Daniiele 5 - O Mikanda Ikola

Fesa ia sobha Belxazale. Lukuaku lua kisuma

¹ Sobha Belxazale u bhanga fesa phala midi ia ilâmba iê, muene anga unua vinhu bhu pholo ia ilâmbe iê ienhiʼii.

² Kioso kia kodiua kiá ni vinhu, Belxazale utuma kutakana itutu ioso ia ulu ni ia phalata, iabhundile tatʼâ Nabukodonozolo mu tembulu ku Jeluzaleme, phala sobha, ni ilâmba iê, ni akajiʼê, ni akamʼê, muene mu a nuina.

³ Anga a bheka o itutu ia ulu ia nhanene mu tembulu iaʼnzo ia Nzambi ia kexe mu Jeluzaleme; sobha, ni ilâmba iê, ni akaji ê, ni akamʼê, muene-muène mu a nuina.

⁴ Ene edi anua o vinhu, a di te mu fumanesa mahamba ma ulu, ni ma phalata, ni ma ngòndo, ni ma jifelu, ni ma miẋi ni ma matadi.

⁵ Kithangana kienhókio kua tukuluka milembu ia lukuaku lua muthu, lú kala mu soneka ku mbanduʼa kandeia, ku phalelu iòkaiale ia dizemba dia muenexi; sobha bhenhobho milembu ia kexi mu kusoneka ua i mono.

⁶ Anga kienhokio pholo ia sobha ikituluka, ilunji ia mu tandanganha katé ni miongo ia mu botomoka, jiphuna jiteketa, ji di-ṗhuṗha-ṗhuṗha bhuamoxi.

⁷ Sobha hé uta nzongo, uixi: Ngi bhekedienu bhabha oso jimesene ja iphata, ni akua Kaldeia, ni azambudi oso. Sobha anga uzuela, u ambela jinjimu ja Babilónia uixi: Uoso u tena kutanga mixinda iosoneke iii, na ngi jingunuina o dijimbuluilu dié, a-nda ku mu zuika thanga ikusuka, hé a mu zuika lubhambu lua ulu mu xingu, o mu utuminu uaʼxi a mu bhana-mu kididi kia katatu.

⁸ Bhenhobho Jinjimu joso ja sobha-phe anga ji bokona. Maji a lémbua kutanga o mixinda ioso iòsoneke, mba ku jingunuina sobha o dijimbuluilu diê.

⁹ Bhenhobho sobha Belxazale u juuala kiavulu, pholo ia mu kituka, o ilâmba iê ioso iabhuuama.

¹⁰ Na mvale dia mama-phe, kioso kievu o izuelu ia sobha ni ilâmba iê, u bokona mʼonzo ia fesa; na mvale anga uzuela, uixi: Muenexi, tunga soma ku izuua ioso! Ilunji ié ki i ku juuale kiókio, kana ue kudiangamana pholo.

¹¹ Sai diiala uala mu utuminu ué, muene uala ni nzumbi ia jinzambi jikôla; o mu izuua ia tatʼenu, a mu sange ni mukengeji, ni kutetuluka, ni unjimu, mukuâ ni unjimu ua jinzambi; sobha Nabukodonozolo dia tatʼenu, euá, muenexi dia tatʼenu eie, sobha, ua mu bhangele dikota dia jinganga, ni dia jimesene ja jithéthembua, ni akua Kaldeia ni azambuidi;

¹² muenhú uene ni muẋima uabeta ujitu, ni kuijiia, ni unjimu, ujingununa jinzoji, utetulula dioso diba dia jinganana, ubhuisa jiphata, ima ioso iii a i sange kua muthu umoxiʼú, Daniiele, a mu luka kuala muenexi uixi: Beltexazale. Tumenu-phe Daniiele, muene uanda kubhana o dijimbuluilu dia kisoneku kiki.

¹³ Anga a bokuesa-phe Daniiele bhu pholo ia muenexi. Muenexi anga u zuelesa Daniiele, uixi: Eʼmuene Daniiele iuná ua tokala ni anʼa kikuka kia tundile ku Juda, ejiie ni muenexi dia tatʼetu, ua a kukile ku Judeia?

¹⁴ Nga kʼivu kia ku tumbula, exi o nzumbi ia jinzambi iene momué, ni mukengeji, ni kuijiia, ni unjimu uabeta ujitu.

¹⁵ Kiki a ngi bhekela o jinjimu ja kuijiia, ni jimesene ja jithéthembua, bhu pholo iami, mbe o ku ngi tangela o kisoneku kiki, ni ku ngʼijidisa o dijimbuluilu diê; maji ene-phe a lémbua-ku o ku ngi tangela dijimbuluilu dia izuelu iii.

¹⁶ Eie-phe nga ku ivu fuma kuma eie u mesene ia kubhana majimbuluilu, ni kutetulula jiphata. Kiki-phe, se uatena kutanga o kisoneku kiki, ni ku ngʼijidisa dijimbuluilu diê, a-nda ku ku zuika thanga ikusuka, o mu xingu a-nda ku ku zuika lubhambu lua ulu, nʼa ku bhane kididi kia katatu mu utuminu uaʼxi.

¹⁷ Daniiele-phe u kumbulula bhu pholo ia sobha, uixi: Maujitu méʼomo ma kale phala eie, hé uedi ufuta, futa muthu uengi! Maji o mixinda ia kisoneku ku i tanga ngi ku tangela-iu, anga ngi ku bhana o dijimbuluilu diê.

¹⁸ Kaxi eie, u sobha, Nzambi Sukeku, uabhele tatʼenu Nabukodonozolo o utuminu, ni ulâmba, hi kijingo ni kizunda.

¹⁹ Mukonda-phe dia unéne ua mu bhele, miji ioso ni ifuẋi, ni athu a madimi moso, edile ni kiteketela ni uoma bhu pholo iê-muène. Uoso ua mu idi ngi mu jibha, u mu jibha muene; uoso ua mu edi akole muenhu, u mu bhaka ni muenhu; o ki ela muthu iú ngi mu zangeleka, u mu zangeleka muene; o ki ela muthu iú ngi mu tununa, u mu tununa muene.

²⁰ Maji kioso kia mu nanuka muẋima uê, kilunji anga ki mu xixila ni ukumbu, a mu lundumuna bhu kiandu kia ungana uê, kijingo iá a mu tambula-kiu.

²¹ Anga a mu kaia muʼaxaxi ka anʼa athu, o muẋima anga a mu lungulula-u u kituka kala ua kiama, anga u tunga kumoxi ni mikete ku mukáu, a mu bhangesa kúdia iangu kala ngombe; mbundu i kuata ku mu sukila ku mukutu, anga ukala kienhiki katé ki kia mu tetulukila kuma Nzambi Suke-ku, muene uene kutumina o maungana ma athu, o uoso a mu andala u mu hingisa ku thandu dia akuâ.

²² Eie-phe, tata, Belxazale, u monʼê, ua lémbua kubatamesa muẋima ué, sumbala ima ioso iii ua ijiia muene kiambote.

²³ Eie ua di zangeleka, kua xila Ngana ia diulu, o itutu iaʼnzo iê a ku bhekela-iu eie; eie-phe, ni ilâmba ié, ni akajiʼé, ni akamʼé, muene mu mua kuata kunuina o vinhu. Eie ua te-ku dingi o kuximana jinzambi ja phalata, ni ja ulu, ni ja ngòndo, ni ja jifelu, ni ja miẋi, ni ja matadi, o jene ki ji tena kumona, ki ji tena kuívua, ki jʼejiia kima, jedi ngó ni jene hudí; maji o Nzambi, uoso ua ku kuata o muenhu ué ni jinjila jé joso, ji uenda, muenhú kua xikina ku mu jingisa.

²⁴ Kua muene-phe, kuene kua tundu o kaxaxi ka lukuakuʼolo, ia a ku sonekena o maka iá.

²⁵ Maka-phe mʼosoneke menhama: Mene, mene, thekel, upharsin.

²⁶ O dijimbuluilu diê diambe kiki: MENE: Nzambi ua kondala o utuminu ué, iú ua u zubha.

²⁷ THEKEL: Eie a ku pezala ku pezu, a ku sange kua tenena.

²⁸ PERES: Utuminu ué a u uanena akua Mediia ni akua Pelesa.

²⁹ Belxazale bhenhobho ubhana ngonge, anga Daniiele a mu zuika kizuatu kia kusuka, a mu zuika nzenzela ia ulu mu xingu, iá a mu xikila ngonge, muene u kala kilâmba kia katatu mu utuminu.

³⁰ Usuku uenhó-phe, Belxazale, muenexi ua Kaldeia, anga a mu jibha.

³¹ O Ndala, mukua Mediia, ua mu bhingana, kioso kiala mu makuinhi a samanu a mivu ni iiadi.