Dialuilu 14 - O Mikanda Ikola

Kilombo kia Izalaiele enda kuvutuka mu Ijitu

¹ Kilômbo kioso anga a suina dízui ni kudikola; kifuẋi a kala mu dila usuku uenhó.

² Anʼa Izalaiele oso anga a longolola Mozé ni Alá: Kilômbo kioso anga a ambela, exi: Tamanu tua fuidile mʼoxi ia Ijitu! Mba tu fuila ngó mu kikangalakatʼumu!

³ Jihova ua tu bhekela-hi kʼoxi kunu, phala ni tu fuile ngó ku xibhata? Ni ahatuʼetu ni anʼetu nʼa di bhange mbole; manhi ki kota tu vutukila mu Ijitu?

⁴ Anga a di longesa mudiâ, exi: Tu sodienu kabhitangu, u tu kala ku pholo, tu vutuke mu Ijitu.

⁵ Bhenhobho ni Mozé ni Alá a di bhala jipholo bhoxi, ku mesu a kionge kioso kia kilômbo kia Izalaiele.

⁶ Ni Josuué dia Nune, ni Kalebe dia Jefune, ene ue a tokala mu ilolo iele mu londa ixi, a tandula izuatu iâ;

⁷ anga ambela kilômbo kioso kia anʼa Izalaiele, exi: Ixi i tua bhiti ni ku londa, ixi iauabha kiavulu.

⁸ Jihova hé ua tu uabhela, muene u tu bheka mʼoxi muenhumu, u tu bhana-iu, ixi ia mu kunguluka muene lete ni uiki.

⁹ Hé kima, kana kukitukila Jihova, kana kukala ni uoma ua akua-xi; kuma a kala mbolo ietu ia kúdia, kilembeketa kiâ kia tundu-ku, kala na-kiu dingi, etu-phe Jihova tuala-nê; ki mu kale ni uoma.

¹⁰ Kilômbo kioso kia Izalaiele-phe amba, exi: A bubienu ni matadi. Kubenha kua Jihova anga ku dʼidikiza mu balaka ia kutakanena ku mesu a anʼa Izalaiele oso.

¹¹ Jihova anga u ambela Mozé, uixi: Mbambe bhebhi bhu suka kifuẋi kiki, ni ku ngi tènda? Katé bhebhi ni kukamba ku ngi xikana, ku thandu dia isuma ioso i nga kalakala muʼaxaxi kâ?

¹² Nga-nda ku a beta ni kibuika, ngʼa ehelela, ngi ku bhange eie u kale u kifuẋi ki beta kuvula, ki beta uiala, ene ndenge.

¹³ Mozé anga u ambela Jihova, uixi: Akua Ijitu-phe hinu a kʼivua, kuma kifuẋi kiki ua ki katula muʼaxaxi kâ ni undanda ué,

¹⁴ akua-xi mumu a-nda ku a tangela-kiu. A kʼivu kiá kuma eie, Jihova, ua tungu muʼaxaxi ka kifuẋi kienhiki, a kʼivu ue kuma, eie Jihova, uala ku a tukulukila pholo ni pholo, dituta diê diemana ku thandu diâ, u mukua ku a tuamenena mu philadi ia dituta mu muanha, ni philadi ia túbhia mu usuku.

¹⁵ O kiki-phe ki u buikisa kifuẋi kiki kala muthu umoxi ngó, ifuẋi ia athu evu fuma ié, a-nda kuila kuma: Ua lémbua!

¹⁶ Mukonda Jihova ua lémbua kubhiẋidisa kifuẋi kiki mʼoxi ia a lokela ku a bhana, kiene kia a jibhila mu kikangalakata.

¹⁷ Inda, Ngana, nga ku diondo, kutena kué ku fumane, kala ki ua ki tanga, uixi:

¹⁸ Jihova u kokoloka ku njinda, u vudila henda, u loloka ikuma ni itondalu; ka ẋikina-phe kueha muedi, ikuma ia jitata i bhiẋika kuxixima ku ana ni alaula, katé ku muiji ua katatu ni ua kauana.

¹⁹ Loloka, nga ku diondo, o ikuma ia kifuẋi kiki, mu henda ié iavulu kinéne, kala ki ueza ni kuloloka kifuẋi kiki tundé ku Ijitu katé bhabha.

O kastiku ka Nzambi ku akua Izalaiele

²⁰ Jihova anga u zuela, uixi; Nga a loloka, nga xikina kizuelu kié.

²¹ Ni kidi muene-phe, ki ngedi eme ngi muthu ua muenhu, ixi ioso hádia ia kèʼzala ni fuma ia Jihova;

²² mala enhá kia mono unene uami ni isuma i nga bhange mu Ijitu ni mu kikangalakata, maji a ngi bhumina lukuinhi luosʼulu, nguauâ kuívua dízui diami;

²³ kidi kiene, ixi ka kà i mona dingi, i nga lokela jitata jâ, ene oso a ngi tènde ka kà i mona.

²⁴ Kale ngó mubhikʼami Kalebe, mukonda uala ni muxima uengi, ua ngi kaiela sè ngó kufula, muene ngó ngi mu bheka mʼoxi iele mu ku londa, an-ê a kà i lundula.

²⁵ Kiosuʼiki-phe kuma akua Amaleke ni akua Kanana a tungu mu njila mumu mu kaẋi ka milundu, mungu tunde nu-mu muie dingi mu kikangalakata, njila ia Kalunga kakusuka.

Akua kulongolola ka kà bokona mu ixi ia Kanana

²⁶ Jihova anga u ambela Mozé ni Alá, uixi;

²⁷ Mbambe bhebhi bhu nga kà suka ni kuxididikila kilômbo kiki kiaiibha, a kuata ku ngi longolola? Ngevu kulongolola kua anʼa Izalaiele, kioso kiala ku ngi longolola eme.

²⁸ A ambedienu; Ki ngedi eme ngi muthu ua muenhu, eme ngi Jihova, kioso ki mua zuelenu mu mátui mami, kiene muene ki ngi mi bhanga;

²⁹ imbi ienu ia-nda ku xalela mu kikangalakatʼumu; oso a a tele mu dialuilu, a kexile mu makuinhi aiadi a muvu mba ku makuinhi aiadi a muvu a tele-ku kiá, oso muene mua ngi longolola,

³⁰ kidi muene, ki mua kà bokona dingi mʼoxi i nga lokela, ngixi: Ngi mi tungisa momo; kale ngó Kalebe dia Jefune ni Josuué dia Nune.

³¹ Inda tuana tuenu-phe, tu mua tangele, muixi: A di bhange mbole, ene nga kà a bokuesa-mu, a kêjiia ixi i mua tènde, enu mua di tunu-iu.

³² Enu bhobho-phe, imbi ienu i nengukina mu kikangalakata muenhumu.

³³ O anʼenu a kala abidi, a nhungana mu kikangalakatʼumu makuinhi auana a muvu, ambata kuxixima kua undumbu uenu, katé ki mua kà jila, imbi ienu ni i xalela mu kikangalakatʼumu.

³⁴ Ki kaiela mu izuua i mua bhangele mu kulonda ixi, makuinhi auana a kizuua, mu makuinhi auana a muvu, kizuua muvu, kizuua muvu, muambata mulonga uenu mu makuinhi auana a muvu, muijiie ki kala o kuẋimbuka kuami.

³⁵ Eme, ngi Jihova, nga zuela, kidi muene kiene ki ngi bhangʼiki, ku kilômbo kiaiibhʼiki kia ngi lungulukila; a kà jidila mu kikangalakatʼumu, muene mu a fuila.

³⁶ Mala enhó-phe oso a a tumine kuala Mozé kulonda ixi, oso kia vutuka a bhangesa kilômbo ku mu longolola, mukonda dia ixi ku i bhana fuma iaiibha,

³⁷ enhó muene a fumanesa ixi anga a fuila ku dibhebhu dia tundu kua Jihova.

³⁸ Inda-phe Josuué dia Nune, ni Kalebe dia Jefune ene ngó a xala ni muenhu ku mala oso ele mu londa ixi.

Izalaiele a mu tolola bhu Hôloma

³⁹ Mozé anga u tangela anʼa Izalaiele oso o maka menhama; kifuẋi anga a dila kiavulu.

⁴⁰ Ki kúkia a di meneka ku thala dia mulundu, exi: Kiki, etu-ú, banda muene ku kididi kia tu tangela Jihova, kuma tua te kituxi.

⁴¹ Mozé-phe u a ambela, uixi: Phalahi mu tondala dingi kitumu kia Jihova? Kuia ki ku xikina dingi.

⁴² Kana kuia-ku; kuma kuia ngó, Jihova ki muala nê, a mi beta kuala jinguma.

⁴³ Mukonda akua Amaleke ni akua Kanana iá kuenhuku ku muia, mua kà fuila ku xibhata; kuma mua ditunu kukaiela Jihova, muene kʼàia dingi ku mi bheka.

⁴⁴ Sumbala a ambela kiki, a bhumu ni kubanda ku thala dia mulundu; álaka ia kikutu kia Jihova-phe, ni Mozé a xalʼâ bhu kibangu.

⁴⁵ Bhenhobho akua Amaleke a kulumuka, ni akua Kanana, a tungu mu mulundu muenhomo, anga a a bhesa lusolo, katé bhu Holoma.