Daniiele 6 - O Mikanda Ikola

Daniiele a mu takula mu ngenda ia jihoje

¹ Anga ki uabhela Ndala ku tungula hama ni makuinhi aiadi a mavunda phala a tambule konda ia utuminu uoso.

² O ku thandu dia enhá iú uatudika-ku ilâmba itatu, umoxi-ku Daniiele, phala mavunda oso enda ni kubhana jikonda kua enhá, phale sobha ka mu nganale.

³ Daniiele anga u di tungula, mu axaxi ka mavunda ni ilâmba; mukonda mua muene mua kexe muẋima uabeta ujitu; Sobha-phe hé ukala mu kuxinganeka ku mu xikika ku thandu dia utuminu uoso.

⁴ Kienhiki ni mavunda ni ilamba akuata ku sota kithangana kia kukuata Daniiele ni kikuma ku utuminu uenhó, phala a mu kundûle; maji kikuma ni mulonga a ki tokoka; mbata muene uakexe fiiele, uendelu uê ki u moneka kisému, mba mulonga.

⁵ Exi: Daniiele iú kana, ki tua-nda kutena ku mu kuata ni kikuma kia kima, kikale tu mu kuatela ku kitumu kia Nzambi iê.

⁶ Bhenhobho ni mavunda ni ilâmba aia kua sobha, anga a mu ambela kiki: Muenexi Ndala, kola muenhu, ki uabhe!

⁷ Ilâmba ioso ia utuminu ué, ni jinguvulu jaʼxi, ni mavunda, ni ilôlo, ni makota, a di-kundu bhuamoxi phala ku sonekesa ngonge ia nganʼetu muenexi, anga i di-bhanga kijila kia kôlo; kuma mu makuinhi atatu a izuua, muthu uoso u bhinga kima kua Nzambi ioso-ioso mba ku muthu uengi ko kué, muenexi, kana, a mu takule mu ngenda ia jihoje.

⁸ Kiki-phe, muenexi xikisa ngonge, u te dijina dié ku mukanda ua ngonge, phala ki bhu kala dingi ku i lungulula, kala kioso kia kôlo o kitumu kia Mediia ni kia Pélesa, ki ki xikina ku ki lungulula.

⁹ Sobha Ndala-phe, mukonda dia kienhiki ua di-sinala o mukanda ua ngonge ni editale.

¹⁰ Daniiele-phe kievu kuila sobha ua di-sinala o mukanda, ua bokona mʼonzo iê, hé uia mu xilu muala jinjanela jaʼnzo iê ja jikuka ja lungu ku Jeluzaleme; a-nga ufukama ku jiphuna jê lutatu ku kizuua, usamba, usakidila bhu pholo ia Nzambi iê, kala kiene o kifua kiê tunde ukulu.

¹¹ Athu a bhongoloka anga aia kumoxi, a sanga Daniiele, iú samba, uala kudionda bhu pholo ia Nzambi iê.

¹² A katuka, a tudila sobha, exi: Abha eie kua di-sinala editale iná mu kuamba, athu oso kikale a bhingila ngó bhu pholo ié-eie, mu makuinhi atatu a izuua oso-á, o ki bhu kala muthu uoso usambela Nzambi iengi, mba muthu uengi, kikale a mu takula mu ngenda ia jihoje? Sobha-phe ukumbulula, uixi: O ngonge ia kidi muene, kioso kia kôlo o kitumu kia Mediia ni kia Pélesa kiene kimoxi, o ku i lungulula ki i ẋikina, lémbue.

¹³ Ene-phe a kumbulula, ambela sobha, exi: O Daniiele-phe ua tokala ku kikuka kia tundile ku Juda, ka ku suu sobha, tata, ni ngonge i ua di-soneka eie, muene nguê na-iu, u mu sanga u samba lutatu ku kizuua.

¹⁴ Sobha-phe kia zubha kuívua maka iá, kia mu bhana dilamba, anga, ku muẋima uê, ukana kukudila Daniiele; iu ua tutumba muene katé bhua fuila dikumbi, mbé kubhângela Daniiele phala ku mu bhulula.

¹⁵ Athu ió-phe anga aia dingi kumoxi kua Muenexi hé a mu ambela, exi: Eie muenexi, uejiia kiambote kuma mu kitumu kia Mediia ni Pelélesa, editale mba ngonge ia muenexi, ka tena ku i lungulula.

¹⁶ Sobha anga u tuma kutakana Daniiele, iá a mu takula mu ngenda ia jihoje. Sobha kia kuata kuzuela, uambela Daniiele, uixi: Nzambi ié, ió uoso uene mu ku mu bheza mu ithangana ioso, muene ua-nda ku ku kudila.

¹⁷ Anga a bheka-bhu ditadi, hé a di kundumuina ku muelu ua ngenda, a jika-ku; o sobha hé u di jika kidimbu kia nela iê, ni kia nela ia jitata jê, phala Sendesa ia Daniiele ki bhu kale muthu u i lungulula.

¹⁸ Sobha ua bokona mu dizêmba diê, anga usuku uoso u u bhita sé ngó kúdia kima, kʼehela ku mu xikila jimujika bhu pholo iê; o kilu mu mesu kia mu lenge.

¹⁹ Mu kimene-mene kia kalaji muná, sobha ubalumuka, uia lusolo ku muelu ua ngenda ia jihoje.

²⁰ O kia bhixila bhu ngenda, uixana Daniiele ni dízui dia dilamba, sobha hé uzuelesa Daniiele, uixi: Daniiele, selevende ia Nzambi ia muenhu! O kuila Nzambi ié, ua mu bhikila jinga mu ithangana ioso, ua tena ku ku kudila ku jihoje?

²¹ Daniiele-phe uambela sobha, uixi: Eué, sobha, kola muenhu ki uabhe!

²² Nzambi iami uatumina anjo iê, iú uajika o makanu ma jihoje, phala ki ji ngi kuame mukonda bhu pholo iê ka ngi sange ni kikuma; né-mbe ko kuê, sobha, eme ki nga ku te kituxi kia kima.

²³ Bhenhobho sobha anga u tana kiavulu ni muẋima uê, iú ua tumu kuila a zaúle Daniiele, mu ngenda; kana-phe kiẋenge kia kima kia mu sange na-kiu, mukonda uaxikanene kua Nzambi iê.

²⁴ Sobha-phe u tuma ue kutakana mala ió oso a kunduile Daniiele, anga eza na-u, hé a a takula ue mu ngenda ia jihoje, ni ene, ni anʼâ, ni akajiʼâ. Mu ngenda-phe ka tula-mu luua bhoxi, jihoje ja a kambuila kiá bhulu bhene, anga ji a sasala ifuba.

²⁵ Kienhiki sobha Ndala u sonekena miji ioso, ni ifuẋi ni athu akua madimi moso ma tunga kulu dia mundu kuila: O paze i mi vudile.

²⁶ Eme nga bhana ngonge, kuila, oso a tokala mu jixi ja usobha uami, ende ni kuteketa ni kuxila o Nzambi ia Daniiele; mbata muene o Nzambi ia muenhu u xialelà-ku, o utuminu uê kene ku u jima, o ungana uê ua kalʼê katé ku dizubhilu.

²⁷ Muene ukudila, u bhulula! u bhanga isunji ni madiuanu ni bhulu ni bhoxi! Muene ngó, ua kudila Daniiele ku uhamenu ua nguzu ia jihoje.

²⁸ Daniiele-phe muenhú ua nakina muene ni kubhanduluka, mu utuminu ua Ndala ni mu utuminu ua Silo, mukua Pélesa.