Daniiele 1 - O Mikanda Ikola

Daniiele ni akua mu mbanza ia Nabukodonozolo

¹ Mu muvu ua katatu ua utuminu ua Juakí, sobha ia Juda, kiene kieza Nabukodonozolo, sobha ia Babilónia, hé u tula mu Jeluzaleme, anga mbanza ioso a i konda mbandu ni mbandu.

² Jihova-phe u bhakula Juakí, sobha ia Juda, bhu lukuaku luê, ni mbandu ia itutu ia ulu ni phalata ia dibhata dia Nzambi, anga uia na-iu kʼoxi iê ku Xinale, anga u i tula mʼonzo ia dihamba diê, hé u i lunga kumoxi ni itutu iala monzo ia dihamba diê.

³ Soba anga uambela Aspenaze, kota dia jingolambole jê, uixi: Bekenu-bhu amoxi ku anʼa Izalaiele, mu tungula anʼa jingana, ni ku ilamba,

⁴ oso minzangala a disanze kiambote, a kambe kisému, edi ni kuuabha pholo ni kuijiia, oso òlonge mu unjimu uoso, oso ejiia uhete, a tetuluka kiambote mu tongolola o ima, se mua a mono ni kusakalala kua kuila atena kusedivila mu dizêmba dia muenexi, mbé mu a longe usonekenu ni uzuelelu ua akua Kaldeia.

⁵ Sobha hé utuma ku a bhesa kúdia, ku tunda bhuoso bhua mu dia muene kizuua ni kizuua, ni vinhu ia kexe mu nua muene mbé ende ni ku a sasa kienhiki katé mu mivu itatu, o ki i bhita, enhá abhite ku kikalakalu kia kubanda sobha.

⁶ O muʼaxaxe kâ kia a tungula kiá mu anʼa Juda, a katula-mu Daniiele, ni Hananiia, ni Mizaiele ni Azadiia.

⁷ O kota dia jingolambole iu ua a bhana majina engi: Daniiele ua mu luku Beltexazale; Hananiia ua mu luku Sadalake; Mizaiele ua mu luku Mizake, o Azadiia ua mu luku Abede-neko.

⁸ Daniiele anga u ta kikutu ni miẋima uê, uixi: Nguami ku di kasanesa ni makudia ma sobha, mba ni vinho iê iene mu kúnua; iu ua bhingi kua kota dia jingolambole phala a mu ehele kukamba o ku di kasanesa.

⁹ Kienhiki Ngana Nzambi ua bongesa Daniiele kiadi ni henda bhu pholo ia kota dia jingolambole.

¹⁰ O kota dia jingolambole iu ua vutuila Daniiele, uixi: Eme ngala ni uoma ua muadiʼami, sobha, muthu ua mi xindila bhu tunda kúdia kuenu, ni kúnua kuenu; ki bhita-phe kiebhi kia mi mona jipholo jenu ja di suuata, o akuenu mua sokela-nâ kumoxi anga aẋanana? Bhenhobho-phe mua nda ku ngi ta bhu kíbhidi kia ku ngi batuisa mútue kua sobha.

¹¹ Daniiele-phe hé u tangela a mu nomeiala kuala kota dia jingolambole ku uana makudia ni kutambula konda ia Daniiele, ni Hananiia, ni Mizaiele ni Azadiia, uixi:

¹² Nga ku diondo, tu fikise hanji mu kuinhi dia izuua, etu tu jeselevende jê, ende ngó ni ku tu bhana makudia ma mábhia, o kúnua kuetu ku kale ngó o menha.

¹³ Eie-phe u tu tonginine kiá kioso ki tu kala etu, u tonginine ue kioso ki kala o minzangala ene mu kudia ioso i tunda kua sobha; o kioso ki u mona, eie-phe kiene ki u tu bhanga kiá.

¹⁴ Muene uaẋikina kienhiki, iú ua a fikisa mu kuinhi dia izuua.

¹⁵ O kia zubha kubhita kuinhi dia izuua, enhá abeta kuuabha ni kuneta, o minzangala ioso-lolo ia kexe kúdia ku ima ioso ia meza a sobha, ndenge.

¹⁶ Mukonda dia kiki, mukua kuuana makudia, uenda ni ku a sondolola o kudia kuâ kua a fuamene, ni vinhu ia a tokalele kúnua, anga u kuata ku a bhana ngó makudia a mábhia.

¹⁷ O minzangala iuana ienhiʼii, Nzambi anga ua a bhana kuijiia ni kutongoloka mu mixinda ioso ia kusoneka ni mu unjimu; maji o Daniiele ua mu tela-ku o kilunji kia kutetulula isuma ni jinzoji.

¹⁸ Kia bhu o izuua iaxindile sobha, kota dia jingolambole ua a bheka bhu pholo ia Nabukodonozolo.

¹⁹ Sobha anga uzuela-nâ; o muʼaxaxe-kâ-phe ka sangemu athu a sokela ni Daniiele, ni Hananiia, ni Mizaiele, ni Azadiia; kienhiki anga a bokona ku mbanza mu ku kalakala ni sobha.

²⁰ O mu maba moso-phe ma unjimu, ni kutongoloka, ma ebhula jinga sobha kia kala ni maka a mu bhonzo, o iá ua a mono kuila a bande kuinhi dia matala mu kuijiia o jinganga, ni jimesene ja jithéthembua jene mu utuminu uê uoso, ndenge.

²¹ Kienhiki Daniiele anga unakina muenʼomo katé mu muvu uadianga ua sobha Silo.