Dialuilu 12 - O Mikanda Ikola

¹ Ni Midiiana ni Alá a di kuata ni Mozé Ni Midiiana ni Alá anga a di kuata ni Mozé mukonda dia muhatu, mukua Kuxi a mu sakana kuala Mozé, mukonda ua sakana ni muhatu mukua Kuxi.

² Anga a zuela, exi: Kifua Jihova ua zuelela ngó mua Mozé ubheka uê? Ka zuelela ue moʼmuetu? Jihova anga u kʼivua.

³ Mozé-phe ua kexi muthu ua xididika, athu oso mu ngongo ndenge.

⁴ Anga a tukumuka Jihova u zuela kua Mozé, ni kua Alá, ni kua Midiiana, uixi; Zenu, kitatu kienu, bhu balaka ia kutakanena. Anga a tunda, aia bhu balaka, kitatu kiâ.

⁵ Jihova anga u tulukila mu philadi ia dituta, uimana bhu muelu ua balaka, anga uixana Alá ni Midiiana, anga a bhiẋila, emana, kiiadi kiâ.

⁶ Uixi: Ivenu maka mami; hé mudienu mu kala polofeta, eme Jihova ngi dʼidikiza kua muene mu kisukila, ngi mu zuelesela ku nzoji.

⁷ Ki kiene-phe ki ngi bhanga ni mubhikʼami Mozé; muene muthu uaiuka mu dibhata diami dioso.

⁸ Muene ngi zuela-nê kanu ni kanu, ki jimbuluka muene, ki ki kala ngó mu ifika; kidifua kia Jihova u ki mona; enu-phe mua kambela-hi uoma ua kuâmba mubhikʼami, kuamba Mozé?

⁹ Njinda ia Jihova, ia a kuatela, anga i uama: anga u tunda-bhu, uié.

¹⁰ Dituta anga di zangumuka ku thandu dia balaka; mu kutala-phe, Midiiana ua di bhange mukua dibhute, ua zele mukuâ ni kuzela kua neve; Alá uixi; sui, kua Midiiana, u mu mona uala kiá ni dibhute.

¹¹ Alá anga u zuela kua Mozé, uixi: Mozé tata! Ngana iami; kana ku tu tudika kituxi kiki ku thandu dietu, nga ku diondo, kuma tua bhange uoua, tua te kituxi.

¹² Nga ku diondo, ka kale mukuâ ni muthu ua fu kiá, ka kale kala muthu lelu-ke a mu vuala maji xitu iê ia diua kiá.

¹³ Mozé anga u di kola kua Jihova, uixi: Nzambi, mu sake, nga ku diondo.

¹⁴ Jihova anga u ambela Mozé, uixi: Se tatʼâ ngó ua mu ṗhamena mathe mu pholo, keju kala ni jisonhi mu sambuadi dia izuua? A mu tubhule bhu kibangu mu sambuadi dia izuua, o ki-bhua izuua a bokonedingi.

¹⁵ Midiiana anga a mu tubhhula bhu kibangu, u kala kididi kimoxi mu sambuadi dia izuua; kifuẋi-phe ka katuka luua ni kuenda, katé Midiiana kia mu bheka dingi bhu kibangu.

¹⁶ Kia zubha ku mu bheka, kifuẋi kiene kiua kia katuka bhu Hazelote, a ta kibangu mu kikangalakata kia Palane.