Dialuilu 1 - O Mikanda Ikola

Nzambi u tuma Mozé kualula anʼa Izalaiele

¹ Jihova anga u zuelesa Mozé, mu kikangalakata kia Sinai, mu balaka ia kutakanena, kizuua kia kamoxi bhu mbeji ia kaiadi, mu muvu ua kaiadi tundé kia tundu mʼoxi ia Ijitu, uixi:

² Alula kilombo kioso kia anʼa Izalaiele, mu madiembu mâ, mu mabhata ma jitata jâ, u a soneke majina mâ, mala oso ua alula ku mítue-mítue,

³ oso a bhiẋila mu makuinhi aiadi a muvu, mba a somboka-mu kiá, makuenze oso a Izalaiele a tena kuia ku ita, ni eie ni Alá mu a alula mu ibhuka iâ.

⁴ Ku muiji ni muiji ue, ku tunde muthu a kale mútue ua dibhata dia jitata jê, phala a kale nʼenu.

⁵ Enhá-phe ene o majina ma athu u muʼimana-nâ. Kua Lubene: Elizule, monʼa Xedele.

⁶ Kua Ximinhá: Xelumiiele, monʼa Nzudixadai.

⁷ Kua Juda: Nasono, monʼa Aminadaba.

⁸ Kua Isakale: Netanaiele, monʼa Zuuale.

⁹ Kua Nzebulone: Eliiaba, monʼa Helone.

¹⁰ Ku anʼa Zuze, kua Ifalaíme: Elixama, monʼa Amihudi. Kua Manasa: Ngamadiiele, monʼa Pedazule.

¹¹ Kua Bejamí: Abidani, monʼa Ngidiione.

¹² Kua Dane: Ahiiezele, monʼa Amixadai.

¹³ Kua Asele: Pajiiele, monʼa Okolane.

¹⁴ Kua Ngade: Eliiazafu, monʼa Deuele.

¹⁵ Kua Nafitali: Ahila, monʼa Inane.

¹⁶ Enhá a a tungula mu kilômbo, ilamba ku mabhata ma jitata jâ; ene mítue ia jimidi ja Izalaiele.

¹⁷ Mozé ni Alá anga a kuata mala enhá, a a tumbula ku majina.

¹⁸ Anga a bhongolola kilômbo kioso, a di tanga mísala iâ, mu kuvuadiua kuâ, mu mabhata ma jitata jâ, a di soneka majina, oso a bhiẋila mu makuinhi aiadi a muvu, mba a somboka-mu kiá, anga a alula mútue ni mútue, mu kizuua kia dianga ku mbeje ia kaiadi.

¹⁹ Kala kioso kia tumu Jihova kua Mozé. Kiene kia alula mu kikangalakata kia Sinai.

²⁰ Anʼa Lubene, monʼa Izalaiele ua phande-kumbi, miji iâ, mu kuvuadiua kuâ ni mabhata ma jitata jâ, ku majina-majina, ku a alula ku mútue-mútue, mala a bhiẋila mu makuinhi aiadi a muvu, mba a somboka-mu kiá, makuenze oso a tena kuia ku ita,

²¹ a alula ku muiji ua Lubene, makuinhi auana a midi, ni midi jisamanu, ni hama jitanu.

²² Anʼa Ximinhá, miji iâ mu kuvuadiua kuâ ni mabhata ma jitata jâ, ku majina-majina, a a xindi ku mítue-mítue, mala a bhikila mu makuinhi aiadi a muvu, mba a somboka-mu kiá, makuenze oso a tena kuia ku ita,

²³ a a soneka ku muiji ua Ximinhá, makuinhi atanu a midi, ni divua dia midi, ni hama jitatu.

²⁴ Anʼa Ngade, miji iâ mu kuvuadiua kuâ ni mu mabhata ma jitata jâ, ku majina-majina ku a xinda mútue ni mútue, mala a bhikila mu makuinhi aiadi a muvu, mba a somboka-mu kiá, makuenze oso a tena kuia ku ita,

²⁵ a a soneka ku muiji ua Ngade, makuinhi auana a midi ni midi jitanu, ni hama jisamanu, ni makuinhi atanu.

²⁶ Anʼa Juda, miji iâ mu kuvuadiua kuâ ni mu mabhata ma jitata jâ, ku majina-majina ku a alula ku mútue-mútue, mala a bhikila mu makuinhi aiadi a muvu, mba a somboka-mu kiá, makuenze oso a tena kuia ku ita,

²⁷ a a soneka ku muiji ua Juda, makuinhi sambuadi a midi ni midi jiuana ni hama jisamanu.

²⁸ Anʼa Isakale, miji iâ mu kuvuadiua kuâ ni mabhata ma jitata jâ, ku majina-majina ku a xinda mítue, mala a bhikila mu makuinhi aiadi a muvu, mba a somboka-mu kiá, makuenze oso a tena kuia ku ita,

²⁹ a a soneka ku muiji ua Isakale, makuinhi atanu a midi, ni midi jiuana, ni hama jiuana.

³⁰ Anʼa Nzebulone, miji iâ mu kuvuadiua kuâ ni mabhata ma jitata jâ, ku majina-majina ku a xinda mítue, mala a bhikila mu makuinhi aiadi a muvu, mba a somboka-mu kiá, makuenze oso a tena kuia ku ita,

³¹ a a soneka ku muiji ua Nzebulone, makuinhi atanu a midi, ni sambuadi dia midi ni hama jiuana.

³² Anʼa Zuze, moxi ku anʼa Ifalaimi, miji iâ mu kuvuadiua kuâ ni mabhata ma jitata jâ, ku majina-majina ku a xinda mítue, mala a bhikila mu makuinhi aiadi a muvu, mba a somboka-mu kiá, makuenze oso a tena kuia ku ita,

³³ a a soneka ku muiji ua Ifalaíme, makuinhi auana a midi, ni hama jitanu.

³⁴ Anʼa Manasa, miji iâ mu kuvuadiua kuâ ni mabhata ma jitata jâ, ku majina-majina ku a xinda mítue, mala a bhikila mu makuinhi aiadi a muvu, mba a somboka-mu kiá, makuenze oso a tena kuia ku ita,

³⁵ a a soneka ku muiji ua Manasa, makuinhi atatu a midi, ni midi jiiadi, ni hama jiiadi.

³⁶ Anʼa Bejamí, miji iâ mu kuvuadiua kuâ ni mabhata ma jitata jâ, ku majina-majina ku a xinda mítue, mala a bhikila mu makuinhi aiadi a muvu, mba a somboka-mu kiá, makuenze a tena kuia ku ita,

³⁷ a a soneka ku muiji ua Bejamí, makuinhi atatu a midi, ni midi jitanu, ni hama jiuana.

³⁸ Anʼa Dane, miji iâ mu kuvuadiua kuâ ni mabhata ma jitata jâ, ku majina-majina ku a xinda mítue, mala a bhikila mu makuinhi aiadi a muvu, mba a somboka-mu kiá, makuenze a tena kuia ku ita,

³⁹ a a soneka ku muiji ua Dane, makuinhi asamanu a midi, ni midi jiiadi, ni hama sambuadi.

⁴⁰ Anʼa Asele, miji iâ mu kuvuadiua kuâ ni mabhata ma jitata jâ, ku majina-majina ku a xinda mítue, mala a bhikila mu makuinhi aiadi a muvu, mba a somboka-mu kiá, makuenze a tena kuia ku ita,

⁴¹ a a soneka ku muiji ua Asele, makuinhi auana a midi, ni midi imoxi, ni hama jitanu.

⁴² Anʼa Nafitali, miji iâ mu kuvuadiua kuâ ni mabhata ma jitata jâ, ku majina-majina ku alula mítue, mala a bhikila mu makuinhi aiadi a muvu, mba a somboka-mu kiá, makuenze a tena kuia ku ita,

⁴³ a a soneka ku muiji ua Nafitali, makuinhi atanu a midi, ni midi jitatu, ni hama jiuana.

⁴⁴ Enʼiá a alula kuala Mozé ni Alá kumoxi ni ilamba ia Izalaiele, kuinhi dia muthu ni kiiadi, kala muthu uala ku pholo ia dibhata dia jitata jê.

⁴⁵ Kala kiki ene oso a a soneka ku anʼa Izalaiele, ku mabhata ma jitata jâ, mala oso a bhiẋila mu makuinhi aiadi a muvu, mba a somboka-mu kiá, makuenze oso mua Izalaiele a tena kuia ku ita,

⁴⁶ dialuilu dia ene oso a a soneka, a tena hama jisamanu ja midi, ni midi jitatu, ni hama jitanu, ni makuinhi atanu.

Akua Levi ka a te mu dialuilu

⁴⁷ Anʼa Levi-phe, mu muiji ua jitata jâ, ka a te-mu kioso ki alula.

⁴⁸ Kuma Jihova ua ambela Mozé, uixi:

⁴⁹ Muiji ua Levi kana ngó ku a ta mu dialuilu, kana ku a xinda kumoxi ni anʼa Izalaiele;

⁵⁰ akua Levi-phe u a tungula, a kuate kulanga balaka ia umbangi, ni itutu iê ioso ni ima ioso ia tokala-ku; ene ambata o balaka ni itutu iê ioso; ene a i kalakela, mu ta kibangu ene a bhaka balaka mu kaẋi.

⁵¹ O balaka né ia bhingi kuenda, ene akua Levi a i sokomona; o bhua bhingi ku imika dingi, ene akua Levi a i sokeka; hé bhueza muthu uengi ki kale a mu jibha.

⁵² Anʼa Izalaiele mu kutula, a tule kala muthu mu kibangu kiê mua tokala, kala muthu bhu bandela ia kibuka kiê.

⁵³ Akua Levi-phe kibangu kiâ ki kondoloka, ki bhaka o balaka ia umbangi mu kaẋi, mbebhu ki ku kale njinda ku thandu dia kilômbo kia anʼa Izalaiele; kienhiki, akua Levi ene a kala ni muanu ua kulanga balaka ia umbangi.

⁵⁴ Anʼa Izalaiele anga a bhanga kienhiki; kioso kia tumu Jihova kua Mozé, kiene muene kia bhange.