Afundixi 9 - O Mikanda Ikola

Abimeleke u balukila jiphange jê anʼa Ngidiione

¹ Abimeleke, monʼa Ngidiione anga uia bhu Xikeme, ku jindandu ja mamʼâ, u kala mu zuela-nâ kumoxi ni família ioso ia kukuʼâ ku umama uâ, uixi:

² Zuelenu, nga mi diondo, mu mátui ma akua Xikeme oso muexi kiki: Ki mi kala kota kiebhi? O kuila ana oso a Jelubaale, ala makuinhi sambuadi a muthu a mi tumina? Inga kota umoxi u mi tumina? Xinganekenu ue kuma eme ngala ngi kifuba kienu ngi xitu ienu.

³ Jindandu ja mamʼâ anga a mu tumbula muene kala kiambe muene mu mátui ma akua Xikeme oso; miẋima iâ anga i sola kukaiela Abimekele, exi: Muene Phangʼietu.

⁴ Anga a mu bhana makuinhi sambuadi a itadi ia phalata, ia katula mʼonzo ia Baale-belite, Abimeleke anga u futa na-iu iiala ia bhumu, ia di kake, i kala mu ku mu kaiela muene.

⁵ Anga uia ni enhá bhu bhata dia tatʼâ, bhu Ofila, jiphange jê anʼa Jelubaale, o makuinhi sambuadi a muthu, u a jibhila bhu ditadi dimoxi. Ua subhuka-bhu ngó Jotamu, kasule ka Jelubaale, kuma ua suama.

⁶ Bhenhobho akua Xikeme oso, ni akua dibhata dia Beta-Milo, anga a di bhongolola, Abimeleke anga a mu unda ku ungana ua usobha bhu mukaluvalu ua dikota ua kexile mu Xikeme.

Sabhu ia Jotamu

⁷ Jotamu kia zubha ku mu kunda-kiu, uia bhu thala ia mulundu ua Ngedizine, u kala mu ku a kolelela ni dízui dia suina, uixi: Ngʼivienu, enu mu akua Xikeme, phala Nzambi a mʼivue enu.

⁸ Sai kizuua o miẋi iele mu kuunda sobha iâ; anga ambela mudiva, exi: Hinga ungana ua ku tu tumina etu.

⁹ Kuala mudiva-phe, uixi: Kifuá ngi xia maji mami ma fumana ni kua Nzambi ni kua athu, ni ngiie mu kubhekela ngó ku thandu dia miẋi?

¹⁰ Miẋi anga i ambela mufiku, exi: Izá eie, u hinge ungana ua ku tu tumina.

¹¹ Kuala mufiku-phe, uixi: Kifuá ngi xia ibundu iami iatouala, ni ngiie mu kubhekela ngó ku thandu dia miẋi?

¹² Miẋi anga i ambela muvide, exi: Izá eie, u hinge ungana ua ku tu tumina.

¹³ Kuala muvide-phe, uixi: Kifuá ngi xia o vinhu iami i bhekesa kusanguluka ni Nzambi ni athu, ni ngiie mu bhekela ngó ku thandu dia miẋi?

¹⁴ Kia zubha kuzuela kiki, miẋi ioso i ambela musonge, iexi: Izá eie, u hinge ungana ua ku tu tumina.

¹⁵ Kuala musonge: Se kidi kiene mu ngʼunda eme mu kala sobha ienu, izenu mu di kondele mu kilembeketa kiami; o ki mu ila kana, ku musônge ku tunde túbhia tu buidise ni misedulu ia muxitu ua Libanu.

¹⁶ Kiki-phe enu se ki mua bhange kia kidi, kia ujitu, mu kuta Abimeleke ku usobha, se mua bhange kiambote kua Jelubaale ni dibhata diê, se mua bhange kia fuama mu imbamba ia bhangele muene.

¹⁷ Kuma tatʼetu ua mi bhángela ku ita, ua texi o muenhu uê, iu ua mi kudila bhu lukuaku lua akua Midiiana.

¹⁸ Enu-phe kizúua kia lelu mua balukila dibhata dia tatʼetu, enu mua jibha anʼê, makuinhi sambuadi a muthu ku thandu dia ditadi dimoxi, enu mua kuata Abimeleke, monʼa mukamʼê mua mu hingisa ungana ua Xikeme, mukonda dia kukala phangʼienu;

¹⁹ o ki tualʼiki-phe se mua bhange muene kia kidi, kia ujitu, kua Jelubaale ni dibhata diê, sangulukenu ni Abimeleke, o muene ue a sanguluke ni enu.

²⁰ O ki kala-phe makutu, hinu ku tunda túbhia kua Abimeleke, tu buidisa akua Xikeme, ni dibhata dia Beta-Milo; ku tunde ue túbhia kua akua Xikeme ni ku dibhata dia Beta-Milo tu buidise Abimeleke.

²¹ Jotamu anga u tunda-bhu, u lengela ku Beele u tunga koko, mukonda dia uoma ua phangʼiê Abimeleke.

Nga hale u longesa akua Xikeme kukitukila Abimeleke

²² Kioso Abimeleke kia kala mu tumina Izalaiele mu mivu itatu,

²³ Nzambi anga u bheka unguma bhuʼaxaxi ka Abimeleke ni akua Xikeme; akua Xikeme anga a bhanga ufe kua Abimeleke.

²⁴ Kienhiki kia bhiti mbebhu o ujibhanganga ua bhange muene (Abimeleke) kua anʼa Jelubaale, o makuinhi sambuadi a muthu, kituxi kia manhinga mâ phala kʼize ku thandu dia phange iâ Abimeleke ua tenene ku a jibha, ni ku thandu dia akua Xikeme a mu suinisa mu kujibha jiphange jê.

²⁵ Akua Xikeme anga a tuma ingumba, mu batamena ku matala ma milundu, anga a kala mu bhûnda athu oso a bhita mu ikoka. Kienhiki anga bhu kala athu a tuma ku ki tangela Abimeleke.

²⁶ Bhu kaẋiʼabha ue, Ngahale monʼa Hebede, u taúla ni jiphange jê, hé eza a tunga mu Xikeme; akua Xikeme-phe anga a kala mu ku mu dielela jinga muene.

²⁷ Anga aia ku mábhia, a muna mivide iâ, a titidila jiuva mu ditangi, a keta vinhu anga a kala mu bhanga kizokola, a bokona mʼonzo ia nzambi iâ, o mu fesa, Abimeleke enda ni ku mu longolola ni ku mu xinga.

²⁸ Ngahale monʼa Hebede anga u zuela, uixi: Abimeleke muene mukua-hi, phala etu tu akua Xikeme tu kale mu ku mu bhikila? Manhi ki monʼa Jelubaale? Kadifele kê ki Zebule? Mʼokulu ka kexile mu bhikila família ia Hamolo, ua tunga o dibhata dia Xikeme? Etu-phe mbebhuʼohi tu kala mu mu bhikila muene?

²⁹ Auá! Tamanu mundu iú a dʼivile ni eme, Abimieleke ngeji ku mu katula-ku. Ngeji ku mu ambela, kuila: Ka di bande dingi ni akuenu, muize tu bhânge.

³⁰ Zebule-phe, a mu bhana kutumina o dibhata dia Xikeme kievu kiala kuzuela Ngahale monʼa Hebede, njinda i mu kuata.

³¹ Anga mu kasuekele u tuma jiphunga, kua Abimeleke bhu Aluma, uixi: Kunuze Ngahale monʼa Hebede ni jiphange jê eza mu Xikeme, ala mu kitukisa o mundu, phala eie a ku lunguluka.

³² Zanguka-phe mu usuku, ni eie ni makuenze oso u uala-nâ, mu a batamene mu mukáu;

³³ o ki kúkia, dikumbi dʼila di tunda, dibhata mu di tukumuise; o muene ni makuenze-mê ki a-nda kutunda mu kubhânga, eie phala uijiie ku a bhanga kioso ki ua tena.

Abimeleke u tolola Ngahale ni akua Xikeme

³⁴ Abimeleke anga u balumuka ni makuenze mê moso, enda ni usuku, a batamena dibhata dia Xikeme, a di bhanga ibuka iuana, dibhata a di ta mu kaẋi.

³⁵ Mu kimene Ngahale monʼa Hebede anga u kala mu kuimajana bhu muelu ua kimbaka; Abimeleke ni makuenze-mê kia mu mono, a balumuka mu iangu.

³⁶ Ngahale anga u a mona, u ambela Zebule, uixi: Ianhá athu ala mu kulumuka ku thala dia milundu. Zebule-phe u mu ambela ni ku mu ta kixanga, uixi: Ua mono ilembeketa ia milundu iedi kala athu.

³⁷ Ngahale u zuela lua mukuá, uixi: Athu muene ala kutuluka bhu thala dia mulundu, kibuka kia mukuá kiala kuijiia ku njila ia Mulemba ua Azambuidi.

³⁸ Bhenhobho Zebule u mu ambela, uixi: Dikanu-phe kiá dia kukala kuebhi? Ua kexi mu kuila, uixi: Abimeleke mukua-hi, phala etu tu kale mu ku mu bhikila? Ki enhá ua kexi mu a tobhesa? Nga ku diondo, tunda-ze kiá u bhânge-nâ.

³⁹ Ngahale anga u tuamenena akua Xikeme mu kutunda phala kubhânga ni Abimeleke.

⁴⁰ Abimeleke anga u mu bhesa lusolo, u mu kaia, anga ku buika athu avulu a a kuama bhenhobho, katé bhu muelu ua kimbaka.

⁴¹ Abimeleke anga u xala bhu Aluma; Zebule anga u kaia Ngahale ni jiphange jê, phala ka tunge dingi mu Xikeme.

⁴² Ki kúkia mundu anga a tunda dingi aia mu mukáu; Abimeleke anga a mu tangela-kiu.

⁴³ Muene anga u katula mundu uê, u a uana mu ibuka itatu, u a batemena mu mukáu; mu kutala anga u mona mundu ala kutunda mu sanzala, anga u balumuka, u di zangula-nâ, u a kuama.

⁴⁴ Abimeleke ni kibuka kié aia-nê kumoxi anga a lenga a batuila akua bhata bhu muelu ua kimbaka kiâ; ibuka iiadi ia mukuá a solomona iá ala mu mukáu, a a nemeka uê.

⁴⁵ Abimeleke anga u lua ni dibhata kizuua kioso kienhókio, dibhata anga u di tambula, u jibha mundu uoso uala-mu; dibhata dioso anga u di sengulula, u di kuua môngua.

⁴⁶ Kienhiki-phe akua kathondo mu mbonge ia Xikeme kia zubha ku kʼivua, ene oso a di kondela mu kinjandanjanda kia inzo ia dihamba dia Belite.

⁴⁷ Anga bhu kala athu a ki tangela Abimeleke, exi-ze akua mbonge ia Xikeme ene oso a di kondela mu kinjandanjanda.

⁴⁸ Abimeleke anga u banda bhu thala ia mulundu ua Zalamone, ni muene ni mundu uoso aia-nê. Abimeleke muene uambata kisesu bhu maku, anga u ximba kisasa kia muẋi mu ditutu, u u zangula, u u ta bhu kisuxi kiê; anga u ambela mundu uoso uala-nê kumoxi, uixi: Lengulukenu! Kioso ki mua ngi mono eme kubhanga, enu uenu kiene ki mu bhanga.

⁴⁹ Ene oso anga a fikisa kia bhange muene, kala muthu u ximba muẋi uê, hé a kaiela Abimeleke, miẋi ioso anga a i lumala ku thandu dia dikungu dia kubokuena mu kinjandanjanda, anga a i ta túbhia. Mundu uoso ua akua mbonge ia kathôndo ka Xikeme anga a fuila momo, midi ia muthu i tena, ni mala ni ahatu.

Ufuilu ua Abimeleke

⁵⁰ Mu kutunda-bhu, Abimeleke uia bhu Tabeze, dibhata u di ta mukonda, u di lua, anga u di tambula.

⁵¹ Muʼaxaxi ka dibhata anga mu kala mbonge ia matala ia lebha kipena, akua bhata oso muene mua lengela ni mala ni ahatu, a di jikila momo, anga a banda ku thandu dia kipena kia mbonge ienhoio.

⁵² Abimeleke anga u bhixila bhu mbonge ienhiʼii, u kuata ku i lua, anga u zukama ku dibhitu diê phala ku di ta túbhia.

⁵³ Anga bhu kala muhatu ku thandu, u laula ditadi dia kuhuhila mu mútue ua Abimeleke, hé u mu bula o katutu ka uôngo mu kaẋi.

⁵⁴ Muene anga u ixana lusolo kibese kiê ua mu ambatela ibakatu ia ita, uixi: Fomona xibhata ié nda u ngi zubhidise, athu ka kale mu kuila exi: muhatu ua mu jibha. Kibese kiê anga u mu toma mu muẋima, u fuila bhobho.

⁵⁵ Mala oso a akua Izalaiele kia mono kuma Abimeleke a mu jibha, a muangana kala muthu ni muthu ku bhata diê.

⁵⁶ Kala kiki Nzambi ua bheka dingi ku thandu dia Abimeleke o kituxi kiê kia tele kua tatʼâ, mu jibha o jiphange jê makuinhi sambuadi a muthu!

⁵⁷ Kiene ue kimoxi o kituxi kia akua Xikeme Nzambi ua ki bheka dingi ku thandu diâ. Mázui ma a kuata ma a tele Jotamu monʼa Jelubaale.