Amoji 2 - O Mikanda Ikola

¹ O Ngana uambe kiki: Mouabhe kia tondala lutatu mba luuana, kibetu kiê ki ngi ki katula; mukonda ifuba ia sobha ia Idomo ua ioha katé ki ia kituka hála.

² Mukonda dia kiki, Mouabhe ngi mu ta mu túbhia, tuene ni tu jikinisa jinzu ja matala mu Kidiote; o Mouabhe ua kà fila mu kilungutu kionéne, ni mutendu ua ita, ni kuxika koloneta.

³ Mufundixi mu kaxi kà ngi mu katula-mu, o ilamba iê ioso a fuila kumoxi ni muene, kiene kia tange Jihova.

Jindumu kua Juda

⁴ Jihova uambe kiki: Juda kia tondala lutatu mba luuana, kibetu kiê ki ngi mu katula-kiu, mukonda o ngonge ia Ngana a i tènde, o itumu iê a tokoka o ku i bhaka, kia a kala kota o ku diehelela ku makutu ma jinzambi jâ ene-muène, kala kienda jinga o jitata jâ.

⁵ Mu kienʼiki Juda ngi mu ta túbhia, phala tuene tu jikinise o jinzu ja matala-matala mu Jeluzaleme.

Jindumu kua Izalaiele

⁶ Jihova uambe kiki: Izalaiele kia tondala lutatu ni luuana, kibetu kiê ki ngi mu katula-kiu; mukonda muene muthu uambote u mu sumbisa mu mulambôngo; o ngadiama ua bhindama, u mu sumbisa mu phadi ia jisabhatu.

⁷ Ngadiama, ua tate, ene a mu fufujula o mútue mu mavu; o njila ia athu a lenduka a i bhengeleka; anga ela ni tata ni mona a bokona kilumba kiâ kimoxi, mbebhu kuxingisa o dijina diami di kôla.

⁸ U sanga a zeka kumoxi bhu mbanduʼa kalatódio koso-koso, ku thandu dia izuatu ia a ximbikila; o monzo ia jinzambi jâ muene mua nuina o vinhu ia kubhûnda.

⁹ Sumbala kiene, eme o mamodi nga a jikinisa bhu pholo iâ ene, athu a bhingile o kulebha mukuâ ni muẋi ua musédulu ua Libano, o ku nguzu mukuâ ni mukaluvádiu; maji-phe, o ibundu iê ku thandu nga i jimisa, ni jindanji jê bhoxi.

¹⁰ Moxi ia Ijitu ue Eme-muène nga mi katula-mu; makuinhi a uana a mivu u nga mi endesa mu kikangalakata, phala o ixi ia mamodi ni ngi mi bhane-iu i mi kale ixi ienu.

¹¹ Mu kaxi ka anʼenu nga zangumuna-mu amoximu phala kukala jipolofeta, o mu minzangala ienu mua tundu jinaziléu. Jihova uixi: Abha, enu mu anʼa Izalaiele, manhi ki kiene ki kia bhiti?

¹² Maji enu-phe o jinaziléu mua a bhana kúnua vinhu, o jiplofeta mua a fudisa kuila: Ki mu zambule.

¹³ Kuabhu-phe! Mu kienʼiki ue, eme nga-nda ku mi phopheka bhu kididi bhuoso bhu muala, kala kiene mu ku kuta o kita kia iangu mu dikalu diezala, hé diia ni ku di jeketa.

¹⁴ Kienhiki-phe muthu hé uedi u bhebhuluka inama, kulenga kuê ki kuanda kutena ku mu kudila; o mukua nguzu, undanda uê ki ua kà mu bhana kima; dizonda ue ua kà tokoka ku bhângela muenhu uê.

¹⁵ Uambata mufula ka di fike kuila uà kèmana; ua lenguluka inama ue ka kà tena ku di kudila phala nʼa bhulaka, mba ngó bhuòfele-fele uoso ua sambela ku kabalu kuila ua kà bhulula muenhu uê, lémbue!

¹⁶ Katé ni ió ua suina kinéne muʼaxaxe ka mazonda ni akuâ, kizuuʼokio ua kà lenga tuxi-a-thakala! Kiene kiambe Ngana.