Amoji 3 - O Mikanda Ikola

Kutata phonzo mua Izalaiele mukonda dia ikuma iê

¹ Ivenu kizuelu kia Jihova, uala kuzuela mu kuzoka ni enu, mu anʼa Izalaiele, enuʼoso mu muiji nga mi tombola mu ixi ia Ijitu, kuamba:

² Ku miji ioso mu ngongo enu ngó nga mʼijiia; mukonda dia kienʼiki imbamba ienu ia kutondala kuoso ku mu tondala, nga-nda ku i vutuila phonzo ku thandu dienu.

³ Mala kiiadi a tena kuendela kumoxi, se kala kudivua?

⁴ Hoji i dilʼé ngó mu ditutu, se ki ia mono mbole? Kamona ka hoji kala mu ngenda, hé ua kevu kà dila, ki ka kuata kima?

⁵ Njila i fué ngó bhu mubhetu mu mavu ahatu, se o mubhetu ka u olekela? O mubhetu uzabuké ngó mu mavu, bhene ki bhua fu kima?

⁶ Manhi mbungu ki i xika mu sanzala, athu a kamba kusasumuka? Kima iaiibha mbé ki bhité ngó mu sanzala, ki Jihova ua ki tumu?

⁷ Mukonda Jihova kana-ku kima kia bhanga hé u kamba kuijidisa kikutu kiê ku abhikʼé, o jipolofeta.

⁸ Hoji se ia didi, nanhi u kamba ku kala ni uoma? O Jihova, Nzambi, se ua zuela, nanhi u kamba kuzambula ni upolofeta?

Jindumu ku ahetu mu Samádia

⁹ Ima iii ivisenu-iu mu mazemba ma Ajidode, ni mu jinzu ja matala-matala mʼoxi ia Ijitu. Tangenu-kiu, kuamba: Bhongolokelenu ku mulundu ua Samádia, mu tale o ku di vunza kuónene kuala mu mbonge mumu ni usuéia kua ió a a phopheka muʼaxaxe kê.

¹⁰ Mukonda ku bhanga kia iuka a ki tokoka kala kiambe Jihova, o mu mazemba mâ a sueka-mu kusuína ni kusenguluka.

¹¹ Mukonda dia kienʼiki, Jihova uambe, uixi: sai ni nguma ia-nda ku ku tukulukila anga u konda ixi ié; imbaka ié ia nguzu u i bula, jinzu jé ja matala ua kà ji bhûnda.

¹² Jihova uambe kiki: Mukua ni mubidi ki a tambula inama iiadi ia kibhaku mu kanu dia hoji mba kathumba ka dítui, kiene ue Jihova kia kà bhulula anʼa Izalaiele a tungu mu Samádia; u a tambuila muene ku mizumbu ia muanza mba ku mikambu ia hama.

¹³ Ivenu-kiu, mu te nzongo mu kuzoka ni dibhata dia Jakobo, kiene kia tange Jihova, Nzambi ia Ilômbo Ieta:

¹⁴ Kizuua ki nga kà tata phonzo ia kutondala kua Izalaiele ku thandu diê, nga kà vutula ue phonzo ia jikalatódio mu Betele; jimbinga ja kalatódio a kà ji batula, ja kà sonoka bhoxi.

¹⁵ Inzu ia tungila mbambi ni iii ia tungila mvula, nga kà ji bula; jinzu ja mazu a nzamba ja ka senguluka, ni jinzu ja makota, ja kà kala ni dizubhilu diê, kiene kiambe Ngana.