Ajeu 1 - O Mikanda Ikola

Ajeu u bazela o povo mukonda dia usudi uâ, anga u a suinisa Kutungulula o tembulu

¹ Ku muvu ua kaiadi ua sobha Dário, bhu mbeji ia kasamanu, mu kizuua kia dianga ku mbeji, kueza dízui dia Ngana, mu ukunji ua polofeta Ajeu, kua Zolobabele, monʼa Selatiiele, nguvulu ia Judá, ni kua Josuué monʼa Jozadake, o nganga ia dikota, uixi:

² Kienhiki kia zuela Jihova dia Ifuẋi, uixi: Mundu iú a mu kuila exi: Thembu kiluua abhiẋila, o thembu ia tokala kutunga dingi o inzu ia Jihova.

³ Kizuelu kia Ngana anga kʼiza mu ukunji ua polofeta Ajeu, kuila:

⁴ Kifua thembu iii phala enu kukala mu jinzu jauabha, o inzu iii ni ixale ngundu?

⁵ Kiki-phe Jihova dia Ifuẋi uambe: Mixima ienu i tongolole hanji kiambote o uendelu uenu.

⁶ Mu kuna nzungule, mu bhongolola idima iòfele; mu dia muene, maji mu lémbua kuikuta; mu nuenu muene, maji dinhota dienu ki di bhu; o kuzuata mu zuatenunu muene, maji mbambi ienu ki ibhu, kuma ki mu tema; ni ió u kalakala, kia tambula o futu iê ku kizuua, u i tambuila mu saku ia kubuka.

⁷ Kiene kiambe Jihova dia Ifuẋi, uixi: Mikima ienu i tongolole hanji kiambote o uendelu uenu.

⁸ Bandenu ku mulundu, muize-ku ni thungu, phala mu tunge dingi inzu iami; o ki mu i tunga ia-nda ku ngi uabhela, mukonda muenhomo muene mua ku ngi jingisa eme, Jihova ua ki tange.

⁹ Muendi ima iavulu, maji mua kuata ngoho ia tolo; o ia tolo iii-phe, kioso ki mueza na-iu mʼonzo, eme ue nga i bhusué. Mukonda diahi? Jihova dia Ifuẋi, uixi: Mukonda dia inzu iami i mudielela, enu-phe mudienu kala muthu u lengela mu kulanga kiambote onzo iê.

¹⁰ Kiene kia bhekela kuila o diulu ki diehela o mbundu iê kusuma, ni mavu ue kukamba kubhana idima iê.

¹¹ Eme nga bheka hâmba ku thandu a ixi, ni ku milundu, ni ku tiliku ni ku vinhu ia ubhe, ni ku maji, ni ku idima ioso ima ku mavu, ni ku thandu dia athu, ni ku thandu dia iama, ni ku thandu dia ikalakalu ioso ibhanga athu ni maku mâ.

Mundu evua o dízui dia Jihova

¹² Bhenhobho Zolobabele, monʼa Selatiiele, ni Josuué monʼa Jozadake, nganga ia dikota, ni mundu uoso evua anga a xikina o dízui dia Jihova Nzambi iâ, ni maka ma polofeta Ajeu, kala Jihova Nzambi iê kia mu tumu ku a tangela; o mundu-phe a kala ni uôma bhu pholo ia Ngana.

¹³ Bhenhobho-phe Ajeu, o mbangi ia Ngana, anga u zuelela mundu o maka moso a mu tangela Ngana, kuila: Eme ngi Jihova ngi kala jinga ni enu.

¹⁴ Jihova anga u phaphumuna o muẋima ua Zolobabele monʼa Selatiiele, nguvulu ia Juda, ni muẋima ua Josuué, monʼa Jozadake, nganga ia dikota, ni muẋima ua mundu uoso, anga eza a kalakala ku inzu ia Jihova dia Ifuẋi, Nzambi iâ.

¹⁵ Mu kizuua kia makuinhi a iadi ni iuana ku mbeji ia kasamanu, ku muvu ua kaiadi ua sobha Dário.