Dialuilu 15 - O Mikanda Ikola

Mubhaku ua mákudia ni mubhaku ua mákunua

¹ Jihova anga u ambela Mozé, uixi;

² Ambela anʼa Izalaiele, kuma: Hinu ki mua kà bhiẋila mʼoxi ienu ia kutunga ni kusoma, ioso i nga-nda ku mi bhana,

³ hé mua mesena Jihova mu mu satela ni túbhia, mba sata ia kuoha, mba sata ia mutululuku, mba mu bhanga hasa, mba mu bhanga ujitu ua kudifikixila, mba mu jifesa ja mi tumu, kubhanga dizumba diambote kua Jihova ni kibhaku kia dikota mba kiofele;

⁴ uoso u bheka ujitu kala kiki, u bhana kua Jihova mubhaku ua mákudia, u kuata kakuinhi ka efah ia fuba ia kábhia (fina), iólunge ni mbandu ia kauana ia hine ia maji;

⁵ ni vinhu ia mubhaku, mbandu ia kauana ia hine, iene ia bheka sata ia kuoha, mba sata iene, ku kambudi kamoxi.

⁶ Se kilumbe kia bheka, mubhaku uê ua makudia u kala tukuinhi tuiadi tua efah ia fuba ia kábhia, iólunge ni mbandu ia katatu ia hine ia maji;

⁷ o mubhaku uê ua mákunua u kale ua mbandu ia katatu ia hine ia vinhu, ia kubhanga dizumba diambote kua Jihova.

⁸ Se ngombe i u bheka, ia kuoha, mba sata ia mutululuku, mu ku tenesa hasa, mba mu ujitu ua mutululuku kua Jihova;

⁹ o kuta ku ngombe, mubhaku uê ua mákudia u bheka efah imoxi ia fuba ia uabha kiambote iólunge ni kaxaxe ka hine ia maji,

¹⁰ o mubhaku ua mákunua, u kala ua kaxaxe ka hine ia vinu, ujitu ua túbhia, ua kubhanga dizumba diambote kua Jihova.

¹¹ Ki bhinga kiene kia bhangʼiki, ku ngombe, ku kilumbe, mba ku tuibhaku tuofele, ku kambudi mba kahombo.

¹² Kioso kia soko o konda ia ibhaku, kala kibhaku, kiene muene kia bhangʼiki.

¹³ Oso a a vualela ku bhata a bhanga kala kienhiki, mu kubhana ujitu ua túbhia, mu kubhanga dizumba diambote kua Jihova.

¹⁴ Hé bhu kala mzuángiza mua tungu-nê, mba uoso-uoso mu kala-nê ku miji ienu ioso, se ua mesena kubhana ujitu ua túbhia, kubhanga dizumba diambote kua Jihova; kioso ki mu bhangʼenu ni muene ue kiene kia bhanga.

¹⁵ Kima kia ngonge, ni enu ni nzuangiza muala-nê, kijila kiene kimoxi, kijila ki nanganena, ku miji ienu ioso; ki mualʼenu, kiala o nzuángiza, bhu pholo ia Jihova.

¹⁶ Kitumu kimoxi, ukalelu umoxi, ni enu mu akua bhata ni nzuángiza muala-nê, uala kunhunganena muʼaxaxe kenu.

¹⁷ Jihova anga u ambela dingi Mozé, uixi:

¹⁸ Ambela anʼa Izalaiele, kuma: Kioso ki mu bokona mʼoxi mu nga-nda ku mi tula,

¹⁹ ki mua kà dia kià o kúdia kuaʼxi koko, bhenhobho mua kà katula-ku munomo ua kubhakuila Jihova, mu ujitu ua kuzangumuna.

²⁰ Ku dikende dienu di dianga, mu bhanga-ku mbolo ia mubhaku ua kuzangumuna, kifua mubhaku ua kienda kia kuvundila.

²¹ Ku dikende dienu dia dianga mu katula-ku munomo ua kubhakuila Jihova, ku miji ienu ioso.

Kutondala mu kukamba kuijiia

²² O ki mu tondala, mu kukamba kukuata ijiia ioso iii ia tange Jihova kua Mozé,

²³ iene ioso kiá ia tumu Jihova kua Mozé, tundé kizuua kia bhana Jihova ijiia, katé ku hádia ku miji ienu ioso;

²⁴ se kia bhiti mu kutondala, ki kia kubhanga luelu, o kionge-phe ka kʼijiia, kionge kioso kibhinga a bheka ndumbe ia ngombe ia sata ia kuoha, kubhanga dizumba diambote kua Jihova, ni mubhaku ua mákudia ua tokala-ku, ni mubhaku uê ua mákunua, kala kia mi bhana kijila, ni kisutu kia hombo kia sata ia kituxi.

²⁵ Nganga anga ua bhangela kiluuluilu kia kubhuisa ikuma, kilômbo kioso kia anʼa Izalaiele, anga a a loloka; kuma a ki bhange ni kutondala, ki kia kubhanga luelu, ia a bheka ujitu ua, sata ia kuoha ni tubhia kua Jihova, ni sata iâ ia kituxi bhu pholo ia Jihova, mukonda dia kutondala kuâ.

²⁶ Kilombo kioso kia anʼa Izalaiele anga a a loloka, katé ni nzuangiza muala-nê muaxaxe kenu, mukonda kima kia bhiti ni kutondala, o kifuẋi kioso ka kʼijiia.

²⁷ Hé muthu umoxi u ta kituxi kia kutondala, ki kia luelu, muene-phe u bheka hombo ia mukaji ia muvu umoxi ia sata ia kituxi.

²⁸ Nganga anga u mu bhangela kiamenga mu kubhuisa ikuma ia muthu ua te kituxi kia kutondala bhu pholo ia Jihova, kuma ka ki bhange luelu, bhu bhita kiluuluilu, anga a mu loloka.

²⁹ Ku kala kijila kimoxi kia ió ua te kituxi kia kutondala, ka ki bhange kiluelu, a kale muthu a mu vuala ku bhata, ku anʼa Izalaiele, a kale nzuángiza mua tungu-nê.

³⁰ Muthu uoso-phe u ta kituxi ku luelu, a kale mvàle, a kale nzuángiza, ua bhumina Jihova, muthu ua ku mu batula ku kifuẋi kiê.

³¹ Mukonda ua tobhesa kizuelu kia Jihova, ua bulu kitumu kiê, muthu ió a mu batula muene ku kifuẋi; kituxi kiê ki kala muene ku thandu diê.

Hadi ia fuama ió ua bhumina sabhalu

³² Kioso-phe kiala anʼa Izalaiele mu kikangalakata, a sanga diiala ua kuẋanga jihuinhi kizuua kia sabhalu.

³³ Oso a mu kuata mu kanga, a mu bheka kua Mozé ni Alá ni kilombo kioso.

³⁴ Anga a mu kuika hanji, mukonda kiluua a kʼivua kiambote kioso kia tokala ku mu bhanga.

³⁵ Jihova anga u ambela Mozé, uixi; Muthu ió ua tokala ku mu jibha muene; kilômbo kioso a mu bube ni matadi ku kanga dia kibangu.

³⁶ Kilômbo kioso anga a mu bheka ku kanga dia kibangu, hé a mu buba ni matadi katé kiafu, kala kia tumu Jihova kua Mozé.

Kusangununa jithanga

³⁷ Jihova anga uambela Mozé, uixi:

³⁸ Zuela ni anʼa Izalaiele, u ambela kuma: A sangunune ku mizumbu ia jithanga jâ, ki kale kijila ku miji iâ ioso, o ku a sangununʼuku ku sungu ni ku sungu a tunge-ku ni ngoji ia azulu;

³⁹ ki kale kusangunuka kua kuila ki mu tala-ku mu banza jinga o ijiia ioso ia Jihova, mu i kuata, ki mu kaiele dingi ki mi tuma o muxima uenu, mba ki mu mona ni mesu; kuma kiene ku ki kaiela kiala ku mi bhangesa undumbu.

⁴⁰ Inda mu banza jinga kukuata o ijiia iami ioso, mu kale mu athu angene a Nzambi ienu.

⁴¹ Eme Jihova, Nzambi ienu, nga mi katula mʼoxi ia Ijitu, phala ngi kale ngi Nzambi ienu, Eme ngi Jihova Nzambi ienu.