Daniiele 10 - O Mikanda Ikola

Anjo u kunda Daniiele ima ioso ia kà bhita mu izuua i sukidila-ku

¹ Mu muvu ua katatu ua Silo, sobha ia Pélesa, Daniiele, a mu edi Belxazale, a mu jingunuina maka; o maka-phe ma kidi, maka ma ita ia dikota ia xikamena kubhanga mu thembu iza-ku. Daniiele muene, maka ua mʼevu kiambote, o kisuma kia mu tetulukila.

² Mu izuua ienhoio, eme ngi Daniiele, nga kexe ni mukondo, mu semana jitatu ja muvimba.

³ Ki nga kexe kúdia makudia ma ngi tula ku muẋima, ni xitu ni vinhu ue mu kanu diami ki ia bokona-mu, né ngó ku di uaia ni maji. Anga ngi kala kienhiki katé ki nga tenesa jisemana jitatu.

⁴ O mu kizuua kia makuinhi aiadi ni kiuana ku mbeji iadianga, eme nga kexe kiki ku kibumu kia ngiji ionéne ia Hidekele (muene Tigre);

⁵ nga bhetula mesu anga ngi tala, nga mono-phe muthu uazuata kizuatu kia linho, o mu kinhonga ua di kutu phonda ia ulu ua fina ua Ufaze;

⁶ o mukutu uê uila kala turkeza, o pholo iê kala nzaji ki i telaka, mesu mê ma lekujuka kala jisama ja túbhia, o maku mê ni inama iê kala kidifua kia ngondo iolunge ni xitanho, ia a i seke, o dízui dia kuzuela kuê, mukuâ ni kilungutu kia mundu ua vulu.

⁷ Eme-muène-phe ngó ngi Daniiele nga mono kisuma kiókio; athu nga kexe-nâ kumoxi ka ki mono; sumbala kiene, maji kua eza kimbuua, anga alenga ni uoma hé a suama.

⁸ Eme anga ngi xiala-phe ubheka uami, anga ngi kala mu diuana o kisuma kiókio kionéne, bhenhobho ni nguzu mu mukutu ia ngi bhu-mu, pholo ia ngi kituluka ni uôma, anga ngiia ku kiambu, né ngó kanguzu kòfele ki nga kexe na-ku.

⁹ Hanji-phe, dízui diê nga dʼivu ki dia kexe kuzuela, o ki ngevu dízui dia maka mê, nga di bateka o pholo bhoxi, anga ngʼambuka.

¹⁰ Talesa-phe, bhu kala lukuaku lua ngi tuta, anga lu ngi bhetula, anga ngi kala ku jiphuna ni mâkanda a maku.

¹¹ Muene iú ua ngʼambela, uixi: Daniiele, u muthu a ku zola kinéne, batekela maka moso nga-nda ku ku ambela, ene ue bhetuka nda u imane, mbata eme a ngi tumu kokué. O kia kuata kuzuela kienhiki, eme ngi kala mu teketa.

¹² Hé u ngʼambela-phe, uixi: Ku kale ni uoma, Daniiele, mbata tunde mu kizuua kia dianga ki uate muẋima ué mu ku dʼivua kiambote ni Nzambi ié, ni ku di tolesa bhu pholo ia muene, maka mé ala muene ku mʼevua, eme kiene kia ngi bheka.

¹³ Maji o kilolo kia utuminu ua Pélesa, ua ngi batuile ku pholo mu makuinhi aiadi a izuua ni kuzuua kimoxi; eué kiá Mingedi, ua tokala ku ilôlo ia dianga, muene uejile iú ua ngi bande, éme nga dʼimikine ni jisobha ja Pélesa.

¹⁴ O kiki ngeza ku ku ijidisa kioso kia-nda kubhita na-kiu o mundu ué, mu izuua i sukidila-ku; mbata kisuma kiki, kia mu tanga ima ia kʼèza ku hádia.

¹⁵ O kia kuata ku ngi zuelesa maka enhá, nga bheteka pholo iami bhoxi eme nga dixibha, mua ngʼiza ububu.

¹⁶ Talesa-phe, kua tukuluka muthu, ua di-fuangana ni anʼathu, iu ua ngi tuta ku mizumbu; dikanu-phe dia ngi jikuka kiua, anga ngi zuela, hé ngʼambela ió ua ngʼimanena ku pholo ngixi: Muadiʼami, tata, kisuma kieniki kia ngi bhekela misusu, ki ngala ni nguzu mu mukutu.

¹⁷ Selevende ié-phe, Nganʼami, tata, ki ngalʼiki, ngi tena kiebhi kuzuela ni Ngana iami ió? Mukonda nga bulukuta, nguzu ki ngala na-iu dingi, o muha ngó ua kubhuima iú u ngi-bhua kiá moxi.

¹⁸ Ió mukua kidifua kia muthu-phe, ua ngi babata dingi luamukuá, iú ua ngi bhangesa kukala dingi ni nguzu iengi.

¹⁹ Uixi-phe: Ku kale ni uôma, eie u muthu a ku zola kiavulu! Tululuka; kala u kindanda! Kala muene u kindanda! Kiala ku ngi zuelesa kiki, eme ue nga di tutu kiòmuene, ngixi-phe: Zuela, Muadiʼami, mbata eie ua ngi suinisa.

²⁰ Muene-phe uixi: Eie uejiia kioso kia ngi bheka kokué? Kindala nga-nda kuvutuka dingi kuzoka ni kilolo kia akua-Pélesa; o ki ngi tunda-ku, talesa, o kilolo kia Ngeléxia ua-nda kuiza.

²¹ Maji eme nga ku jimbuila kioso kiosoneke mu mikanda i tanga o kidi. O mu kúlua ni jinguma, kana-bhu u tena ku ngi banda, kale ngó Mingedi, o kilolo kienu.