Dialuilu 20 - O Mikanda Ikola

O menha a tunda mu ditadi

¹ Ana Izalaiele, kilômbo kiâ kioso, anga a bhiẋila mu kikangalakata kia Zini, bhu mbeji ia kamoxi; mundu anga a bhanga izuua bhu Kadexi; Midiiana anga u fuila bhobho, hé a mu funda bhenhobho.

Mozé u beta ku ndanji, o menha tunda

² Anga o menha phala o kilômbo, hé a kamba; bhenhobho mundu anga a di bhongolola mu kubalukila Mozé ni Alá.

³ O mundu anga a zoka ni Mozé, hé a zuela, exi: Tamanu tua fuile, kioso o jiphange jetu ki jafu, bhu pholo ia Jihova!

⁴ Phalaʼhi mua bheka o kilômbo kia ngene kia Jihova mu kikangalakatʼumu, ni tu fuile momo, ni etu ni ibhaku ietu?

⁵ Phala-hi mua tu bhangesa kutunda mu Ijitu ni kubanda kunu, phala ku tu bheka o kididi kia iibha kiki? Kididi ki ki moneka mbutu, ki ki moneka jifiku, mba mivide, mba jilomá, mba menha ngó a kúnua, lémbue.

⁶ Bhenhobho, ni Mozé ni Alá a tunda bhu pholo ia kilômbo, hé aia bhu muelu ua balaka ia kutakanena, anga a di ṗhudikila o jipholo bhoxi; hé o kubenha kua Jihova kua tukulukila.

⁷ Jihova anga uambela Mozé, uixi:

⁸ Katula mbangala, u bhongolole o kilômbo, ni eie ni phangʼié Alá, anga bhu mesu mâ, mu zuelela o ndangji o iene i bhane o menha mê; kienhiki mua-nda ku a katuila o menha mu ndanji, anga mua kà bhana kúnua ku kifuẋi ni ibhaku iâ.

⁹ Kienhókio Mozé u katula o mbangala bhu pholo ia Jihova, kala kioso kia mu tendelela.

¹⁰ Anga Mozé ni Alá a bhongoluela o mundu bhu ndanji, hé a a tangela, exi: Enu mua bhukumuka, kindala ivuenu: manhi o mu ndanjiʼumu ta tundisa-mu o menha phalʼenu?

¹¹ Bhenhobho Mozé u zangula o lukuaku luê, hé u beta luiadi ku ndanji, ni mbangala iê, anga mu tunda ndumba ia menha; o kilombo anga a nua ni ibhaku iâ.

¹² Maji o Jihova uambela Mozé ni Alá, uixi; Tala, mukonda mua kambe ku ngi xikana eme, phala ku ngi kôlesa bhu mesu ma anʼa Izalaiele, mukonda dia kienhiki ki mua-nda kubokuesa dingi o kilombo kiki mu ixi i nga a bhana.

¹³ O iá ene o menha a Mediba, mukonda o anʼa Izalaiele a zoko ni Jihova; iú ua di monekena momuʼâ kuma Ukôla.

Mozé u bhinga kiènzele kia kubhita mu Idomo

¹⁴ Kia bhiti imʼiii, Mozé u katula jiphunga bhu Kadexi, u a tuma kua sobha ia idomo, uexi: Phangʼié Izalaiele uambe kiki: Eie uejiia o jiphaxi joso ji tua mu bhita na-ju,

¹⁵ ni kioso o jitata jetu kia kulumukine ku Ijitu, etuʼetu tua tungu ndumba dia izuua mu Ijitu; ni kioso akua Ijitu kia tu bhanga jinga o usuéia, ni etu ni jitata jetu.

¹⁶ Etuʼetu tua di kola kua Jihova, o muene iú uevu o dízui dietu, iú ua tumikisa anju iê, i ia tu katula mu Ijitu; o kiki-phe tuala bhabha bhu Kadexi, dibhata diasu o mbambe ni ixi ié.

¹⁷ Tuehele-phe kubhita mʼoxi ié; ki tua-nda kubhita ku mábhia, mba mu isoka ikokʼé-ikoka; ki tu bhambuka ku kadilu, mba tui bhambuka ku kiasu, katé mu jimbambe jé tua somboka-mu.

¹⁸ Maji-phe Idomo ua mu vutuila, uexi: Kana kubhita mʼoxi, mbebhu eme ki ngi tunde mu ku ku kauidila ni xibhata.

¹⁹ Kienhokio-phe anʼa Izalaiele a mu kumbulula, exi: Etu tua-nda kubanda mu ikoka iatu, o ki ki kala eme ni ibhaku iami tu nua ku menha mé, o suilu iê eme ngi i futa; ki nga-nda kubhanga dingi kima, ngehele ngó kuendelʼami bhoxi.

²⁰ Maji muene-phe, uexi; Ku bhiti-mu. Idomo bhenhobho anga u mu tundila ni ndumba dia mundu, ni nguzu iavulu.

²¹ Kienhiki kia ditunu Idomo kuenzela Izalaiele kubhita mu ixi iê; mukonda dia kiki Izalaiele uela kuengi, ua mu xi.

O kufua kua Alá

²² Kia bhiti imʼiii, a katuka bhu Kadexi; anga o anʼa Izalaiele, o kilômbo kiâ kioso, eza bhu mulundu ua Hole.

²³ Anga Jihova uambela Mozé ni Alá bhu mulundu ua Hole, mu jimbambe ja Idomo, uixi:

²⁴ Alá a-nda ku mu bhongololuela kiá kuʼaia malembʼê, mukonda mu ixi i nga bhana anʼa izalaiele muene ka-nda ku bokona-mu, mbata mua xibhaka o kizuelu kiami bhu menha ma Mediba.

²⁵ Katula Alá ni Eliiazale, dia monʼê, uie-nâ ku thala ia mulundu ua Hole;

²⁶ Anga u mu zula o izuatu iê, hé u i zuika Eleazale dia monʼê; mukonda o Alá a-nda ku mu bhongoluela kuʼaia malembʼê, ua-nda ku fuila kuenhoko.

²⁷ Mozé hé u bhanga kala kia mu tendelela Jihova; mukonda a bande ku thala ia mulundu ua Hole, bhu mesu muene a kilômbo kioso.

²⁸ Anga Mozé u zula Alá o izuatu iê, hé u i zuika Eleazale dia Monʼê; Alá anga u fuila kuenhoko, bhu zokozoko dia mulundu; o Mozé-phe ni Eleazale a tuluka ku mulundu.

²⁹ O kilômbo kioso-phe, kioso kia mono kuila Alá ua fu, a dila Alá, mu makuinhi a tatu a kizuua, kiene-phe, o dibhata dioso kiá dia Izalaiele, kia ididi o thambi ia Alá.