Amoji 9 - O Mikanda Ikola

O kufundisa kua Nzambi ki kuene mu kufula

¹ Jihova nga mu mono, uemana ku thanduʼa Kalatódio, iu ua ngi tangela, uixi: Mútue ua philadi bukulau, ifikidilu ia mabhitu i tekete, phala ima ioso bhulu diaʼnzu i lundumukine bhu thala ia mítue iâ ene oso! Oso a subhuka-ku Eme ue nga-nda ku a jibha ni xibhata katé ku kasule kâ. Mu kaxi kâ se mu kala muthu ulenga, ka kà subhuka, né mu kala iú u subhuka, ka kà tena kubhuluka.

² Né-mbe kiá a di kandeia hé a tuluka katé muʼalunga mua tunga o madifundu, hanji lukuaku luami lua kà a takana mueneʼomo; o kia kà banda katé ku diulu, eme kuene muene ku ngà a langumuna.

³ O ki áia mu di sueka bhu zoko-zoko dia mulundu ua Kalumelu, nga kà a sota muene, anga kueneʼoko muene ngʼa katula-ku; o kiela exi ki ngʼa mone mesu, anga a di sueka koxiʼa menha mu musanza ua kalunga, kueneʼoko ue nga kà tendelela kinhoka nʼende ni ku a numata.

⁴ O ki aia ku ubhika ua uhutile ku mesu a jinguma jâ, kueneʼoko nga kà tendelela xibhata, ni i kala mu ku a jibha. Nga kà ta mesuʼami ku thandu diâ ni ku a kengelela mu ku a bhanga phulu, ki ku a bhanga mbote, kana!

⁵ Kuma Jihova, Jihova dia Ilômbo Ieta, Muene ngó ua bhingi kuila se oxi u i tuta ngó, iene i sengumuka, o ene oso a tungu-mu a dila jingololo ja kalunga! O ixi iene-phe ienda ni kubanda kala kihonga kionéne kia mu di bhanga masenza, hé ia kà jikinina mukua ni ngiji ia Ijitu.

⁶ Nzambi ua tunga jinzu jê ku maúlu, o kioleku kiê ki tula mu ngongo; Muene muenhó u tena kuixana o menha a kalunga, anga u a lunduluila kuthandu dia ngongo ioso; Jihova, diene o dijina diê.

⁷ Jihova uixi: Enu mu anʼa Izalaiele, manhi kokuami ki mu sokela ni anʼa akua Itiiopia? Manhi ki eme muene nga bandesa Izalaiele mu kutunda mʼoxi ia Ijitu, kala kia tundu akua Fidíxia ku Kafitole ni akua Sídia ku Kile?

⁸ Uila kiki-phe, mesu a Jihova Nzambi a lungu mu kuzoka ni utuminu uoso uenda ni kubhanga ituxi, katé muene ki a u sengulula kulu dia mundu; inda mu dibhata dia Jakobo, Jihova uixi: Ene oso ki nga kà a buikisa-mu, kana.

⁹ Mukonda nga kà xika ngonge, o dibhata dia Izalaiele nga kà di kukumuna mu miji ioso, mukua ni kiene mu kùsesa jimbundu bhu mbàngu, ni lumbundu lumoxi ngó ki lu sonoka bhoxi.

¹⁰ Mu kifuẋi kia mundu uami ene oso akua ku ta ituxi a-nda kua kà fua ku xibhata, oso ene mu ku amba, exi: Ki tua-nda kutakana ni kibuika kia kima, mba ngó kima kiaiibha ku tu zukama.

Izalaiele a kà mu tungulula dingi

¹¹ Mu kizuua kieneʼokio-phe, balaka ia Davidi ia dibhalele, nga kà imika dingi, mazungu mê nga kà a xita, jingundu jê nga kà ji balumuna dingi, nga kà i tunga kala mu izuua ia xahulu.

¹² Mbebhu ende ni kúvua o jimbalu-mbalu ja subhuka kua Idomo, ni miji ioso iexanena mu dijina diami, kuma Jihova ua ki tange uixi: Ima ioso ienhiʼii ia kà bhita muene.

¹³ Talesa-phe izuua i iza, Jihova ua ki tange, ia bhingi kuila mukua kudima u sokela ni mukua kumuna, o mukua ku kama ji-úva u sokela ni ió u kuua jimbutu; kieneʼokio milundu ia kà zunzumuka vinhu ia uisu, tuthuthulundu tuene tuoso tua kà sengumuka.

¹⁴ Nga kà katula ubhika ua uhutile ku kifuẋi kia mundu uami ua Izalaiele, jimbonge joso ja bilukile jingundu, ene a kà ji tunga dingi, muene mua kà kala; kia kà dima mivide, vinhu iê a kà i nua muene, kia kà bhanga imbu, ibundu i tunda mu imbu iâ a kà i dia muene.

¹⁵ Jihova, Nzambi ié ua ki tange, uixi: Nga kà a phapha mu ixi iâ, ki bhua kàla dingi u tena ku a vuza mu ixi i nga a bhana.