Dialuilu 21 - O Mikanda Ikola

Akua Izalaiele a sengulula akua-Kanana

¹ Kiki mukua Kanana, sobha Alade, ua tungu mu Sulu, kievu kuila Izalaiele uala kuijiia mu njila mua bhitile ilolo, u tunda mu kulua-nâ, amukuá anga ua kuta, aia-nâ, hutile jê.

² Izalaiele anga a di hambelela kua Jihova, exi: Se kidi muene u ngi bhana kifuẋi kienhiki bhu maku mami, jimbonge jâ ngi ji buidisa muene.

³ Jihova anga uívua dízui dia izalaiele, u bhana akua Kanana bhu maku mâ, anga a a buidisa muene ni jimbonge jâ; mukáu uenhó anga a u luka Holoma.

Jinhoka ja túbhia ni nhoka ia ngôndo

⁴ Anga a katuka bhu mulundu ua Hole, éla ia Kalunga Kakusuka, phala ixi ia Idomo a i kondoloke; kifuẋi anga ki thathamana muxima mukonda dia njila.

⁵ Kifuẋi anga a longolola Nzambi ni Mozé, exi: Mukonda diahi ua tu katula mu Ijitu, ni tu fuile ngó mu kikangalakatʼumu? Ki mu moneka mbolo, ki mu moneka menha; ima ia maná iii ia tu kumu!

⁶ Jihova anga u tumikisa jinhoka ja xixima kala túbhia; hé ji numata athu; ku Izalaeiele anga kúfua mundu uavulu.

⁷ Kifuẋi anga eza kua Mozé, exi: Tua te kituxi, mukonda tua longolola Jihova ni eie; tu sambele kua Jihova, a tu katule jinhoka ja túbhia. Mozé anga u sambela o kifuẋi.

⁸ Jihova anga u ambela Mozé, uixi: Iudika ue nhoka ia túbhia, u i tudike ku muẋi; ki bhita-phe kuma uoso a mu numata, kia tala-ku, u bhuluka.

⁹ Mozé anga u iudika nhoka ia ngôndo, hé u i tudika ku muẋi; anga ki bhita muene; hé muthu a mu numata kuala nhoka, kia tala ku nhoka ia ngôndo, u bhuluka.

Jinjila ja anʼa Izalaiele

¹⁰ Anʼa Izalaiele anga a katuka dingi; a ta kibangu mu Obote.

¹¹ Anga a tunda bhu Obote, a tula bhu Abhadimi a ta kibangu bhenhobho, mu kikangalakata, bhua lulama ni ixi ia Mouabhe, ku tundila dikumbi.

¹² Kutunda bhobho a tula mu honga ia Zelede.

¹³ Kutunda bhobho, bhu Zelede, enda katé kia te kibangu kiâ ku sámbu dia Anone, mu kikangalakata ki tunda mʼoxi ia Mamodi; kuma mbambe honga ia None ni Mouabhe ni akua Amone.

¹⁴ Kiene kia ki tela ku mukumbi ua ita ia Jihova, exi: Vehebe mu Sufale, Jihonga ja kutuka mu Anone,

¹⁵ Dikenhe dia jihonga Di talela mu dibhata dia Hale, Di xamenena ku mbambe ia Mouabhe.

¹⁶ Kutunda bhobho, a tula bhu Beele; bhene bhu kixima kia tange Jihova kua Mozé, uixi: Bhongolola kifuẋi kumoxi, eme ngʼa bhane menha.

¹⁷ Bhenhobho Izalaiele emba mukumbi uâ, exi: Imbilenu-kiu! Fuafua, u kixima,

¹⁸ Kixima kia kande ilamba, Adiakimi a vota o mavu, Mbasá bhu maku ni jimbangala ja ulamba uâ! Kutunda bhobho mu kikangalakata a tula bhu Matana;

¹⁹ kutunda bhu Matana, eza bhu Nahaliiele; kutunda bhu Nahaliiele eza bhu Bamote;

²⁰ kutunda bhu Bamote, eza mu honga ia mukáu ua Mouabhe, bhu ditala dia mulundu ua Pixika, kifua bhene bhu thala-mu-ngongo.

Izalaiele u tambula oxi ia Sihone

²¹ Izalaiele anga a tuma jiphunga kua Sihone, sobha ia akua-Amone, uixi:

²² Ngʼehele kubhita mʼoxi ié; ki tu abhuka mu mábhia, kana, mba mu isoka ia mivide; ku menha a ixima ki tu nu-ku; tuendela ngó mu ikoka iatu, katé mu mbambe ié tua somboka-mu.

²³ Sihone-phe nguê kuehela Izalaiele kubhita mʼoxi iê; Sihone anga u bhongolola mundu uê; uia mu sota kutakana ni Izalaiele mu kikangalakata; u a sanga bhu Jahaze; u kuata kulua-nâ.

²⁴ Izalaiele anga u mu kuama ni mazu a xibhata; a mu-bua ixi iê, tundé mu Anone katé mu Jaboke, ni ku mbambe ia anʼa Amone tule; kuma ku mbambe ia anʼa Amone kua kolo, mbata a xiti ku ni kimbaka.

²⁵ Izalaiele anga a tambula jimbonge josuʼiji; Izalaiele anga a tunga mu jimbonge ja akua Amone, mu Hexebone ni tusanzala tuê tuoso.

²⁶ Kuma Hexebone mbanza ia Sihone, sobha ia akua Amone, ua luile kiá ni sobha ia kexile ku Mouabhe, iú ua mu bu o ixi iê katé ku Amone.

²⁷ A kua kuzuela o jisabhu kiene ki ene mu kuila, exi: Zenu ku Hexebone, mu i tunge! Tunga, kolesa dingi ngundu ia Sihone!

²⁸ Mbata ku Hexebone kua tundu túbhia, Mulengu mu mbanza ia Sihone. Hale dia Mouabhe uabhi, Ni jinganga ja matala ma Amone.

²⁹ Eie u Mouabhe, lamba dié! Mua bhondalala, enu mu akua hamba dia Kamu. Anʼé a mala a lenge, Anʼé a ahatu a a kutu, aii-nâ, Kua Sihone sobha ia akua Amone.

³⁰ Etu-phe tua ase muene; Hexebone ua jimi, Mbambe katé bhu Dibone, Tua a sengulula katé bhu Nofah, Túbhia tua bhiẋila mu Medeba.

Izalaiele u tambula oxi ia Hoke ni ia Basane

³¹ Kala kiki Izalaiele a tungu mʼoxi ia Mamodi.

³² Mozé anga u tuma nda Jazele, anga a i tolola ni tusanzala tuê; o Mamodi a a sange-mu a a kaie.

³³ Mu kutunda-ku, a bandela njila ia Basane; Hoke sobha ia Basane anga u tunda, ni muene ni kifuẋi kiê kioso, mu kuluila bhu Dilei.

³⁴ Jihova anga u ambela Mozé, uixi: Ku mu kale ni uoma, kuma nga mu bhana bhu maku mé, ni mundu uê uoso, ni ixi iê; u mu bhanga kala ki ua bhange Sihone, sobha ia Mamodi, ni mbanza iê ia Hexebone.

³⁵ Anga a mu jibha ni anʼê a mala, ni kifuẋi kiê kioso, katé ki kua mu xala muthu; anga a bhingana mʼoxi iê.