Dialuilu 11 - O Mikanda Ikola

Akua Izalaiele a kala mu longolola

¹ Kifuẋi anga ki kala mu longolola, a zuela ima iaiibha mu mátui ma Jihova; Jihova-phe kia kʼivu njinda i mu kuata; túbhia tua Jihova anga tu uama muʼaxaxi kâ, o bhua suku kilômbo, hé enda ni kuaúka.

² Kifuẋi anga ki di kola kua Mozé; Mozé anga u sambela Jihova; túbhia anga tu jima.

³ Kididi kiokio anga a kʼixana Tabeláhe mukonda dia túbhia tua Jihova tua uamene muʼaxaxi kâ.

⁴ Mbutu ia iá ahuku a di lungu mu kifuẋi anga a kala ni uilu uavulu; ni anʼa Izalaiele ene a kala mu dila, exi: Nanhi u tu bhana xitu ia kúdia?

⁵ Tuinda-phe jimbiji ji tua kexi kudia jinga mu Ijitu, ja ngoho; ni ixibua, ni jimelá, ni jipolo, ni sabhola, ni jaiu;

⁶ o kiki-phe, bhu xingu bhua tu kukuta! Ima ioso ia tu kambe, o ku mesuʼetu tua mono ngó o maná ienhiʼii, kuabhu!

⁷ Kuma o maná i difuangana kala mbutu ia jikuendulu, o ku mesu ila kala uasu ua bidéliu.

⁸ Athu anga a kala mu di muanga ni ku i nona, a i huha ku ditadi, mba a i zuka mu kinu, a i lamba mu jímbia, a i bhanga íkuanga; mu kanu uívua kala a i lungu ni maji a uisu.

⁹ O kia sonoka jinga dimume bhu kilômbo mu usuku, ni maná i sonokena ue kumoxi.

Mozé kimbamba ki mu nemena

¹⁰ Mozé anga uívua kifuẋi, iá dila, kala muthu ni dibhata diê, bhu kanga dia fundu iê; Jihova njinda ia mu kuata kiavulu; ni Mozé kia muʼibhila.

¹¹ Mozé anga u zuela kua Jihova, uixi: Mubhikʼé ua mu bhangela-hi kiki? Ihi kia ngi kambesa kusanga kiadi ku mesu mé, ki ua ngi tuika kimbamba kia kifuẋi kioso kiki ku thandu diami?

¹² Kifuẋi kiosuʼiki eme nga emita? Eme nga a vuala? Ki ua ngi tumuʼiki, uixi: A ambate bhu jihata kala kiledi, kífua mona hanji uala mu kuâmua, katé kia bhiẋila mʼoxi i ua lokela o jitata jâ?

¹³ Eme xitu ngi i sanga kuebhi ia kubhana kifuẋi kiosuʼiki? Kuma ala ku ngi didila, exi: Tu bhane xitu, tu die.

¹⁴ Nga ki lémbua kuambata kifuẋi kioso kiki ubheka uami, kimbamba kiê kiavulu!

¹⁵ Hé kiene ki u ngi bhanga, ngi jibhe kiá, nga ku diondo, se nga sange kiadi ku mesu mé; ki ngi kale ngó ni ku ngi tatesa kiki!

Nzambi u sola adiakimi, makuinhi sambuadi a muthu, a kale mu kuatekesa Mozé

¹⁶ Jihova anga u ambela Mozé, uixi: Ngi sotele makuinhi sambuadi a muthu ku adiakime a Izalaiele, oso ua ejiia kuma adiakime ku kifuẋi ni jifixiiadi jâ, u a bheka bhu muelu ua balaka ia kutakanena, emana-bhu bhu mbandu ié.

¹⁷ Eme ngi tuluka, ngi ku zuelesa bhenhobho; ngi katula ku Nzumbi iala ku thandu dié, ngi ta ku thandu diâ-ene; ene ue ambate-ku ku kimbamba, ki ki kale kia ubheka ué.

¹⁸ Kifuẋi-phe a ambele: Di bônzienu phala o kizuua kia mungu, mua-nda kúdia xitu; kuma mua didila mu mátui ma Jihova, muixi: Nanhi u tu bhana xitu ia kúdia? Muixi: Inda mu Ijitu tua bhandulukile; Jihova-phe ua-nda ku mi bhana xitu, i mu dia.

¹⁹ Ki mu i di ngó kizuua kimoxi, mba izuua iiadi, mba izuua itanu, mba kuinhi dia kizuua, mba makuinhi aiadi a kizuua;

²⁰ mu i dia mu mbeji ia muvimba katé xitu i mi tundila mu mazulu, i mi bhekela fôkoso; mukonda Jihova mua mu tènde uala muʼaxaxi kenu, mua mu didila, muixi: Phalahi ua tu katula mu Ijitu?

²¹ Kuala Mozé: Athu ngala-nâ a tena hama jisamanu ja jimidi, o makuenze ngó enda bhoxi; eie ua zuela, uixi: Eme ngʼa bhana xitu, nʼa i di mu mbeji ia muvimba!

²² Kifua ua jibhila ilunga ia jimbudi ni ibhanga ia jingombe, ia a soka? Inga a a bhongoluela jimbiji joso muʼalunga phala ekute?

²³ Jihova anga u ambela Mozé, uixi: Eie ua fika lukuaku lua Jihova lua di koteka? Ua-nda mona se kizuelu kiami ki ku bhita, mba kana.

²⁴ Mozé anga u tunda, u tangela kifuẋi maka oso a Jihova; anga u bhongolola makuinhi sambuadi a muthu, adiakimi ku kifuẋi, u a ta mu jimbandu ja balaka.

²⁵ Jihova anga u tuluka mu dituta, u kala mu ku mu zuelesa, anga u katula ku Nzumbi iala ku thandu dia muene, u ta ku adiakimi, makuinhi sambuadi a muthu; anga ki bhita kuma kia tula Nzumbi ku thandu diâ, a kuata kuzambula ni uanji ua upolofeta, maji kithangana ngó bhenhobho, ka ki tona dingi.

²⁶ Bhu kilômbo-phe bhua xala kiiadi, iú dijina dié Eledade, iú dijina diê Medade; Nzumbi anga ia tula ku thandu; ene-phe a a soneka, maji a kambe kubhiẋila ni akuâ bhu balaka; anga a kala mu zuela ue ni uanji ua upolofeta, bhene bhu kilômbo bhuala.

²⁷ Anga bhu tunda munzangala, uiza u tudila Mozé, uixi: Ni Eledade ni Medade iá zuela bhu kilômbo ni uanji ua upolofeta.

²⁸ Josuué dia Nune, mukuenze ua Mozé ua mu sola tundé mu undenge, anga u kumuna, uixi: Muadi Mozé, a kidike.

²⁹ Mozé-phe, uixi: Uala ni dixinga mukonda diami eme? Eme nginda kifuẋi kioso kia Jihova a kale jipolofeta, Jihova nʼa te Nzumbi iê ku thandu diâ.

³⁰ Mozé anga u vutuka bhu kilômbo, ni muene ni adiakimi a Izalaiele.

Jihova u tumikisa o tungumbe

³¹ Anga ku tunda kitembu kua Jihova, ki tunda muʼalunga ni kubheka tungumbe, tua lalumukina mu jimbandu ja kilômbo, bhu tua suku kuku uenda kumbi dia kambàmba, bhu tua suku kuku ue kiene kimoxi, tua kondoloka kilômbo kioso, mu kitala kia kôvadu jiiadi tundé bhoxi.

³² Athu anga a balumuka, kizuua kiosuʼokio ni usuku uê, ni kizuua kiê kia mungu, a kuata kubhongolola o tungumbe; uoso uala ndenge mu kukuata, kuinhi dia homele ki di kambe kutena; anga a tu aneka mbandu joso ja kilômbo.

³³ Kioso-phe ki ala hanji ku tu dia, kiluua ngó o xitu ibhua ku mazu, njinda ia Jihova i uama mu kubhesa kaxtiku ku kifuẋi, Jihova anga u a buidisa ni dibhebhu dia dikota.

³⁴ Kididi kienhókio anga a kʼixana Kiboloto-hatava, mukonda bhene bhua fundu akua uilu uavulu.

³⁵ Kutunda bhu Kiboloto-hatava kifuẋi kienda anga a tula bhu Hazelote; anga a bhanga izuua bhu Hazelote.