Dialuilu 18 - O Mikanda Ikola

O kikalakalu kia jinganga ni Jilevita ni kúdia kuâ kua a bhana

¹ Bhenhobho Jihova uambela Alá, O uixi: Ni eie, ni anʼê, ni dibhata dia tatʼenu kumoxi, kikuma kioso kia dibhezelu kia kà kala ku thandu dienu, ki kala ku thandu dié eie kumoxi ni anʼé.

² O jiphange jé, akua muiji ua Levi, muiji ua tatʼenu, u bhiẋila-na-u ue kumoxi, phala a ku bande, ende ni ku ku bhikila; maji eie-phe kiá kumoxi ni enʼé, mu nanga jinga bhu pholo ia balaka ia umbangi.

³ Anga ene enda ni ku ku langidila, ni kulangidila o balaka ioso; maji o ku itutu ia dibhezelu ka bhiẋile-ku, mba ku kalatódio, mbé kʼafue, kutale ene, uixi enu.

⁴ Maji a kà banda eie, nʼa kà bhanga o kilangidilu kia balaka ia kutakanena mu ukunji uoso ua tokala ku balaka; ki kua kà bhiẋile muthu uengi kokuenu.

⁵ Enu-phe kiá, enu mua kà bhanga o kilangidilu kia dibhezelu ni kilangidilu kia kalatódio; mbebhu ki kuize dingi njinda lua mukuá ku thandu dia ana a Izalaiele.

⁶ Tala-ze, kuma eme nga katula o jiphange jenu, o jilevita, muʼaxaxe ka ana a Izalaiele; iá a mi bhana-u enu, mu ujitu, kuala Jihova, nʼende ni kubhanga o kikalakalu kia ukunji ua balaka ia kutakanena.

⁷ Maji eie-phe kiá kumoxi ni anʼê, muʼaluke o unganga uenu, mu ima ioso ia tokala ku kalatódio, ni ku ioio iala mu xilu dia mvéu, o ienhiʼii, iene o kikalakalu kienu; eme nga mi bhana o unganga uenu, u mi kale ujitu ua ukunji, o muthu uengi u bhiẋila-ku, u fua.

⁸ Jihova anga uambela dingi Alá, uixi: Tala-phe, kuma eme nga ku bhakuila o kilangidilu kia maujitu ami oso a kuzangumuna, kumoxi kiá ni ima ioso ikôla ia anʼa Izalaiele; mukonda dia ku ku unda ni maji, nga ku bhana na-iu eie ni anʼê, mu kijila ki nangenena katé ku hádia ni hádia.

⁹ O ku ima ikôla kinéne, ia túbhia, eie u kala jinga-ku ni iii: o maujitu mâ moso, kumoxi ni maujitu mâ moso ma mákudia, ni jisata jâ joso ja kiamenga kia kituxi, ni jisata jâ joso ja kiamenga kia kuêla, ima ioso ia-nda ku ngi bhakuila, ia kà kala ima ikôla kinéne, phala eie ni añê.

¹⁰ Bhu kididi kikôla kinéne bhene bhu u i dila jinga; mala oso ene a dia-ku; u ijiia-phe kuma ikôla.

¹¹ O ima ia mukuá iii ue i kala ié. O ujitu uâ ua kuzangumuna mu uthu uâ, ni mibhaku ioso ia kubhukila ia anʼa Izalaiele; nga i bhana kokué-eie, ni ku anʼê a mala, ni anʼé a ahetu u uala-nâ; nga i bhana i kale kijila ki nangenena; uoso ua di zelela uala mʼonzo ié muene udia-ku.

¹² Ku maji oso ambote, ni ku mákunua oso ambote, ni ku jimbundu joso jambote, ni ku ibundu ia ioso ia mutômo, ia bhakula kua Jihova, nga ku bhana-iu; eie.

¹³ O ibundu ioso ia dianga, ku ima ioso i kala mungongo, ieza-na-iu kua Jihova, i kala ié; uoso ua di zelela uala mʼonzo ié, muene ua kà dia-ku.

¹⁴ Kima kioso kiá kia lumbila Nzambi, mua Izalaiele, ki kala kié.

¹⁵ Kioso ki jikula o divumu, ku xitu ioso ia bheka kua Jihova, kixi ia athu kixi ia ibhaku, i kala ié; maji, o jiphande-kumbi ja athu ua kà ji kula; o jiphande-kumbi ue ja ibhaku ia iibha ua kà ji kula.

¹⁶ Oso-phe mudiâ a kala phala ku a kula, ua kà a kula, tundé kia kala hanji mu kitala kia mbeji imoxi, kioso eie-muène ki ua kâ a talela, hé u a xindila xikulu jitanu ja kitadi, kala kia soko o xikulu ia dibhezelu, ia makuinhi aiadi a jela.

¹⁷ Maji o phande-kumbi ia ngombe-phe, mba phande-kumbi ia mbudi, mba phande-kumbi ia hombo, kana ku i kula; mbata ikôla; manhinga mâ u ma sangela ku kalatódio, o maji mâ u moha kuma sata ia kuoha, i tubhula dizumba diambote kua Jihova.

¹⁸ O xitu iâ i kala ié; mukuá ni ku mubhaku ua kubhukila, o phetu i kala ié ni kinama kia taku kia mbandu ia kadilu.

¹⁹ Maujitu oso a kôla, eza na-u ana a Izalaiele mu ku a bhakuila Jihova, nga ku bhana na-u eie kumoxi ni anʼé a mala ni anʼé a ahatu u uala-nâ, ia mi tokala katé ku hádia ni hádia; kiki kikutu kia môngua ki nangenena katé ku hádia ni hádia bhu pholo ia Jihova, phala eie ni muiji ué kumoxi.

²⁰ Jihova ue anga uambela dingi Alá, uixi: O mu ixi ié eie kua kà kala-mu ni undundu ua kima, o muʼaxaxe kâ ene ki mua kà ku kala dikânda; muʼaxaxe ka anʼa Izalaiele, emiʼeme ngi undundu ué, eme ngi dikânda dié.

O mbandu ja kakuinhi ni Jilevita

²¹ Uila kiki, o ana a Levi nga a bhana o mbandu ja kakuinhi joso mu Izalaiele, ji kale undundu uâ, ku kikalakalu kiâ kia ukunji kia mu bhanga, mu ukunji ua balaka ia kutakanena.

²² O anʼa Izalaiele-phe ki mungu dingi a zukama ku balaka ia kutakanena, phala o kituxi ka kiambate ku thandu diâ hé a fua.

²³ Maji o jilevita ene a bhanga jinga o ukunji ua kikalakalu kia balaka ia kutakanena, o itondalu iâ ioso ia bhanga, ene kiá a ebhula; ki mi kale kijila ku miji ienu ioso katé ku hádia ni hádia; o muʼaxaxi ka ana Izalaiele ene uâ ka kala-mu ni undundu ua kima.

²⁴ Mukonda o mbandu ja kakuinhi ja anʼa Izalaiele, ja-nda ku bhakula kua Jihova mu ujitu ua kuzangumuna, nga ji bhana mu undundu ku jilevita; mbata eme nga a tendelela, ngixi: Muʼaxaxi ka anʼa Izalaiele ene ka lundula-mu undundu ua kima.

²⁵ Jihova anga u zuelela Mozé, uixi:

²⁶ Eie ue ua ka zuelela o jilevita, u a tangela, kuma: Kioso enu ki mu tambula o mbandu ja kakuinhi ku ana a Izalaiele, ji nga mi bhela enu kokuâ mu undundu uenu kienhókio mu bhakula-ku o ujitu uenu kua Jihova; jene o jimbandu ja kakuinhi ku mbandu ja kakuinhi ji mua tambula.

²⁷ Anga o ujitu uenu ua kuzangumuna a u kita muene kala jimbundu ja dizanzu dia kuvundila mba kusubhajaka kua ditangi dia kukamena.

²⁸ Kala kiki enu uenu mu bhana jinga kua Jihova ujitu ua kuzangumuna ku mbandu jenu joso ja kakuinhi ji mu tambula jinga ku ana a Izalaiele, kuenhoko kuene ku mu nomona o ujitu ua kuzangumuna ua Jihova anga mu u bhana kua Alá, o nganga.

²⁹ Ku ima ienu ioso i mu tambula kuene ku mu bhana o ujitu ua kuzangumuna kua Jihova; ku ima ioso ia beta o kuiuka kuene ku mu mu katuila o mbandu iê ikôla.

³⁰ Kala kiki-phe eie u a ambela, kuma: Kioso enu ki mu bhana o ujitu anga mu sola-bhu muene ioso ia beta hé mu i bhakula kala jimbundu ja tundu bhu dizanzu dia kuvundila mba ku ditangi dia kukamena, kienhiki-phe o jilevita a kà a tela-kiu ku mbandu iâ.

³¹ Anga o ienu mu i dila bhu kididi kioso ki mnua mono, ni enu ni mabhata menu, mukonda kiene o kisakidilu kienu, mu kikalakalu kienu ku balaka ia kutakanena.

³² Kala kiki, ki mu kala ni kituxi, se ku iene mu dianga kiá o kubhakula-ku ioso ia beta o kuiuka; o ima-phe ikôla ia ngi lumbila anʼa Izalaiele kana ku i sebulula phala ki mu fue.