Daniiele 11 - O Mikanda Ikola

Ulangalangongo ua Medo-Pélesa a-nda ku u jima mbutu kuala Sobha ia Ngeléxia. O utuminu anga a u uana mu ijinga iuana. Kua-nda kukala ita kua sobha ia ku Sulu ni sobha ia ku Suku

¹ Eme-phe mu muvu uadianga ua Ndala, mukua Mediia, nga balumuka phala ku mu suinisa ni ku mu kuatekesa.

² Kiki-phe nga-nda ku ku jimbuila o kidi. Talesa, ku Pélesa hanji kua-nda ku di-bhinganesa jisobha jitatu, o ua kauana ua-nda kúvua ma-umvuama mʼònene, akuâ osoʼá ndenge. Mukonda dia jimbongo javulu ua kà funhisa akuâ oso, phala kubalukila utuminu ua Ngeléxia.

³ Kua kà balumuka kiua sobha, dizonda, ua-nda kutumina ni unéne uoso, o ioso ia sola iene ia bhanga.

⁴ Maji, o kia kà bhiẋila bhu ditala dia kijingo kionéne, u tukumuka utuminu a mu muangena-u, anga a u uanena ku thungi jiuana ja diulu. Maji o mbutu iê-muène ka kà tambula-ku kima, né ngó kuila kala muene ua u hingile, mbata o utuminu uê a-nda ku mu Tambula-u, anga a u bhitisa ku athu engi, maji o muiji uê-muène kana.

⁵ Sobha ia ku sulu-phe, muthu umoxi ku ilôlo iê-muène, ua kà suina, muene ua kà hinga ungana, o utuminu uê uanda kukula hé ukala ua dikota.

⁶ Maji o ki bhua kà bhita tu mivu, kiiadi kiâ a kà di ta mu kikutu; o monʼa-kilumba ua sobha ia ku sulu ua kʼèza kua sobha ia kusuku, mu ta-nê kikutu kia ukamba, maji ka-nda kukala ni muẋima uasoko; o ió ue katena kunanga, né ngó o muiji uê, mbata muhatu iú a ka mu bhakula, ni muene, ni ió oso ejiie ku mu bheka, ni tatʼâ, ni uoso uakexe ku mu suinisa mu jithembu jenhojo.

⁷ Maji o bhu kixina kia jindanji jê, bhu kala kisabhukila, kuene kua kà balumuka muthu uiza bhu kididi kiê-muène, anga ua kʼèza ni kilômbo kia masoladi, hé u bokona mu jimbonge ja sobha ia kusuku, anga u a bhondeleka, u a tolola.

⁸ Ni mahamba mâ kumoxi ni nzungule ia iteka iâ ia kuzunza, ni itutu iâ ia phalata ni ia ulu, ua kà i ambata kala jihutile katé mu Ijito; anga muene ubhanga tumivu ni kukamba ku di kuata ni sobha ia kusuku.

⁹ Muene ua kʼàia mu kúlua hanji ni sobha ia sulu maji ua kà vutukila kiua kʼoxi iâ.

¹⁰ Maji anʼê a kà di ta mu kúlua ita, a ka phopha ndumba dia ilômbo ia makuenze; umoxi mudiâ anga ua kʼèza ni lusolo, u koka o mundu uoso anga u somboka, u vutukila dingi ku di-ta mu ita, hé uia ni kúlua katé ku mbonge ia sulu.

¹¹ Bhenhobho-phe, o sobha ia ku sulu ua kà di-vunza, anga u tunda mu kúlua-nê, mu kúlua ni sobha ia iú ue ua-nda kutubhula mu kanga kifuẋi kionéne kia makuenze, maji kifuẋi kioso kia tokala ku mbandu ia jinguma jê a kà ki seiela bhu lukuaku luê.

¹² Mu kuila kifuẋi kiokio ua ki jimisa o mbutu, mu muẋima uê mua kʼèza izala; maji né ua jibha makuinhi a jimidi, o kutolola ka-nda kutena.

¹³ Mukonda o sobha ia ku suku uanda kuvutukila-ku anga u tula dingi kifuẋi kionéne mu kanga, o kia diangediʼokio ndenge, o ku dizubhilu dia jithembu, mivu muene, ua kʼèza lusolo ni kilômbo kia dikota ni nzungule ia umvuama.

¹⁴ Mu jithembu jiná ue avulu a-nda kubalukila sobha ia ku sulu; o anʼa ihuende, o ibalukutu ié, a kà balumuka ue phala kutenesa kioso kiambe o kisuma kienhiki, maji a kà lauka-phe bhoxi.

¹⁵ O sobha ia ku suku-phe anga uiza uimika imbaka, anga o mbanza ia nguzu ua kà i tambula; o ilôlo-phe ia akua Sulu kusenduka kuâ kua a tula, o ifuẋi ié iòsole ue kusenduka kuâ, nguzu ia ku di fikidila ka-nda ku i mona.

¹⁶ O nguma uoso ua-nda kuiza ku mu lua, ua-nda kubhanga muene kioso kia mu tumu o muẋima uê, ki bhua-nda kumoneka muthu utena ku di fikidila bhu pholo iê. Ua kà kala mʼoxi ia uabha kinéne, ia di bhange iene o matunda ma miji ioso, o ima ioso ia kà kala bhu lukuaku luê, katé ni kibuika ki bhobho.

¹⁷ Ua kà lunga pholo iê mu kuiza ni ukuenze uoso ua utuminu uê, athu aiukʼó ukala-nâ kumoxi, anga u bhanga muene kia mu solo o muẋima uê mu bhana monʼa kilumba phala kusakananê, mbé utuminu uê a u sengulule; maji kienhiki ue ki kia kà bhanga kima, mukonda monʼa muhatu ka kà tena-ku.

¹⁸ O ki kia kà bhita, ua-nda ku lunga kiá pholo ku ikolo ia musanza ua kalunga, anga u tolola-ku ikolo iavulu, maji bhu kala-phe kilamba kimoxi, o muenhú ua-nda ku mu tolola, kifua ua mu bhuisa ukumbu anga u mu bhangesa kuila o izala ia ukumbu uê i laukila ku thandu diê muene.

¹⁹ Anga ua kà lunga kiá pholo ku jimbonge ja oxi iê-muène, bhuene bhua kà di-bhukanena, anga u di bhana kibhalu, muthu hé uendelela muene, nuka dingi a moneka.

²⁰ Bhu kididi kiê bhua kà balumuka muthu u bhongoluesa malubhaku katé mu kididi kiangene kia ungana; maji mu izuua iòfele ngó, a-nda ku mu sengulula sè ku mu kuatela njinda mba kuzokanê mvunda.

²¹ Anga bhu kididi kiê kua ka balumuka muthu uengi uaiibha, u kala semenhi, o iú athu ka-nda kuxikana ku mu bhana kijingo kia tokala utuminu, maji muene-ku ua-nda kuiza ni kuzomba, anga utuminu u u tambula ni jimvunda.

²² O ilômbo ia tokalele ku mu tolola muene, muene ua kà i tolola hé u i muanga-muanga katé kiá ni kilamba kia tuamenena jinga ku kikutu.

²³ Muenhú suke u zubha kuta kikutu kia ukamba ni akuâ, maji muene anga u bhita bhu mbandu, hé u a tolola, ni kibuka kia makuenze mʼòfele ngó.

²⁴ Ua kʼèza ue ni kuzomba, mu ididi ioso ia ixi, muala o jimboteʼ omo, anga u bhanga ima adiʼê kiluua a i bhanga, né ue o jikuku jê nuka a i bhangele. Ima ia bhûndu, u bhita ni ku i uanena ku athuʼê ni mbole ni jimbongo, ubhanga jindunge joso ja kulúa o jimbonge, maji mu kakithangana ngó ka tokala.

²⁵ O kia-nda ku di ta ku pholo ia kilômbo kia dikota kia masoladi mê, ni huii iê ua-nda kubalukila sobha ia ku sulu ni kilômbo kionéne. O sobha ia ku sulu ue ua kà di kasela nzungule ia athu, phala kuia mu ita ienhiʼii ni kilômbo kionéne, o kia-nda ku di ta-mu, kusuína kuahi ngó, maji ka-nda kunanga mukonda a-nda ku mu muena ndunge ia ku mu tolola.

²⁶ Ene a-nda kudianê ima iambote ku meza mê, ene-â muene a-nda ku mu nenguna; o kilômbo kiê kia masoladi kia kèla muangatatʼá, avulu-phe a-nda kulauka ku sosa hé a fila bhobho.

²⁷ O jingana ue jiiadi jenhiji, a-nda kuta muẋima mu kubhanga phulu, o ku meza ku a xikama a di tangela makutu mu kusota ku di nganala muthu ni mukuá. Maji o kubhanduluka kà ku mona, kuma o ki a bhindamena ene kiòxindile ni thembu iê ia tokala.

²⁸ Ua ka vutukila kʼoxi iê ni umvuama uonéne, o ku muẋima uê iu kanena o kikutu kikôla ku ki sengumuna; u bhanga kioso kia mu solo o muẋima uê anga uia kiua ku ixi iê.

²⁹ Bhu thembu iatokala ua kà lunga dingi mu kúlua ku sulu; maji kiki kiá veji iasukidila-ku iii ki ia-nda ku bhita kala o veji iadianga.

³⁰ Mukonda a-nda ku mu endela ni jinaviiu ji tunda ku Xitime, jene ja-nda ku mu bhekela mukondo, hé ualuluka, uia mu kulungulukila o kikutu kikôla; kiene kia-nda kubhanga kuma ua kà lunguluka anga u di ta kumoxi ni ió oso a zembe o kikutu kikôla.

³¹ Anga kuakèza makuenze ku mu banda, anga kididi kiangene kikôla, kia nguzu, a ki kasanesa; jisata ja izuua ioso a ka ji bhuisa-ku, anga a kà bhinganesa-bhu kisunji ki buidisa mundu.

³² Akua kutondala kikutu ua kà a bhomba ni jindunge phala ende mu mangonha, ene anga a kà ki bhanga muene; maji o kifuẋi kia athu a dʼijiia kiá ni Nzambi, ka kà xikina; ene a kà bhânga, hé a ka tolola.

³³ Oso akua kilunji, muʼaxaxi ka kifuẋi a kà longa muene mundu; hanji-phe, a kà laúka ku xibhata, ni ku milengo ia túbhia, ni amoxi a kʼàia ku ubhika, o iá a kà a bhûnda; maji kienhiki kia kà bhita mu kithangana kia tokala.

³⁴ O kia kà laúka kienhiki, bhua-ndu kala o ku a bhetula ni kadikuatekesu kòfele ngó; athu àvula a kà zuama ku mbandu iâ, maji enhá a kʼèza ni miẋima iiadi.

³⁵ Amoxi ku athu a tetuluka kilunji a kà dibhala, mbé o ku a lola kujiza kuâ phala ku a eẋika ni ku a zelesa-phe, katé bhua kà bhuila o kithangana, mukonda o thembu ia dizubhilu ki iza, katé bhu kithangana kiê kioso kia tokala kia i xindi.

³⁶ O sobha-phe ienhiʼii ua kà bhanga kioso ki mu tuma o vondadi iê; ua kà balumuka, anga u di kudisa ku thanduʼa nzambi joso; o Nzambi ia jinzambi joso ua kà âmba muene ue ima ia isunji ni madiuanu, ki kuiza kima! Inda muene-ku uia ni kubhanduluka dingi, katé kia kʼèla njinda ia Nzambi ia tenena ia suku; kuma, kioso kia tanga Nzambi, ki bhita muene.

³⁷ Sobha muenhú ka-nda ku à xila o Nzambi ia jitata jê, ka xikina kubhana ujitu ku jihenda ja amama o muene ue kà ki suu, kana! Ki bhu kala nzambi ia suua, mukonda muene ua-nda ku-di-zangeleka ku thandu dia ima ioso.

³⁸ Inda ua-nda kusuua ngó o dihamba dia ukuenze ua ita, dihamba diene o jitata jê ka dʼijidile, diene dia-nda kubheza ni kubhakuila ulu, ni phalata, ni matadi a madiiamande, ni ima ia matunda.

³⁹ Ua kà sota kúlua o imbaka ia jinzo ja ukuenze ua mbonge ni dikuatekesu dia nzambi iengi; oso a dʼivua-nê ua kà a vudixila o kijingo; u a bhana kutumina ilunga ia athu avulu, u a uanena oxi ni ku a bhana-iu ku maluvu-a-kitanda.

⁴⁰ O kia kà bhua o jithembu-phe, sobha ia ku sulu ua kà lua-nê, o sobha ia ku suku ue ua kà di lukula mukuâ ni kibhungu mu kúlua-nê ni makalu, ni akua jimonde, ni jinaviiu jandumba. Muenhú u bokona mu jixi u di-zanza momo mukua ni ngiji iezala, anga u somboka.

⁴¹ Anga ua kà bokona ue mʼoxi ia ulamba uangene, ua kà lundumuna jixi ni jixi, a kà bhulaka ngó bhu lukuaku luê, enhá: Idomo, Mouabhe, ni jisamba-tende ja anʼa Amone.

⁴² Ua kà ta lukuaku luê mu jixi javulu, o Ijito ue ka-nda kusubhuka.

⁴³ Jimbongo ja ulu ni phalata ua kà ji tambula, ni ima ioso ia matunda mu Ejito; akua Líbia ni Etiiópia a kà mu kaiela.

⁴⁴ Maji-phe, mu kuívua kibulukutu kia jinjimbu ji tunda ku thunda, ni ku suku, ua kà juuala; anga ua kà tunda phala kuia ni ngânji iavulu mu kujibha ni kujimisa mundu uavulu.

⁴⁵ Ua ka phapha jibalaka ja kilômbo kia mbanza iê bhu kaxi ka musanza ua kalunga ka dikota ni Mulundu ua ulamba; maji hádia o dizubhilu diê ki dʼiza, u mu banda ka moneka.