Afundixi 5 - O Mikanda Ikola

Muimbu ua Debola

¹ Debola ni Balake monʼa Abinouamu, anga emba muimbu uâ, kizúua kienhókio, exi:

² Kuma atuameneni a tuamena mua Izalaiele, kuma o mundu a di bheka ni vondadi mu kúlua ita, sakidilenu Jihova.

³ Ivenu, enu mu jisobha; bhanenu mátui enu mu anʼa jinganga; ngimba, eme bhabha ngimbila muene Jihova, ngimba mu ximana Jihova, Nzambi ia Izalaiele.

⁴ Há! Eie u Jihova, ki ua tundile ku Seíle, ki ua kuata kuenda mu mukáu ua Edomo, oxi ia tunguta, katé ni maúlu ma zenzama ni kumbomba menha, o matuta mavundu ma sonona menha.

⁵ Milundu ia botomoka bhu pholo ia Jihova, katé ni ua Sinai, kia mu tukulukila Jihova, Nzambi ia Izalaiele.

⁶ Mu izúua ia Sangale monʼa Anate, ni mu izúuua ia Jaiele, madiendu ma batukile mu ikoka, jingenji jendela jinga mu tunjila tua bhengalala.

⁷ Jisanzala ilombo jingûndu mua Izalaiele, ki mu moneka jinga athu a tunga-mu! Ni muene: Loloó! katé ki nga balumuka eme ngi Debola, nga balumuka mu kukala ngi kivuadi mua Izalaiele.

⁸ Izalaiele kiedile a sola jinzambi jengi; ku mabhitu a imbaka kua a tukuluka ita; ni ngubu ngó ni sosa ki i moneka dingi, mu makuinhi auana a midi ia akua Izalaiele.

⁹ Muẋima uami-phe ua lungu ku ilolo ia Izalaiele a tuamena ilolo ia Izalaiele, a di bheka ni vondadi mu kúlua, sakidilenu ni kuximana Jihova.

¹⁰ Enu mua sambela ku jibûlu jizela, enu mua xikama ku jixalemanda ja iuka kinéne, enu mua-lu bhita mu jinjila, ambenu-kiu.

¹¹ Tangenu-kiu bhua kondama, kolenu o kikoue kia Jihova tangenu-kiu bhu matabhu bhuene mu tekela o menha, bhuene bhua kà tela o maka ma uzonda ua Jihova, mu kubhângela mabhata mê ma Izalaiele; mundu ua Jihova ua bhongoloka dingi, emba o kikoue kia Jihova bhu mielu ia imbaka!

¹² Phaphumuka, phaphumuka, eie Debola! Phaphumuka, Phaphumuka, u kuate kuimba muimbu, balumuka, eie Balake, monʼa Abinouamu, u kute enhó a ku kutile eie!

¹³ Mundu ua Jihova bhenhobho a tundu, ni ikuinda iê, oso a xala-ku, a tundu mu bhânga, mazonda ni mazonda.

¹⁴ A tundu mua Ifalaíme, a kulumuka mu honga kúlua ni Amaleke, ki kua tundu monʼa kilumba Debola, a mi kaiela ku kunda, o mala a Bejamí ni kilombo kiâ mua Makidi mua tundu ilolo ejiia kutumina, mua Nzebulone muene mua tundu o jikabhitango;

¹⁵ makuenze a Isakale a zuama kua Debola, akuʼâ Isakale a bande Balake, a di lukula muene mu honga, mu kaiela o hoka ia manhanhu mê ku mabhata ma Lubene, bhu mbanduʼa Jihonga, a di kuatela-bhu jiphata ja kàka kinene!

¹⁶ Eie-phe ua xikamena-hi mu ibhanga ia ibhaku, ua landukila o mbendu ia tufunga tua jimbudi? Ku mabhata ma Lubene jiphata ja muẋima, ja vulu ja di kuatela bhu mbanduʼa jihonga!

¹⁷ Ngiliiade ua xala kiá ku sámbua dia Njolodá, Dane u suua jinaviiu jê; Asele ua di nenga bhu ndundu ia kibumu kia musanza ua kalunga. Iu ua dixibhê bhu kuakelu dia jinaviiu, ka xikina kutunda mu jihonga jê.

¹⁸ O Nzebulone-phe mundu uê ua zemba o muenhu, kumoxi ni Nafitali a tunda mu kanga; kuala o mvunda iavulu, ka xikina kulenga.

¹⁹ Jisobha bhenhobho ji tula mu kubhânga a bhângela bhenhobho, jisobha ja Kanana, a bhángela bhu Taanake, bhu ménha a Mejidu, bhua tundu-phe kubhanduluka kuahi? Ka bhundu-bhu kitadi kia phalata mba ulu.

²⁰ Katé ni jithéthembua ku diulu ja di te-mu, jithéthembua mu ʼnjila jâ jala kúlua ni Xixela.

²¹ Honga ia Kixone ia a kungulula, honga iókulʼoio, honga ia Kixone. Muenhu uami-phe enda, ki ngi kala ni uoma!

²² U ivua ikoto ia jikabalu ii titila bhoxi, ja mazonda a ita aia ni ku di kaia-kaia.

²³ Mezolo mu bhubhididienu, Anju ia Jihova ua kiambe, akua-bhata dienhodio a bhubhididienu kiaiibha muene, mukonda ka tundile mu banda Jihova, mu banda Jihova kumoxi ni makuenze mê.

²⁴ Mu ahtu ni akuâ, Jaiele a tane-ku, mukaji a Hebele ua tokala mu Kene; mu ahatu a tunga mu jibalaka, muene a tane-ku!

²⁵ Kuma ua mu bhingi menha, muene u mu bhana lete; lete ia di kuata, mu nganza ia ungana, u mu tela-iu muene katé ki aia ku kilu.

²⁶ U sunununa lukuaku lua kiasu, u kuata o phapha; lukuaku lua kúdia lu kuata o martelu; u ṗhuṗha Xixela, u mu bulʼo mútue; mútue u budika katé bhu phapha ia dítue.

²⁷ U bulukutila bhu inama iê, ua tandelela muene, u zeka, koto-koto! Bhua bulukutila bhu inama iê, ua sunanana muene, bhene bhua zeka, uafu.

²⁸ Mama ia Xixela u zongola bhu njanena, u talesa-phe mu kanga, u ialela mu mazungu, uixi: Dikalu diê dia kokolokela-hi? Malola-mê ki tu mʼevila-hi mu kuiza? O jikabalu jê ja kokolokela-hi mu kuenda?

²⁹ Ilumba iala-bhu i mu vutuila kiambote, muene ue u di vutuila dingi muenié-muene:

³⁰ Hinu iá uana imbamba ia bhûndu mu ita; diiala dimoxi a mu bha kahatu, mba tuhatu tuiadi, Xixela hinu divunga diê dióteke ku idífua-idífua. Divunga dióteke ku idífua-idífua, ku mizumbu iê a di bolodala. Eme-phe xalemanda, kuia divunga dioteke, kuia dingi kamusanga mba tuiadi, tua kuzuata mu xingu.

³¹ Nguma jé, u Jihova, ji buike kienhiki, oso-phe a ku zola, a benhe kala dikumbi, kioso ki di tunda ni nguzu iê ia kumuika.

³² Ixi anga i tululuka mu makuinhi a uana a mivu.