Dialuilu 2 - O Mikanda Ikola

Ididi ia miji bhu kibangu

¹ Jihova anga u ambela Mozé ni Alá, uixi:

² Anʼa Izalaiele ki a ta kibangu, ene oso a tule muthu uoso bhu mvela iê, bhuala o kijimbuete kia dibhata dia jitata jê; ibangu iâ i bhita mu kanga dia balaka ia kutakanena, kifua a i bhaka bhu kaẋi.

³ Ku mbandu ia thunda ku tundila dikumbi, kuene ku kala mvela ia kibangu kia Juda, ni ibhuka iê; kilamba-phe kia anʼa Juda, muene Nasono dia Aminadaba.

⁴ Kilômbo kiê, kia a soneka, a tena makuinhi sambuadi a midi, ni midi jiuana, ni hama jisamanu.

⁵ A di zukama-nê o muiji ua Isakale; kilamba-phe kia anʼa Isakale, muene Netanaiele dia Zuuale.

⁶ Kilômbo kiê, kia a soneka, a tena makuinhi atanu a midi, ni midi jiuana, ni hama jiuana.

⁷ Ku kaiela-phe muiji ua Nzebulone; kilamba-phe kia anʼa Nzebulone, Eliiaba dia Helone.

⁸ Kilombo kiê, kia a soneka a tena makuinhi atanu a midi, ni sambuadi dia midi, ni hama jiuana.

⁹ Ene oso, a a soneka, a tokala ku kibangu kia Juda, a tena hama ia midi, ni makuinhi nake a midi, ni midi jisamanu, ni hama jiuana, mu ibuka iâ. Mu kukatuka, ene a tuamena ku pholo.

¹⁰ Ku mbandu ia sulu, kuene ku kala mvela is kibangu kia Lubene, mu mu ibuka iâ; kilamba-phe kia anʼa Lubene, muene Elizule dia Xedele.

¹¹ Kilombo kiê, kia a soneka, a tena makuinhi auana a midi, ni midi jisamanu, ni hama jitanu.

¹² A di zukama-nê o muiji ua Ximinhá; kilamba-phe kia anʼa Ximinhá, Xelumiiele dia Nzudixadai.

¹³ Kilômbo kiê, kia a soneka, a tena makuinhi atanu a midi, ni divua dia midi, ni hama jitanu.

¹⁴ Kua ene ku kaiela ue muiji ua Ngade; kilamba-phe kia anʼa Ngade, Eliiazafu dia Leuele.

¹⁵ O kilombo kiê, kia a soneka a tena makuinhi auana a midi, ni midi jitanu, ni hama jisamanu, ni makuinhi atanu.

¹⁶ Ene oso, a a soneka, a tokala ku kibangu kia Lubene, a tena hama ia midi, ni makuinhi atanu a midi, ni midi imoxi, ni hama jiuana, ni makuinhi atanu, mu ibhuka iâ. Mu kukatuka, ene kadi, a kaiela ku akuâ a tuamenena.

¹⁷ Enhá kioso kia katuka, ku kaiela kiá balaka ia kutakanena, ni kibuka kia akua Levi mu kaẋi ka ibuka iamukuâ; ni mu kuenda ni mu kutula ene oso a kala mu ididi iâ, a kala bhua moxi ni mabandela mâ.

¹⁸ Ku mbandu ia luiji, kuene ku kala mvela ia kibangu kia Ifalaime, ni kibuka kiê; kilamba-phe kia anʼa Ifalaimi, muene Elixama dia Amihudi.

¹⁹ Kilombo kiê, kia a soneka, a tena makuinhi auana a midi, ni hama jitanu.

²⁰ A di zukama-nê o muiji ua Manasa; kilamba-phe kia anʼa Manasa, Ngamadiiele dia Pedazule.

²¹ Kilômbo kiê, kia a soneka a tena makuinhi atatu a midi, ni midi jiiadi, ni hama jiiadi.

²² Ku kaiela ue o muiji ua Bejamí; kilamba-phe kia anʼa Bejamí, muene Abidani monʼa Ngidiione.

²³ Kilômbo kiê, kia a soneka, a tena makuinhi atatu a midi, ni midi jitanu, ni hama jiuana.

²⁴ Ene oso, a a soneka, a tokala ku kibangu kia Ifalaimi, a tena hama ia midi, ni nake dia midi, ni hama. Mu kukatuka, ene tatu, a kaiela ku akuâ.

²⁵ Ku mbandu ia kusuku, kuene ku kala mvela ia kibangu kia Dane, ni ibuka iê; kilamba-phe kia anʼa Dane, muene Ahiiezele dia Amixadai.

²⁶ Kilômbo kiê, kia a soneka, a tena makuinhi asamanu a midi, ni midi jiiadi, ni hama sambuadi.

²⁷ A di zukama-nê o muiji ua Asele; kilamba-phe kia anʼa Asele, muene Pajiiele dia Okolane.

²⁸ Kilômbo kiê, kia a soneka, a tena makuinhi auana a midi, ni midi imoxi, ni hama jitanu.

²⁹ Ku kaiela ue ni muiji ua Nafitali; kilamba-phe kia anʼa Nafitali, muene Ahila dia Inane.

³⁰ Kilômbo kiê, kia a soneka, a tena makuinhi atanu a midi, ni midi jitatu, ni hama jiuana.

³¹ Ene oso, a a soneka, a tokala ku kibangu kia Dane, a tena hama ia midi, ni makuinhi atanu a midi, ni sambuadi dia midi, ni hama jisamanu. Mu kukatuka, ene uana, a sukidila ku dima.

³² Enhá, ene a a soneka ku anʼa Izalaiele ku mabhata ma jitata jâ; a alula mu ibangu ku ibuka iâ, kifua hama jisamanu ja jimidi, ni midi jitatu, ni hama jitanu ni makuinui atanu.

³³ Akua Levi-phe ka a te-mu, mu kosoneka kuenʼiuku kua anʼa Izalaiele, kala kia tumu Jihova kua Mozé.

³⁴ Kiene kia bhange anʼa Izalaielʼiki, kioso kia tumu Jihova kua Mozé, kiene kia te ibangu bhu jimvela jâ, kiene ue kia katuka jinga mu kuenda, ene oso a di sokesa mu kuvuadiua kuâ, mu mabhata ma jitata jâ.