Dialuilu 16 - O Mikanda Ikola

O kubhukumuka (ni kubaluka) kua Kola, ni Datane ni Abilamu

¹ Anga o Kola, monʼa Izahale, monʼa Kohate, monʼa Levi, ua zangula kumoxi-nê Datane ni Abilamu, anʼa Eliiaba, ni Hone, monʼa Pelete, anʼa Lubene,

² hé a balumuka bhu pholo ia Mozé ni hama jiiadi ni makuinhi atanu a muthu ku anʼa Izalaiele, adiakime a kionge, a a tumbula bhu dibhongolokelu, athu a majina muene.

³ Anga a di bhongolola mu kuzoka ni Mozé ni Alá, hé a a tangela, exi: O kiki ue kia vulu kiá, kuma o kilômbo kioso kia Ngana, o ene oso athu a Ngana, o Jihova uala muʼaxaxe kâ; enu-phe mua di zangelekelaʼhi ku kionge kiangene kia Jihova?

⁴ Kuma o kienhiki Mozé ua kʼivu, ua di ṗhudika o pholo iê bhoxi,

⁵ anga u zuelela Kola ni kionge kiê kioso, uixi: O mungu, mu kimenemene, o Jihova muene ua-nda kuijidisa uoso o uê ua mu tokala, ni ió uoso uazele, uoso Muene ua-nda ku mu bhiẋidisa kokuʼê.

⁶ Bhangenu-phe kiki: Ni Kola ni kionge kiê kioso, a zangule o iomuenu ia uasu ua dizumba;

⁷ o mungu, bhu iomuenu ki mu ta-bhu o túbhia, takuilenu-bhu kiá o uasu ua dizumba, bhu pholo ia Jihova; kia kà kala-phe kuila, uoso kiá o muthu a mu sola-bhu kuala Jihova, muenhó muene o muthu ua zele; lu mi suke kiá, enu anʼa Levi.

⁸ Mozé anga uambela dingi Kola, uixi: O kiki-phe ivuenu, enu mu anʼa Levi.

⁹ Manhi enu kia mi tolela kia kuila o Nzambi ia Izalaiele ua mi uanununa ku kionge kia Izalaiele, phala ku mi bhangesa o kubhixila kokuê-muène, mbé muende ni kubhanga o kikalakalu kia balaka ia Jihova, ni kuimana bhu pholo ia kionge, phala kuenda ni ku mu bhangela o ukunji;

¹⁰ iú ua ku bhiẋidisa eie, kumoxi ni jiphange jê joso, o anʼa Levi; manhi hanji dingi ue mu sota o ukunji ua unganga?

¹¹ Ki kia mi bhekesa dingi kuila ni eie ni kionge kié kioso mua di bhongolola mu kuzoka ni Jihova; o Alá, muene kima kiahi, muala ku mu longololʼenu?

¹² Anga o Mozé u tuma kuixana Datane ni Abilamu, anʼa Eliiaba; maji ene-phe, exi; Etu, koko ki tu bande-ku.

¹³ Manhi kia ku tolela, ki ua tu bhangesa o kutunda mu ixi izunzumuka lete ni uemba, phala ni u tu jibhile mu kikangalakata mumu, anga u mesena u di bhanga dingi u ngana ietu?

¹⁴ Mu ixi izunzumuka lete ni uemba, nêngó bhuòfele kua tu bheka-mu, mba u tu bhana kulundula mikáu ni mábhia a mivide, lémbue; manhi o athu iá eie ua-nda ku a ẋakula o mesu? Etu-phe, koko ki tua-nda kubanda-ku.

¹⁵ Kienhókio Mozé o njinda i mu kuata kiavulu, anga uambela Jihova, uixi; Kana kusuua ku ujitu uâ; eme né ngó bulu imoxi ki ngi i tambula kokuâ, mba nga bhange kiaiibha ku muthu mudiâ.

¹⁶ Mozé anga uambela dingi Kola, uixi: Ni eie ni kionge kié kioso imanenu bhu pholo ia Jihova, ni eie ni eme ni Alá, mungu.

¹⁷ Anga mu zangula, muthu ni muthu, o kiómuenu kiê, o bhu iomuenu tenu-bhu uasu ua dizumba; o kala muthu a bheke o kiómuenu kiê bhu pholo ia Jihova, hama jiiadi ni makuinhi atanu a iomuenu; kumoxi ue ni eie ni Alá muthu ni muthu ni kiómuenu kiê.

¹⁸ Anga muthu ni muthu u zangula o kiómuenu kiê, hé bhu iomuenu a ta-bhu túbhia iá a te o uasu ua dizumba bhenhobho, anga eza emana bhu muelu ua balaka ia dibhongolokelu kumoxi ni Mozé ni Alá.

¹⁹ O Kola anga kilômbo kioso u ki bhongoluela bhu muelu ua balaka ia kutakanena mu kuzoka-nâ; bhenhobho o kubenha kua Jihova anga ku tukulukila ku kilômbo kioso.

Iẋinuke a bonga o divuua

²⁰ O jihova anga u zuelesa Mozé ni Alá, uixi:

²¹ O mu kaẋi ka kifuẋi tundenu-mu, eme phala ngʼa buikise mu kapota-diesu.

²² Maji-phe ene a di ṗhudikila o jipholo jâ bhoxi, anga ela exi: Uá! Nzambi, tata! Eie u Nzambi ia jinzumbi ja xitu ioso, abha mukonda dia muthu umoxi ua-te o kituxi, eie u thathamena kiavulu kiki o kilômbo kiosuʼiki?

²³ Jihova anga u zuelela Mozé, uixi:

²⁴ Ambela o kionge kioso kienhiki, kuila: Mu jimbandu ja jinzu ja Kola, ni Datane ni Abilamu, a tunde-mu.

²⁵ Kienhókio o Mozé u balumuka, hé uia kua Datane ni Abilamu; o adiakime oso a Izalaiele a mu kaiela.

²⁶ Muene hé uambela o kifuẋi, kuila: Nga mi diondo, o ku jibalaka ja athu iá a bhukumuka, sondolokenu-ku, ki mu babate ku kima kiâ kioso kia a tokala, mbebhu enu ue ki mu bhituke mu ituxi iâ ioso.

²⁷ Ene oso anga a katuka mu jimbandu ja jinzu ja Kola, ni Datane ni Abilamu. Ni Datane ni Abilamu anga a tunda, hé eza emana bhu mielu ia jibalaka jâ, kumoxi ni ahetuʼâ ni anʼâ ni tuana tuâ tuòfele-fêle.

²⁸ Bhenhobho-phe Mozé uamba, uixi: Bhene bhu mua-nda ku kʼijidila kuila o Jihova muene ua ngi tumu o kubhanga ima ioso ienhiʼii, ki ia mu di tundila ku muxima uami.

²⁹ Hé iá a fua muene kala kiene mu kúfua o athu oso, se a a kunda muene kala kiene mu ku kunda o athu oso, kuabhu-phe, o Jihova ki muene ua ngi tumu.

³⁰ Maji, se o Jihova u bhanga kima kiengi kia ubhe, anga o ixi i jikula o dikanu diê ni ia a habule, kumoxi ni ima iâ ioso ia a tokala, hé a tuluka ni muenhu uâ mu kina kia kalunga, kienhokio-phe kiene ki mua-nda ku kʼijiia kuma o athu iâ Jihova a mu thathamesa.

³¹ Anga ki bhita-phe muene kuila, kioso muene kia zubha o kuzuela o maka oso iâ, o mavu a kexile bhoxi diâ a di zenge anga a jikuka.

³² Anga oxi i jikula o dikanu diê, hé i a habula kumoxi ni jinzu jâ, ni athu oso kiá a tokalele Kola, ni jimbongo jê joso.

³³ Ni ene ni ioso kiá ia a tokalele, anga a tuluka ni muenhu uâ mu kina kia kalunga o mavu hé a a bhita ku thandu, a jikinina, o mu kaẋi ka kionge a tundu-mu.

³⁴ O ku mutendu uâ, Izalaiele ioso a a kexile mu jimbandu, a lenge; kuma exi: phala etu ue ki ki ta bhite kuila oxi i tu minha.

³⁵ Kuabhu-phe, anga ku tunda túbhia kua Jihova, anga tu jikinisa o hama jiiadi ni makuinhi atanu a muthu a kexi mu kuoha o uasu ua dizumba.

³⁶ O Jihova anga uamḃela Mozé, uixi:

³⁷ Tangela Eliiazale, dia monʼa Alá, o nganga, kuila a katule o iomuenu mu kaẋi ka túbhia, o túbhia a tu sandele dikanga, kuma iomuenu ii ikôla kiá,

³⁸ o ku iomuenu ia ió a te o kituxi ku mienhu iâ-ène, ioso a i bhange izalelu ia kuzala ku thanduʼa kalatódio; kuma iòbheke bhu pholo ia Jihova; mu kienhiki-phe, ikôla kiá; ia kà kala kijimbuete ku anʼa Izalaiele.

³⁹ Anga Eliiazale, o nganga, u zangula o iomuenu ia utadi, iejile-na-iu ió a oha ku túbhia tua Jihova hé a i bhanga izalelu ia kuzala ku thandu dia Kalatódio,

⁴⁰ ni i kale dilembalelu phala ana a Izalaiele, mbé ki bhu kale dingi muthu uengi, ka tokala ku mbutu ia Alá, u bhumina o kubhiẋila phala kuoha uasu ua dizumba bhu pholo ia Jihova; mbé ka kale kala Kola ni kibuka kiê, kala kia mu tangelele Jihova ku dikanu dia Mozé.

O kubaluka kua kaiadi ni njumbu iê

⁴¹ Maji mu kizuua kia kaiadi, o kilômbo kioso kia anʼa Izalaiele a kuata o kulongolola Mozé ni Alá, exi: Enu mua jibha o mundu ua ngene ua Jihova.

⁴² Anga ki bhita-phe kuila, kioso o kilômbo kioso ki a di bhongoluela mu kuzoka ni Mozé ni Alá, mu kulunguluka ku balaka ia kutakanena, a mona kuila o dituta dia i vungina, o kubenha kua Jihova kua di muika.

⁴³ O Mozé ni Alá anga eza bhu pholo ia bhalaka ia kutakanena.

⁴⁴ Bhenhobho o Jihova anga uambela Mozé, uixi:

⁴⁵ Katukenu muʼaxaxe ka kionge kiki, nda eme ngi ki jimise mu kapota-diesu. Ene-ṗhe bhenhobho a di ṗhudikila o jipholo bhoxi,

⁴⁶ anga Mozé uambela Alá, uixi: Zangula o kiómuenu kié, u-te-bhu o túbhia tua kalatódio, u takuile-bhu o uasu ua dizumba, uie ni kunzunzuna kuala o kionge, ua kà a bhangele o kiamenga; mbata o njinda iavulu ia tundu bhu pholo ia Jihova; o dibhebhu-phe diandeka kiá.

⁴⁷ Alá anga u zangula o kiómuenu, kala kia mu tangela Mozé, hé uia ni lusolo mu kaẋi ka kilômbo; tala, o dibhebhu-phe diandeka kiá muʼaxaxe ka mundu; hé u takuila-bhu o uasu ua dizumba, anga u bhanga o kiamenga phala o ituxi ia mundu.

⁴⁸ O muene anga uimana bhu kaẋi ka imbi ni athu a muenhu; o dibhebhu anga di zumbuka kubhita.

⁴⁹ O afu ku dibhebhu dienhodio a tenene kuinhi ni kiuana dia midi ni hama sambuadi, o afu ku mulonga ua Kola engi.

⁵⁰ Alá anga u vutukila kua Mozé, bhu muelu ua balaka ia kutakanena; o dibhebhu anga díbhua.