Dialuilu 19 - O Mikanda Ikola

O Dibônzo dia uthôkua ua seseme ia ngombe

¹ Jihova anga uambele dingi Mozé ni Alá, uixi:

² Kiki kiene o kijilʼiki kia ngonge ia tendelela Jihova kuila: Ambela o anʼa Izalaiele, eze ni seseme ia ngombe ikusuka, ia kambe unema, mba i kala ni mabaka, ioio kiluua a i tula jungu ku thandu diê.

³ Anga mu i bhana kua Eliiazale, o nganga; o muene hé uia na-iu ku kanga dia kibangu, anga a i batuila o xingu bhu pholo iê.

⁴ Eliiazale dia nganga, u katula ku manhinga ni mulembu uê, hé u lunga ku pholo ia balaka ia kutakanena, nʼa sangela-ku lusambuadi.

⁵ O seseme ia ngombe a i ohela muene bhu mesu mê; ni kibha kiê, ni xitu iê, ni manhingʼê, ni ditobe diê, iene ioso a i oha muene.

⁶ O nganga anga ua kà zangula o muẋi ua musédulu, ni hisopo, ni jingoji ji kusuka, hé u i takuila mu kaẋi ka túbhia tuala mu kuoha o seseme ia ngombe.

⁷ O nganga kia tunda bhobho, u sukula o izuatu iê, hé u dʼiẋika o mukutu uê mu menha, anga u bokona kiua mu kibangu; o nganga u kasana muene katé mu ngoloxi.

⁸ Uoso ue uoha o seseme ia ngombe u sukula o izuatu iê mu menha, hé u dʼiẋika o mukutu uê mu menha, anga u kasana muene katé mu ngoloxi.

⁹ Bhu kala muthu ua zele uongeka o uthôkua ua seseme ia ngombe, anga ua kà u tula ku kanga dia kibangu, bhu kididi kia zele, hé a u bhakela o kionge kioso kia anʼa Izalaiele, ene o menha a dibônzo; kienhókio o kiamenga kia kituxi.

¹⁰ Uoso uomona o uthôkua ua seseme ia ngombe, u sukula o izuatu iê, hé u kasana katé mu ngoloxi; o kienhiki ki kala kijila ki nangenena ku ana a Izalaiele ni ku muthu uengi ua mu nhunganena muʼaxaxi kâ.

¹¹ Uoso u kuata ku file ioso-ioso, mba ku kimbi kia muthu, u kasana mu sambuadi dia kizuua.

¹² O mu kizuua kia katatu u di bonza ni menha enhá, ni mu kizuua kia kasambuadi, hé u zela kiua; maji se mu kizuua kia katatu ka di bonza, mu kizuua kia kasambuadi ka tena kuzela.

¹³ Ió uoso u kuata ku file ioso-ioso, mba kimbi kioso-kioso kia muthu ua fu, hé u kamba o ku di zelesa ku dibônzo, ió u bhekesa lufuku ku balaka ia Jihova; O muenhu ió mu Izalaiele a kà u batula-mu; mbata o menha a dibônzo ka mu sangela-u ku thandu diê, ua kasana; o kukasana kuê iú-uê na-ku hanji momuʼê.

¹⁴ Kienhiki kiene o kijila se kúfua muthu uoso-uoso mu balaka ioso-ioso: muthu uoso-uoso kiá u bokona mu balaka ioio, mba uoso-uoso kiá u kala mu balaka ienhoio, u kasana mu sambuadi dia kizuua.

¹⁵ Ni kitutu ue kioso-kioso ki kala ni dikanu dia jikuka, anga a kamba o ku kutila-ku mulele ua kizuikiku, ki kasana.

¹⁶ O ió ue uoso mu mukáu ua ngene ni ngene u babata kimbi kia muthu a mu jibha ni xibhata, mba kimbi kiengi, mba ku ifuba ia muthu uoso-uoso, mba ku mbila, u kasana mu sambuadi dia kizuua.

¹⁷ Phala ió uoso ua kasana, a katula-phe ku utôka ua kiohela kia kiamenga kia kituxi, o ku thandu dia utôka uenhú a ta-ku menha a fema, mu kitutu.

¹⁸ Anga bhu kala muthu ua zele u zangula hisopo, hé u i bonda mu menha enhô anga ua sangela ku balaka ioio, ni ku imbamba ioso, ni ku athu oso a kala momo; uixi ue kua ió uoso ua kuata ku ifuba, mba ku muthu uoso-uoso a mu jibha, mba ió uafu, mba ku mbila.

¹⁹ O ua zele, u sangela menha kua iú ua xidi mu kizuua kia katatu ni kia kasambuadi; mu kizuua kia kasambuadi-phe u mu zelesa; o muenhó ua kexile kikásane u sukula o izuatu iê, hé u zoua mu menha, o ku kiemba nʼa zele kiua.

²⁰ Maji-phe, uoso u kasana anga u kamba o ku di bonza nʼa zele, o muenhu ió mu kaẋi ka kionge a u batula-mu; mbata ua bheka lufuku ku dibhezelu dia Jihova: o menha a dibônzo (a zelesa) ka mu sangela-nâ ku thandu diê; ua kasana.

²¹ Kienhiki ki kala kijila kiâ ki nangenena; o uoso u sangela o menha a dibônzo, u sukula o izuatu iê; o uoso u kuata ku menha a dibônzo, u kasana katé mu ngoloxi.

²² O uoso ua kasana, kioso kia kuata ki kasana ue; o uoso ue dingi u mu babata u kasana katé mu ngoloxi.