuka, dizumbukilu diami di soke ni dia muene.

¹¹ Balake anga u ambela Balamu, uixi: Ua ngi bhange kiebhi? Nga ku kolomona phala jinguma jami u ngi tele-nâ mázui, mbé u a ta dingi kizediuise muene!

¹² Muene anga u vutula, uixi: Manhi ngi kamba kukaiela kioso kia ngi te Jihova mu kanu?

¹³ Balake anga u mu ambela, uixi: Iza-ze, ngi ku bheke kididi kiamukuá, bhu ua muena; ua mona-phe ngó sungu ia kibangu kiâ, ku a mone ene oso; bhenhobho bhene bhu u ngi tela-nâ mázui.

¹⁴ Anga u mu bheka mu mukáu ua Zofimi bhu thala ia Píxika, u tungila-bhu dingi sambuadi dia kalatódio, kalatódio ni kalatódio u satela-ku ngombe ni kilumbe.

¹⁵ Anga u ambela Balake, uixi: Sata ié ia kuoha u i imanena bhenhabha, ngi takane ni Jihova koko.

¹⁶ Jihova anga u takana ni Balamu, u mu ta kizuelu mu kanu, uixi: Vutuka kua Balake, u zuele Kienhiki.

¹⁷ Anga u vutuka kua muene, u mu sanga iú uemanʼú bhu mbandu ia sata iê ia kuoha, ni ilamba ia Mouabhe emana-nê. Balake, uixi: Jihova ua zuela kiebhi?

¹⁸ Anga u kuata kifika kiê uixi: Balumuka, Balake, uívue; bhulakana, u Zipolo dia mona.

¹⁹ Nzambi ki muthu, kuila u ta makutu. Ki monʼa muthu, kuila u zuela luiadi. Kima kiambe, u kamba ku ki bhanga? Kia mu bhiti bhu dimi, u aluluka?

²⁰ Iala-ze, a ngi tumu kuta kizediuise; ua a zediuisa muene, ki ngi tena ku a vutula.

²¹ Ka mono kubhukumuka kua Jakobo; ka mono ikuma kua Izalaiele; Jihova, Nzambi iê, ua tungu-nê, o muʼaxaxe ka uivua-mu nzôngo ia sobha ala ku mu kola.

²² Nzambi ua a katula mu Ijitu; nguzu uala na-iu uila ia phakasa.

²³ Kua Jakobo uanga ki u tena-ku! Kua Izalaiele né a zambula, lémbue! Mu tumbula Jakobo ni Izalaiele, ela muene: Nzambi kukalakala kuahi!

²⁴ Kifuẋi kiê a balumuka kala mama ia hoji, mba, ndumbe ia hoji kia lundumuka; ka zeka ngó sé kudia mbole, anga u nua manhinga ma tunda ku isasu.

²⁵ Balake anga u ambela Balamu, uixi: Kalé kiá, kana ku a ta mázui, kana ku a ta kizediuise.

²⁶ Balamu-phe u vutuila Balake, uixi: Ki ngi ku tangela-kiu, ngixi: Kale kioso ki zuela Jihova, eme kiene ki ngi bhanga?

²⁷ Balake anga u ambela Balamu, uixi: Iza hanji, ngi ku bheke kididi kiamukuá; sumba ki uabhela Nzambi, u ngi tele-nâ mázui koko ku tuia.

²⁸ Balake anga u bheka Balamu bhu thala ia Peole, kua lulama ni kikangalakata.

²⁹ Balamu anga u ambela Balake, uixi: Ngi tungile-bhu sambuadi dia kalatódio, u ngi lungile bhabha sambuadi dia tungombe ni sambuadi dia ilumbe ia jimbudi.

³⁰ Balake anga u bhanga kala kia mu ambela Balamu, kalatódio ni kalatódio a satela-ku ngombe ni kilumbe.