Afundixi 6 - O Mikanda Ikola

Akua Midiiana a bhikisa Izalaiele

¹ Anʼa Izalaiele anga a tona dingi kubhanga kiaiibha ku mesu ma Jihova; o Jihova anga u a bhakula bhu lukuaku lua akua Midiiana mu sambuadi dia muvu.

² Lukuaku lua Midiiana, anga lu lenda Izalaiele ni kusuina kuavulu; mukonda dia uoma ua Midiiana anʼa Izalaiele anga a di iudikila jingenda mu milundu, ni mabanda, ni imbaka.

³ Anga a kala mu kuila, Izalaiele kia zubha kudima ni kukuna, akua Midiiana eza, ni akua Amaleke, ni ana amukuá ku thunda-mbulu, eza mu ku a sota;

⁴ anga a ta ibangu iâ, enda ni kúdia ioso ia sabhuka mu mavu, katé bhu mbambe ia kubhiẋila mu Ngaza; o mua Izalaiele ka xi-mu idima, mba mbudi, mba ngombe, mba bulu.

⁵ Kuma eza jinga ni ibhaku iâ, ni jibalaka jâ; eza mukuâ ni kihoho mu kuvula; ni ene ni jikamelu jâ mu lémbua ku a kuata konda; anga a di zala mʼoxi ioso mu ku i buidisa.

⁶ Anʼa Izalaiele anga eza mu uadiama uavulu mukonda dia akua Midiiana; anʼa Izalaiele anga a dikola kua Jihova.

⁷ Kioso-phe kia kuata anʼa Izalaiele kudikola kua Jihova, mukonda dia akua Midiiana,

⁸ Jihova muene u tuma polofeta kua anʼa Izalaiele, u a ambela, uixi: Eme Jihova, ngi Nzambi ia Izalaiele, ngambe kiki: Eme muene nga mi katula mu Ijito, nga mi katula mu dibhata dia ubhika,

⁹ nga mi kudila bhu lukuaku lua akua Ijitu, ni bhu lukuaku lua athu oso a mi bhikisa, eme ngʼa kaie bhu pholo ienu, nga mi bhana o kubhingana mʼoxi iâ;

¹⁰ Eme nga mi ambela ngixi: Eme Jihova, Nzambi ienu; enu ki mu kale ni uoma ua jinzambi ja akua Mamodi a vuile oxi iâ, lelu i mua tungu enu. Enu-phe, ki mua ngʼivu dízui diami.

Anju ia Jihova i tukulukila Ngidiione

¹¹ Anju ia Jihova anga iiza, i xikama moxi a mukaluvalu ua kexile mu Ofila, ua tokala kua Jouaji mukua Abi-ezele; o monʼê ua diiala, Ngidiione, anga u kala mu vunda tiliku mu ditangi dia kukamena vinhu, phala akua Midiiana ka i mone.

¹² Anju ia Jihova anga i mu tukulukila, i mu ambela, ixi: Jihova uala ni eie, u dizonda dia nguzu.

¹³ Ngidiione anga u mu ambela, uixi: Ngana iami tata, Jihova se uala ni etu, ima ioso iii ia tu ijila-hi? o ikalakalu iê ia madiuanu ii kuebhi, ia kexi mu tu kunda adiʼetu, exi: Manhi ki Jihova muene ua tu katula mu Ijitu? Kikiphe Jihova ua tu ambudisa, iu ua tu bhakula bhu lukuaku lua Midiiana.

¹⁴ Bhenhobho Jihova anga u mu ila, sui, uixi: Ndeie mu uzonda uê uenhú, u kudile Izalaiele bhu lukuaku lua Midiiana; manhi ki eme muene nga ku tumu?

¹⁵ Muene anga u mu ambela, uixi: Ngana, tata, eme Izalaiele ngi mu kudila ni kima kiahi? O kibuka kia vumu dia tatʼetu, kiene kiala ndenge mu muiji ua Manasa, o mu bhata dia tatʼetu, eme-eme ngala ngi kasule kâ.

¹⁶ Jihova anga u tuma dingi ku mu ambela, uixi: Eme ngi kala ni eie sé kufula, akua Midiiana-phe ua kà a nemeka kala muthu umoxi ngó.

¹⁷ Muene anga u mu ambela, uixi: Se nga sange kiadi bhu mesu mé, ngi bhane kijimbuete kuila eie muene u Jihova ua-lu zuela ni eme.

¹⁸ Bhu ualʼobho, nga ku diondo, ku tunde-bhu, katé ki ngi ku bhekela ujitu uami, ni ngi ku tudila-u. Uixi: Ngi ku kinga katé ki uiza dingi.

¹⁹ Ngidiione anga uia mʼonzo u kuata xitu ia mona hombo, ni jimbolo ja kambe o kifulufulu kia felemendu ji bhinga efa ia fuba; xitu anga u i ta mu ngalu, o muzonge u u ta mʼombia, anga u tunda uiza na-u moxi a mukaluvalu, u mu bhana-u.

²⁰ Anju ia Nzambi anga i mu ambela, uixi: zangula o xitu ni jimbolo u i tule bhu ndánji bhabha, o muzonge u u lundulule ku thandu, Muene anga u ki bhanga.

²¹ Bhenhobho anju ia Jihova u sunununa o dikoue dia mu kala bhu lukuaku luê, u tula o sungu iê ku xitu, ni ku jimbolo ja kambe kifulufulu kia kinanesa; bhu ndánji anga bhu fuáfua túbhia, ni xitu ni jimbolo anga ijokota; anju ia Jihova anga i mu jimbila ku mesu.

²² Ngidiione anga u mu mona kuma anju ia Jihova; Ngidiione uixi: Aiué, Jihova Nzambi, tata! Manhi anju ia Jihova nga di mono-nê pholo ni pholo.

²³ Jihova anga u mu ambela, uixi: Tululuka; ku kale ni uoma; ku fu, kana!

²⁴ Ngidiione anga u tunga bhenhobho kalatoídio ka Jihova, u kexana uixi: Jihova muene Paze; ka-ké hanji katé mu kizuua kia lelu mu Ofala dia akua Abiiezele.

Ngidiione u bula kalatódio ka Baale

²⁵ Anga ki bhita kuma, usuku uenhó Jihova u ambela Ngidiione, uixi: Kuata ndumbe ia ngombe ia tatʼenu, iene ngombe iê ia kaiadi, ia sambuadi dia kiubha, u bula-bule kalatódio ka Baale, kala na-ku tatʼenu, u kokele bhoxi ditutu diala bhu mbandu iê;

²⁶ u tunge kalatódio ka Jihova Nzambi ié, ku thala bhu kididi kiki kia di fikidila bhuoso bhua tokala, u ka iudika kiambote ka sokelele, u kuate o ngombe ia kaiadi, u i bhane mu sata ia kuoha, o ditutu di ua-ndu kokela bhoxi, diene di kala jihuinhi.

²⁷ Bhenhobho Ngidiione anga u katula kuinhi dia muthu ku akua mbèle iê, u bhanga kioso kia mu ambela Jihova. Maji mukonda-phe dia kukala ni uoma ua ndandu ja tatʼâ, ni mala amukuá a akua bhata diê, ka tena ku ki bhanga mu muânha, maji u ki bhanga-phe mu usuku.

²⁸ Kukia ni kimene, akua bhata kia balumuka ku kilu, a sanga kalatódio ka Baale a ka bulu, muxitu bhu mbandu ié a u kokela bhoxi, ngombe ia kaiadi a i satela ku thandu dia kalatódio kengi ka tungu-bhu.

²⁹ Anga a di ibhula mudiâ, exi: Nanhi muene ua bhange kiki? Kia zubha kuibhula ni kutokuesa kiambote, exi: Ngidiione, monʼa Jouaji, muene ua bhange kienhiki.

³⁰ Akua bhata bhenhobho anga ambela Jouaji, exi: Monʼé mu tubhule bhu kanga, phala afue, mukonda muene ua bulu kalatódio ka Baale, iú ua koka muxitu ua kexile bhu mbandu ié.

³¹ Jouaji anga u ambela enhá oso a mu bhongolokela, uixi: Kifua Baale mu mu bhângela enu? Enu mua-nda ku mu bhulula? Uoso uambe ku mu bhângela, a-nda ku mu jibha kimene kia lelu kienhiki. O ki kala Baale nzambi iene, a di bhângele muene, mukonda sai muthu ua mu budila kalatódio kê.

³² Tunde mu kizúua kienhokio Ngidiione a mu luka Jelubaale, kuma Jouaji uedi, uixi: Baale muene a bhânge ni ió uoso ua bulu kalatódio kê.

Kilômbo kia Midiiana kia lukula. Kijimbuete kia kindemba kia mbudi

³³ Kienhokio akua Midiiana oso, ni akua Amaleke, ni ana amukuá mu thunda-mbulu, a di bhongolola kumoxi, anga Njolodá a mu zaúka, a ta kibangu mu honga ia Jezeele.

³⁴ Nzumbi ia Jihova phe i tula kua Ngidiione, muene anga u xika koloneta; akua Abi-ezele anga a bhongoloka mu ku mu kaiela.

³⁵ Anga u tuma jiphunga mʼoxi ioso ia Manasa; ene uâ anga a bhongoloka mu ku mu kaiela. Anga u tuma ue jiphunga mua Asele, ni mua Nzebulone, ni mua Nafitali; anga eza mu kutakana-nê.

³⁶ Ngidiione-phe u ambela Nzambi, uixi: Hé Izalaiele ua-nda ku mu bhuluila muene bhu lukuaku luami, kala ki ua ki tange,

³⁷ talesa, lelu ngi zala kibha kia mbudi ni kindemba kiê bhu kanga dia kubhiatela; se bhu kala dimune ku kindemba ngó, bhoxi bhuoso bhua kukuta, ngi kʼijiia kuma eie ua-nda bhuluila Izalaiele bhu lukuaku luami, kala ki ua ki tange.

³⁸ Anga ki bhita kuma ki kúkia, u balumuka mu kimene, u futa kibha kia kindemba, hé u kama dimume diala-mu, ditijela diezala menha.

³⁹ Ngidiione anga u ambela dingi Nzambi, uixi: Njinda ié Ngana, ki i ngi uamene, ngi zuele ngó lumoxiʼulu; ngi fikise-ku dingi, nga ku diondo, ngi te kindemba lumoxi ngó; kiki-phe o kindemba ngó ki kukuta, bhoxi bhuoso bhu kala dimume.

⁴⁰ Nzambi anga u ki bhanga usuku uenhó; kuma kindemba ngó kiene kia kukuta, bhoxi bhuoso bhuala dimume.