Amoji 1 - O Mikanda Ikola

Ikúsu ni jindumu ja kuzoka ni miji

¹ Maka ma Amoji ua kexile mu kaxi ka tubhila tua tokala mu Tekoua, kia mono muene ku mbandu ia Izalaiele, mu izuua ia Uziia, sobha ia Juda, ni izuua ia Jelobouamu, monʼa Jouaji, sobha ia Izalaiele, kuila kua kambe ngó mivu iiadi kitungutisu kiaʼxi ki bhita.

² Hé uzuela, uixi: Jihova ua kà hunza mu Ziione, ua kà bhela mbimbi iê mu Jeluzaleme; mu kikála mua tungile jinge o tubhila muà kala mukondo, o bhu thala ia mulundu ua Kalumelu bhua kà kukuta.

³ Jihova uambe kiki: Damasku kia tondala lutatu mba luuana kibetu kiê ki ngi mu katula-kiu; kuma Ngiliiade a mu bhange mixinga-mixinga ni jifelu.

⁴ Kiene ki bhangesa kuila inzu ia Hazaile nga kà i ta túbhia, anga tu dia ni jinzu ja matala jala mu Bene-Hadade.

⁵ Sabhi ia dikûmba ku Damasku nga kà i bula-ku, o ió a tungu mu Bikiate-Avene nga kà a jima o mbutu ni uoso uala ni mbasá ia Bete-Edene bhu lukuaku; kifuẋi kia akua Sídia a kà ki bheka ku ubhika mu Kile, kuma kiene kiambe Jihova.

⁶ Jihova uambe kiki: Ngaza kia tondala mu lutatu mba luuana, kibetu kiê ki nga mu xindi ki ngi ki katula; mukonda nzungule jihutile jʼambata mu ubhika ua ji ambatela ku ji bhakuila Idomo.

⁷ Kiene ki ngi bhangesa kuila kimbaka kia Ngaza nga kà ki ta mu túbhia anga tu jikinisa jinzu joso ja matala jala mu Ngaza.

⁸ O jithungi a tungu mu Ajidode nga kà a jikinisa kumoxi ni iú uala ni mbasá ia Axikilone bhu lukuaku, anga lukuaku luami nga kà lu vutulula phala kúlua ni Ekolone; o ió a subhuka ku ixi ia Fidíxia a kà a jikinisa, kiene kia tange Jihova.

⁹ Jihova uambe kiki: Tilu kia tondala lutatu ni luuana, kibetu kiê ki nga mu xindi ki ngi ki katula; mukonda o nzungule ia jihutile joso a ji bhakula kua Idomo, o kikutu kia jiphange jâ ka ki xinganeka dingi.

¹⁰ Mukonda dia kiki, kimbaka kia Tilu nga kà ki ta mu túbhia, tuene ni tu jikinisa jinzu jâ ja matala.

¹¹ Jihova uambe kiki: Idomo kia tondala lutatu ni luuana, kibetu kiê ki ngi mu katula na-kiu; mbata phangʼiê ua mu zuididika ni xibhata, henda ioso ia undandu ngué na-iu; njinda iê i jiza ni ku sanujuna ku mivu ni mivu, o kuluuala kuê ki kuene mbambe.

¹² Mukonda dia kienʼiki Temane ngi mu ta mu túbhia ni tua kà jikinisa jinzu ja matala-matala mu Bozola.

¹³ Jihova uambe kiki: Anʼa Amone kia tondala lutatu ni luuana kibetu kiâ ki ngi ki katula; mukonda, mu ku sota ku zanzesa o jimbambe jâ, a tandula ahetu ala ni mavumu mu Ngiliiade.

¹⁴ Mukonda dia kiki, kimbaka kia Labá nga kà ki ta mu túbhia, tuene ni tu jimisa jinzu jâ ja matala-matala, ni ku di kola mu kizuua kia ita, ni kibhungu mu kizuua kia kubhondalala.

¹⁵ Sobha iâ ni ilamba iâ kumoxi, a kàia ku ubhika, kuma Jihova ua ki tange.