Amoji 7 - O Mikanda Ikola

O Kisukila kia kihoho

¹ Jihova Nzambi ua ngi londekeza kiki: Ku iangu ia nginginina, iandeka ku sabhuka-ke, ngi mona ku kala mu di bhanga kihoho. Iangu iii ia nginginina ia moneka kioso sobha kia zubha kumuna.

² O ki nga mono kuila o iangu ioso a zubha muene ku i dia ku mavu, eme-phe ngambe kiki, ngixi: Jihova, Nzambi, tata, loloka! Kuma o Jakobo ua-nda kubalumuka kiebhi, o muene ua tolo nguzu!

³ Bheneʼobho Jihova u diela anga uamba, uixi: Ki kia-nda kubhita.

⁴ Jihova Nzambi anga u ngi londekeza dingi kiki: Talesa, ngi mona Jihova Nzambi iú handekela, uala kuixana túbhia phala ni tu mu batuila milonga ioso; tuene anga tu jikinisa o kidikungu kia dikota, anga tu sota kujikinisa ue o mikáu ia undundu uangene ua Jihova.

⁵ Bheneʼobho-phe eme nga muʼambela, ngixi: Ngana Nzambi, tata, eha hanji! Kuma o Jakobo ua kà balumuka kiebhi, se muene ua tolo, ka moneka nguzu?

⁶ Jihova anga u ki diela ue kienhiki. Jihova Nzambi anga u zuela uixi: Kiki ue ki kia-nda kubhita.

⁷ Jihova ue ua ngʼidikiza dingi kiki: Talesa, Jihova ua kexile ku thanduʼa kimbaka kiemana nzanza, a kimika ni mukolo ua mutungi-a-nzu, uexana pulumu; o muene ue ua kuata pulumu bhu lukuaku luê.

⁸ Jihova anga u ngʼibhula, uixi: Eie, Amoji, ihi i uala ku mona? Eme ngixi: Pulumu. Jihova phe uixi: Mu kaxi ka kifuẋi kiami kia Izalaiele nga-nda ku-ta-mu pulumu, kuma ki ngi bhiti-mu dingi, lémbue.

⁹ O matala-phe a Izake a kà a sengulula, ni ididi ikôla mua Izalaiele a kà i sengulula-mu; anga nga kà zangumuka ni xibhata mu ku zoka ni dibhata dia Jelubouamu.

Amoji a mu tanga kuila mukua kavuanza

¹⁰ Bheneʼobho Amaziia, nganga bhu Betele, u tuma kutangela Jelubouamu sobha ia Izalaiele, uixi: Mu kaxi ka dibhata dia Izalaiele, Amoji ua mu ku ta kikutu kia ufe; ixi ki i tena ku kuívua o maka mé oso.

¹¹ Mukonda Amoji uambe kiki: Jelubouamu ua-nda kúfua ku xibhata; ni kidi muene, Izalaiele anda ku mu tubhula mʼoxi iê phala ku mu bheka ku ubhika.

¹² Amaziia bheneʼobho uambela Amoji, uixi: Mukua lumono lua kumona, ndaié kiá! Lengela ku ixi ia Juda, kueneʼoko ku ua ká dila o mbolo ié, kuenhoko uê ku ua kà zambuila mu upolofeta.

¹³ Maji-phe, tundé lelu ni ku pholo dia kuia, mu Betele kuzambuile-mu dingi ni upolofeta, mbata kiene o kididi kikôla kia sobha, diene o dibhata dia ungana ua usobha.

¹⁴ Amoji hé u vutuila Amaziia, uixi: Eme ki ngi polofeta, kana! mba monʼa polofeta, maji ngi muingi a jingombe, ngi mudimi a jisikómolo.

¹⁵ Maji-phe Jihova ua ngi katula mu kuinga ibhaku, iú ua ngi tangela, uixi: Ndé ua kà zambuile kifuẋi kiami kia Izalaiele mu upolofeta.

¹⁶ Kiki-phe, ivua kizuelu kia Jihova: Eie uixi: Izalaiele kana ku mu zambuila kiaiibha, kana ue kubazela o dibhata dia Izake.

¹⁷ Mukonda dia kienhiki Jihova uambe kiki: Muhatuʼé ua kà kituka kidianzunga mu mbonge; anʼé a mala ni anʼé a ahetu, a kà di bhala ku xibhata; o ixi ié a kà i uana-uana ni mukolo, eie-muène ua kà fuila mʼoxi ia kasana, ia xidi; o Izalaiele, ni kidi muene, a kà muʼambata koxi iengi ia dikanga mu ubhika.