Daniiele 7 - O Mikanda Ikola

Kisuma kia iama iuana ia kijingano

¹ Mu muvu ua dianga ua utuminu ua Belxazale, sobha ia Babilónia, Daniiele ua diuanene isuma ku nzoji, kia zeka kiki bhu hama iê, anga u soneka nzoji ienhi ii; muʼanzanza muénhomo, u tanga ima ioso ia mono.

² Daniiele uambe, uixi: Mu kisuma kia usuku nga muene, itembu iuana ia diulu iakexe kúlua ita ku musanza uonene.

³ Mu musanza anga mu tomboka iama i uana iònene, kala kiama ni kidifua kiê, sé ngó ku di-fangana ni iama ia mukuâ.

⁴ Kiama kia dianga mukuâ ni hoje, anga kikala ni mabhabha ma holokoko; eme-phe ngi kuata kukengelela, katé kia ki tukula o mabhabha, anga a ki bhana o kubhetuka ku mavu, ni kuimana nzànza kala muthu, anga a ki bhana muẋima ua muthu.

⁵ Ngi kuata kutala, talesa, kumoneka kiama kia kaiadi, kia di-fu ni ursu, kia bhetuka mbandu imoxi, o ku maju kiazenzeka jimbanji jitatu, iá a ki ambela, exi: Balumuka, kokota xitu ia nzungule.

⁶ O ki kiabhiti, ngi kuata dingi kukengelela, talesa, kua moneka kiama kiamukuâ kia di-fu ingo, o ku kunda diê kuala mabhabha mauana ma kinjila; o kiama kienhiki kia kexe ni mítue iuana, anga a ki bhana kutumina.

⁷ O kia bhiti kiki, ngi kuata kukengelela, mu isuma ia usuku, kua moneka dingi kiama kia kauana, kikôla, ki kuatesa uôma, o kusuína kuvula, ki kala ni imaju ia felu, o mu kúdia kisukununa, o ku mvunda kisasujula jinga ngó, kioso kima kia subhuka u ki titidila bhoxi ni inama iê; o ku iama ia dianga ioio, kiene kia di-tungula-ku muene, kiala ni kuinhi dia lumbinga.

⁸ O ki nga kuata kutongolola jimbinga, talesa, kua fuafue dingi kalumbinga kòfele muʼaxaxi ka jimbingʼeji; o ku jimbinga ja dianga kua vuzuka jitatu phala kuehela kididi mbé o kalumbinga koka. Talesa o kalumbinga kenhaka kakexe ni mesu kala mesu a muthu, ni dikanu, di kuata kuzuela ni izala ioso!

⁹ Eme nga kexe-phe mu kukengelela, katé kia bheka iandu, a i tula, anga Mukulu-ua-Ndamba uxikama. O kizuatu kiê kizela kala neve, o kindemba ku mútue uê kala lâ iazele kiambote; kiandu kiê milengo ia túbhia, o malola mê túbhia tua muzukuta.

¹⁰ Bhu pholo iê bhu kunguluka ngiji ia túbhia. Jimidi ja jimidi ja kuata ku mu xibhidila, jifuku ni jifuku jemana bhu pholo iê. Kufundisa kueza-bhu, madivulu a ma jikula.

¹¹ Mukonda-phe dia izuelu ia izala ia kuata kuzuela o kalumbingʼaka, eme nga kexe ku kengelela; mu kutala ni kutala ngi mona kiama a ki jibha, o kimbi kiê a ki sasala, iá a ki bhana phala ku ki oha mu túbhia.

¹² O iama iamukua ioio, a i tambula ungana; hanji-phe, a i bhana kulaia katé bhu thembu ioso iatokala.

¹³ Talesa, eme-phe ki nga kuata muene kutala, mu isuma iami ia usuku, nga mono ku matuta ma diulu kua-lu tuluka kala Monʼa muthu ua mu kuiza; iú ua bhiẋi la kua Mukula-ua-Ndamba, anga a mu bhiẋidisa bhu pholo iê.

¹⁴ Anga a mu bhana o kutumina, ni kijingo, ni ungana, phala miji ioso, ni ifuẋi, ni madimi moso ende ni ku mu bhikila muene. O kutumina kuê kua miaka, ku kuene dizubhilu, o ungana uê uene ngó, ka tena ku u bhuisa-ku.

¹⁵ Eme-phe, ngi Daniiele, muenhu uami moxi a mukutu ua ngi iokojoka, nga bhuuama ni isuma ia ngi bhiti mu kilunji, kuma ia ngi diuanesa.

¹⁶ Anga ngi zukama ku umoxi kua iá emana-bhu, mbé a ngi tetuluile o kidi kioso ku imʼiii. Muene iú ua ngi tangela-iu, iu uangʼijidisa o dijimbuluilu dia ima ioso ienhiʼii, uixi:

¹⁷ O iama ia makota iii, ki iedi iala iuana, kífua jisobha jiuana ja kà balumuka kulu dia mundu.

¹⁸ Maji o athuʼê angene a Suke-ku, ene a kà tambula ungana, anga a u vua kiá muene katé ku hádia ni hádia.

¹⁹ Bhenhobho eme nginda kuijiia kidi bhu kaxi ni kiama kia kauana kia di tungula mu akuá oso, kiamangongo ki kuatesa uôma, kiedi ni imaju ia felu ni iala ia utadi; kienda ni kuhabujula ni kusasajala anga ki titidila ni inama iê o ima ioso ia subhuka.

²⁰ Kua di-te dingi o kuinhi dia lumbinga ja mu kala mu mútue, ni kalumbinga kamukuâ ka fuafue, anga bhu pholo iê bhu vumbuka mbinga jitatu, o kene anga kakala ni mesu, hé kakala ni dikanu di tanga ima ia izala, kifua muene ua tundu akuâ.

²¹ O ki nga kuata kukengelela, ngi mona-phe kuma kalumbinga kenhaka ka kuata kúlua ita ni athuʼê angene akôla a Nzambi, hé uia ni ku a tolola.

²² Katé kia bhixila Mukulu-ua-Ndamba, anga o kufundisa a ku bhana bhu maku ma athuʼê angene a Suke-ku; anga Kithangana kiza-bhu kia athuʼê angene kutambula utuminu.

²³ Muene anga uamba kiki: Kiama kia kauana kiokio uene o utuminu ua kauana ua-nda kukala mu ngongo, uanda ku di-tungula ku ma-utuminu mamukuâ; uene ua kà minha oxi ioso, oxi ioso ua kâ i titidila muene ni inama iê, anga u i bhanga isasu-isasu.

²⁴ O kuinhi dia lumbinga-phe diodio, kifua mu utuminu umoxi uenhó mua ka balumuka kuinhi dia jisobha; maji o kia kà zubha kubalumuka, kua kà balumuka dingi mukuâ; o muenhú ua kà di tungula mu akuâ oso a diangele, o muene ua kà tolola-bhu jisobha jitatu.

²⁵ Muene-phe ua kà tanga isunji, mu kulebhula Suke-ku, ua kà buikisa athuʼê angene akôla a Suke-ku, mu kubhindamena kulungulula o jithembu ni kitumu; o athuʼê angene a Jihova a kà a bhakula bhu lukualu luê katé ki tenena o thembu, ni jithembu, ni kaxaxi ka thembu.

²⁶ Maji o kufundisa-phe bhene bhu ku kala, anga ene a mu tambula o ungana uenhó phala ku u jikinisa ni ku u jima o mbutu katé bhu disukilu.

²⁷ O utuminu-phe ni ungana, ni ulâmba ua ma-usobha moso, mene bhoxi dia diuluʼabha, a kà u bhakuila o athuʼê angene a Ió ua Suka-ku ku Ukota; o utuminu uâ ene-phe ua kà nangenena, ma-utuminu moso ma kà a bhikila ene, ni ku a beleselela.

²⁸ Bhua suku o kisumaʼabha. Maji eme, ngi Daniiele, ilunji iami ia ngi juualele, katé ni pholo ia ngi kitukile muene; inda ima ioso iii nga i lundu muene ku muẋima uami.