Afundixi 4 - O Mikanda Ikola

Jabine sobha ia Kanana u bhikisa ue Izalaiele

¹ Anʼa Izalaiele-phe anga a tona dingi kubhanga kiaiibha ku mesu a Jihova, kia zubha Ehudi kúfua.

² Jihova anga u a bhakula bhu lukuaku lua Jabine, sobha ia Kanana, u kala ni mbanza iê ku Hazole, o kabhitangu ka kifuẋi kiê Xixela, ua tungile bhu Halosete ia matumbu.

³ Bhenhobho anʼa Izalaiele anga a dikola kua Jihova, kuma Jabine muene u kala ni hâma ʼvua ia makalu a felu; anga u suína kiavulu ni kubhikisa anʼa Izalaiele mu makuinhi aiadi a muvu.

Debola ni Balake a kudila Izalaiele

⁴ Kiki-phe Debola, polofeta ia muhatu, ua sakana ni Lapidote, u kala mu fundisa Izalaiele thembu ienhoio.

⁵ Muene anga u tunga bhu diie dia Debola, bhu kaẋi ka Lama ni Betele, mu milundu ia Ifalaime; anʼa Izalaiele anga a kala mu banda bhu bhata diê mu ku a fundisa.

⁶ Muene anga u tuma kuixana Balake monʼa Abinouamu, bhu Kadexi ka Nafitali, anga u mu ambela, uixi; Ku kʼijiia kuma Jihova Nzambi ia Izalaiele ua ku tumu kuila: Ndeie u bhongoluele athu ku mulundu ua Tabola, u katule kuinhi dia midi dia mala ku anʼa Nafitali ni anʼa Nzebulone?

⁷ Eme-phe ngi bhangesa kuila Xixela, kabhitangu ka kifuẋi kia Jabine, ni makalu-mê ni mundu uê, ngʼa bheka mu honga ia Kixone, hé ngi mu bhakula bhu lukuaku lué.

⁸ Balake anga u vutuila Debola, uixi: Eie ue se uia mu ngi bheka, ngiia; eie-phe ki u kamba kuia, eme uami ki ngiʼii-ku.

⁹ Debola, uixi: Ngiia muene, ngi ku bheka; maji-phe njila iii i ua-nda kuendiʼii, eie kua-ndu katula-ku kijingo phala eie, kuma Jihova ua-nda kubhakula Xixela bhu lukuaku lua muhatu. Debola anga u balumuka, uila kumoxi ni Balake katé bhu Kadexe.

¹⁰ Balake bhenhobho anga u kasa Nzebulone ni Nafitali, anga a bhongolokela bhu Kadexe; anga u banda ni kuinhi dia midi dia mala kumoxi ni muene, ni Debola ue u ila-nê kumoxi.

¹¹ Tala, Hebele-phe, mukua Kene, ua di abhula mu akua Kene ni akuâ, anʼa Hobabe uko-ua-kimi ua Mozé, iú ua ximbika balaka jê makanga engi, katé bhu muẋi ua dikota ua mukaluvádiu mu Zananime, bhua zukama mu Kadexe.

¹² Anga a ki tangela Xixela kuila Balake monʼa Abinouamu, ua bande ku mulundu ua Tabola.

¹³ Xixela anga u bhongolola makalu mê moso, hâma vua ia makalu ma felu, ni mundu uoso uala-nê tunde bhu Halosete ia matumbu, anga a kulumuka mu honga ia Kixone.

¹⁴ Debola bhenhobho anga u ambela Balake, uixi: Balumuka kiá; mukonda o kizuua kia lelu kiene kia ku telekala Xixela bhu lukuaku lué kuala Jihova; manhi kua kʼijiia kuma Jihova muene ua ku tuamena kiá? Kienhiki Balake u kulumuka mulundu ua Tabola, ni kuinhi dia midi ia mala aia-nê kumoxi.

¹⁵ Jihova anga u dimbula Xixela, ni makalu mê moso, ni kifuẋi kiê kioso, ku mazu a xibhata bhu pholo ia Balake; Xixela muene anga u tuluka mu dikalu diê, hé u lenga lusolo ni inama bhoxi.

¹⁶ Balake-phe uia ni kukaia makalu, ni kukaia kilombo kioso kia kifuẋi kia Xixela katé bhu Halosete ia matumbu; kifuẋi kioso kia Xixela anga a ki leleka ku mazu a xibhata; ki bhuala diiala dia xala-bhu, né umoxi ngó.

Xixela a mu jibha kuala muhatu Jaiele

¹⁷ Maji-phe Xixela muene u lenga ni inama bhoxi katé bhu balaka ia Jaiele, mukajiʼa Hebele, mukua Kene; kuma Jabine sobha ia Hazole, uala ku paze ni dibhata dia Hebele, mukua Kene.

¹⁸ Jaiele anga u tunda mu kauidila Xixela, u mu ambela, uixi: Tu sange, ngana iami, tu sange! Bokona mu balaka iami, kana kukala ni hele. Muene anga u bokona mu balaka iê, muhetu anga uzangula dibeka hé u mu futa.

¹⁹ Xixela anga u mu ambela, uixi: Nga ku diondo, ngi bhane-ku tuménha, ngi nue; dinhota dia ngi kuata. Muene anga u jikula kisudi kia lete, u mu bhana kúnua, anga u mu futa dingi ni dibeka.

²⁰ Xixela, anga u mu ambela, uixi: Imana bhu muelu ua balaka, o ki kala bhu iza muthu u ku ibhula, kuila: Momo ki muala diiala? Eie ua kèla: Ki muala.

²¹ Bhenhobho, Xixela kiaii ku kilu, Jaiele, mukajʼa Hebele, u katula phapha ia balaka, ni martelu ia kubatela na-iu, hé u i kuata bhu lukuaku luê, u mu zombela bhuoso bhuala, u mu batela phapha mu mútue, phapha anga i tundidila i kuata mu mavu, kuma uaii ku kilu kiavulu; anga u ambukila bhobho, u fua.

²² Kubhanga kithangana Balake ue u tula, uala kuiza ni kukaiela Xixela. Jaiele anga u tunda mu ku mu kauidila, u mu ambela, uixi: Izá, ngi ku idikize diiala uala ku mu sota. Anga u bokona-nê, u sanga Xixela iú ua zekʼú, uafu kiá, ni phapha ia balaka ia mu kubu mu mútue.

²³ Kienhiki, Nzambi ua sokomona Jabine, sobha ia Kanana, bhu pholo ia anʼa Izalaiele, kizúua kienhokio.

²⁴ Lukuaku lua anʼa Izalaiele anga lu nema dingi kiavulu ku thandu dia Jabine, sobha ia Kanana, katé anʼa Izalaiele kia buidisa Jabine sobha ia Kanana.