Dialuilu 10 - O Mikanda Ikola

Jikoloneta jiiadi ja phalata

¹ Jihova anga u ambela dingi Mozé, uixi:

² Iudika koloneta jiiadi ja phalata, u ji iudika ni ufunu ua kusula; ji kale ja kuxika mu kuixana kilômbo, ni kuxia kibangu mu kuenda,

³ Ki u ji xika, kilômbo kioso ki bhongoloka kokué, bhu muelu ua balaka ia kutakanena.

⁴ Se u xika ngó imoxi, kiókio o ilamba ngó iiza, adiakimi ku jimidi ja Izalaiele ene a bhongoloka kokué.

⁵ Ki u xika nguzu, dízui dia kukatuka, ibangu iala ku mbandu ia thunda, ene a dianga kusuluka.

⁶ Ki u xika dingi, dízui dia kukatuka, ibangu iala ku mbandu ia sulu, ene a katuka; a xika dízui dia kukatuka phala ibangu iende ni kusuluka.

⁷ O ki uandala kilômbo ki bhongoloka, u xika dízui diengi, ku xike dia kukatuka.

⁸ Anʼa Alá, jinganga, ene a xika jikoloneta; ki kala kijila kienu mu miji ienu ioso.

⁹ O ki ki bhinga kuia ku ita mʼoxi ienu, mukonda dia nguma ueza ku mi bhondeleka, kienʼokio ue ni jikoloneta mu ji xika dízui dia suina, phala a mi lembalale bhu pholo ia Jihova, Nzambi ienu, ni a mi kudile ku jinguma.

¹⁰ Kizuua ue kia kusanguluka, ni izomba ienu ia mi xindi, ni ki thethama mbeji, mu xika ue jikoloneta ku thandu dia jisata jenu ja kuoha, ni jisata jenu ja matululuku; ji kale ja ku mi lembalesa Nzambi: Kuma eme Jihova Nzambi ienu.

Anʼa Izalaiele a katuka bhu mulundu ua Sinai

¹¹ Mu kukala-phe, muvu ua kaiadi, bhu mbeji ia kaiadi, kizuua kiê kia makuinhi aiadi, dituta di zangumuka ku balaka ia umbangi.

¹² Anʼa Izalaiele anga a katuka mu kikangalakata kia Sinai, enda ku kibuka-kibuka, katé dituta dia tula mu kikangalakata kia Palane.

¹³ Kienhiki andeka kusuluka mu kuenda kuâ kala kia tumu Jihova kua Mozé.

¹⁴ Kua tuamena ku katuka mvela ia Kibangu kia anʼa Juda ni ilombo iê, ua a kala ku pholo, Nasono dia Aminadaba.

¹⁵ O kilômbo kia muiji ua anʼa Isakale, ua ki kala ku pholo, Netanaiele dia Zuuale.

¹⁶ O kilômbo kia muiji ua Nzebulone, ua ki kala ku pholo, Eliiaba dia Helone.

¹⁷ Balaka anga a i sokomona; anʼa Ngelexone ni anʼa Meladi, akua ku i ambata, a i zangula, hé a katuka.

¹⁸ Anga ku kaiela o mvela ia kibangu kia anʼa Lubene, ni ilombo ié; kilômbo kiki ua ki kala ku pholo, Elizule dia Xedele.

¹⁹ O kilômbo kia muiji ua anʼa Ximinhá, ua ki kala ku pholo, Xelumiiele dia Nzudixadai.

²⁰ O kilômbo kia muiji ua anʼa Ngade, ua ki kala ku pholo Eliiazafu dia Deuele.

²¹ Bhenhobho, anʼa Kohate ambata imbamba ia dibhezelu, a suluka; a tuamena ni balaka, o iá, mu kutula, a sanga a i imika kiá.

²² Anga ku kaiela mvela ia kibangu kia anʼa Ifalaime, ni ilombo iê; kilômbo kiki ua ki kala ku pholo Elixama dia Amihudi.

²³ O kilômbo kia muiji ua anʼ a Manasa, ua ki kala ku pholo, Ngamadiiele dia Pedazule.

²⁴ O kilômbo kia muiji ua anʼa Bejamí, ua ki kala ku pholo, Abidani dia Ngidiione.

²⁵ Mvela ia kibangu kia anʼa Dane anga i katuka kiua, ene kiá a sukinina ku ibangu ioso, anga a suluka ni ilombo iê; kilombo kiki ua ki kala ku pholo, Ahiiezele dia Amixadai.

²⁶ O kilômbo kia muiji ua anʼa Asele, ua ki kala ku pholo, Pajiiele dia Okolane.

²⁷ O kilômbo kia muiji ua anʼa Nafitali, ua ki kala ku pholo, Ahila dia Inane.

²⁸ Kiene kiende anʼa Izalaielʼiki mu ilômbo-ilômbo; ki a katuka jinga.

Mozé u bhinga Hobabe kuma tuile kumoxi

²⁹ Mozé anga u ambela Hobabe monʼa Leuele mukua Midiiane, ukouakime ua Mozé, uixi: Tuala mu njila ia kuia ku kididi kia tu ambela Jihova, kuma: Ngi mi bhana-kiu; zá tuile kumoxi, tu ku bhange mbote; kuma Jihova ua tange kubhanga mbote kua Izalaiele.

³⁰ Muene-phe u mu ambela, uixi, ki ngiii-ku; inda ngiie kʼoxi ietu etuʼene ni ku jindandau jetu.

³¹ Kuala muene: Kana ku tu xia, nga ku diondo; mukonda eie muene uejiia ididi iauabha kuta ibangu mu kikangalakatʼumu, u tu kale kala u mesuʼetu.

³² O ki uila uia ni etu ki kala muene kuma mbote ioso ia kà tu bhanga Jihova, iene ue i tu ku bhanga eie.

³³ Anga a katuka bhu mulundu ua Jihova, enda dikanga dia izuua itatu; álaka ia kikutu kia Jihova anga ia tuamena ku pholo dikanga dia izuua itatu, mu ku a sotela kididi bhuoso bhua nhohena.

³⁴ Dituta dia Jihova anga di kala ku thandu diâ mu muanha, kia katuka bhu kibangu.

³⁵ Kioso-phe ki katuka álaka, Mozé u zuela, uixi: Zanguka, u Jihova, jinguma jé, u ji muanganese; oso a ku zembe ua bhese lusolo.

³⁶ O kia i tula, uila uixi: Vutuka, u Jihova, u tunge ni jimidi ni makuinhi a jimidi ja Izalaiele.