Amoji 5 - O Mikanda Ikola

Sotenu Nzambi nda mu kole muenhu

¹ Ivenu maka iá, mbimbi iami ngi i zangumuna mu ku mi dila enu, mu dibhata dia Izalaiele.

² Kilumba kia muzeletete mu Izalaiele ua di bhale, ka-nda kutena dingi ku balumuka! Ua zeka muene ku thandu a mavu, a mu ehelela, ki bhuala muthu u mu balumuna!

³ Kuma Jihova Nzambi uambe kiki: Mu sanzala muoso mua tunda jinga midi ia makuenze a ita, Muene ua kà xisa-mu ngó hama; o mu ioio mua tunda jinga o hama, ua kà xisa-mu dikuinhi ngó dia akua bhata dia Izalaiele, toka!

⁴ Mbata, Jihova, dibhata dia Izalaiele ua di tangela, kuila: Ngi sotienu, nda mu kale ni muenhu!

⁵ Maji ki mu sote ku Betele, mba muiza bhu Jidingale, ki muie ue ku Beleseba, mukonda, o ku tanga kidi, Jidingale a-nda ku mu ambata ku ubhika, o Betele a-nda ku mu sengulula u xala kilombo ngundu.

⁶ Sotenu-phe Jihova, nda mu laie; Phala muene ue ka di takuile mu bhata dia Zuze kala túbhia, ni tu mu jikinisa, bhu Betele-phe ki bhua-nda ku moneka muthu u tena ku tu jima.

⁷ Mbata enu ufundisilu ua iuka mua u lungulula kibaka kia kulula, kubatula o milonga mu kidi mua ki takuila bhoxi.

⁸ Sotenu-phe ió ua bhanga o jithéthembua ja Ndumbe ia Ngombe, ni jithéthembua ja Mbuá ni Mbuiji ni Muthu; Ió ua bhingi o kuvunda kua usuku u ku lungulula kimene, o muanha u u lungulula usuku; uixana menha a musanza ua kalunga anga u a lunduluila ku thanduʼa mavu a kukuta. Jihova, diene o dijina diê.

⁹ Muene u bhangesa kuila né dizonda u tukumuka kibuika kia mu bhiẋila; mbonge né-mbe ia imbaka i senguluka muene.

¹⁰ Enhó kia mona bhu muelu muthu u a bazela, ki a ibhila; uoso u tanga kidi ene a mu zemba.

¹¹ Kala kiki, mukonda dia kuila ngadiama mu mu diota kinama, anga mu mu jijidika ku futa lubhaku lua tiliku, mua kà tunga jinzu ja matadi osete maji ki mua kà kalamu; mua kà phapha mábhia ambote a mivide, maji vinhu iê ki mua kà i nua.

¹² Mukonda eme nga kʼijiia muene kuila itondalu ienu ia ndumba, ituxi ia mi kala jinzungule; muthu ua iuka, enu mu mu tatesa; ku milonga, mu tambula nduta; a bhindama kia kuendela, eie ua a jikila dibhitu mu pholo.

¹³ Kala kiki, uoso njimu ua kà di xibha ki bhiẋila kithanganʼokio, kuma izuua iii ia ibha.

¹⁴ Sotenu-phe o mbote, kana kusota ima ia ibha phala mu laie; o mu kienhiki, Jihova Nzambi ia Ilômbo Ieta, u kala ni enu kala ki mua mu ki tanga enuʼenu.

¹⁵ Kubhanga kia ibha ku mi ibhile, mu uabhele-ku kubhanga mbote; o kufundisa kia iuka ku mi kale muene bhu dibhitu. Sumba Jihova Nzambi ia Ilômbo Ieta u kuatela henda ku tumbalumbalu tua subhuka mua Zuze!

¹⁶ Uila kiki, Jihova, Nzambi ia Ilômbo Ieta, o Ngana, uambe kiki: Mu jinzunga joso mua kà kala jingololo, ni mu jisengu joso a kèla Aiué, tatʼé! Aiué, tatʼé! Ni kidimakaji a kà mu ixana ue phala kudila jingololo! Akua kudila lujiji, ejiia kusânga, a kà exana mu kudila.

¹⁷ Mu mábhia oso a mivide mua kà kala kudila ni ku di suuata, mukonda dia kuila eme ngi bhita muʼaxaxi kenu, Eme ngi Jihova.

¹⁸ Kokolo dia ió oso a mu kuinda kumona o kizuua kia Jihova! Kizuua kiki kia Jihova, enu mua ki mesenenaʼhi? Mukonda kia kà kala kizuua kia kitombe, ki kia mukengeji, kana.

¹⁹ Kia kʼèla mukuâ ni muthu kia lenga hoji, hé u takana ni kitôto; mba-phe kia di fu ni muthu ualengela mʼonzo, o mu ku tula lukuaku ku mutôto, nhoka anga i mu numata.

²⁰ Kizuua kia Jihova manhi ki kia kà kala ngó kitombe, o mukengeji lémbue? O kuvunda kuê ki kuene kua kuila muene bui, o kuzela lémbue?

²¹ O izokola ienu eme ia ngʼibhilaʼmi, o iene ue ki ngi indi; o makubho-ngoloka menu mu jikultu, ki ma ngi kuatela vondadi.

²² Né-mbe mu ngi bhakuila jisata jenu ja kuoha, ni mibhaku ia makudia, ki ngi tena ku i tanena; o ku jisata jenu ja uembu, ja ibhaku ia nete, ki ngi suu-ku, mba ngi tala-ku diesu.

²³ Mitendu ia kuimba kuenu, ndénu na-iu dikanga; kuma o ima ienu ia kuxika, ki ngandala ku ivua ngó o mbimbi iê.

²⁴ Inda, o kufundisa kua kidi-phe, ku kunguluke kala menha; o ku batula milonga mu kidi, kuile kala kangiji ka mabhubha, ki kene dingi kukukuta.

²⁵ Enu dibhata dia Izalaiele, manhi mua ngi bhakuila jisata ni ilumbu, mu makuinhi a uana a mivu mu kikangalakata?

²⁶ Kia mi uabhelele-phe o kuambata balaka ia dihamba dienu Muloko, ni kalatódio ka iteka ienu, o théthembua ia nzambi ienu, i mua di bhangela enuʼenu.

²⁷ Uila kiki, eme ue ngi mi tumikisa ku ubhika, o ku muia Damasku u xala dingi kunu, kuma Jihova ua ki tange, Ió ua bhingi dijina diê a muila Nzambi ia Ilômbo Ieta.