Afundixi 21 - O Mikanda Ikola

Akua Izalaiele adila jiphange jâ o muiji ua Bejamí kuma ua jimi

¹ Akua Izalaiele-phe a lokelele bhu Mixipa, exi: Ki bhu kale muthu mudietu u bhana monʼê ua muhatu mu sakana mu akua Bejamí.

² Mundu anga eza bhu Betele, a xikama bhenhobho bhu pholo ia Nzambi katé mu kumbi dia ngoloxi, anga a suina mázui ni kudila kiavulu.

³ Exi: Aiué, Jihova, Nzambi ia Izalaiele, tata! kia bhiti kiebhi, Ngana mua Izalaiele? kuila leluʼidi mua Izalaiele mua kambe kiá muiji umoxi?

⁴ Bhenhobho anga ki bhita kuila ki kúkia ni kimene, mundu a di meneka, anga a tunga-bhu kalatódio, a bhana jisata ja kuoha, ni jisata ja kubhandulula.

⁵ Anʼa Izalaiele, anga a zuela, exi: Mu miiji ioso ia Izalaiele, nanhi muene ua kambele kuiza bhu kionge kia Jihova? Kuma a lokele muloko ua dikota, exi: Uoso u kamba kuiza bhu pholo ia Jihova bhu Mixipa, u kala muthu ua ku mu jibha.

⁶ Anʼa Izalaiele anga a diela mukonda dia phangʼiâ Bejamí, exi: Lelu kua Izalaiele kua batuka kiá muiji umoxi.

Akua Bejamí asubhuka-ku a a sotela ahatu

⁷ Ki tualʼiki, a subhuka-bhu-phe tu bhanga-nâ kiebhi mu ku a sotela ahatu, etu tua loka kiá mu dijina dia Jihova kuma anʼetu a ahatu ki tu xikina ku a bhana-nâ mu kusakana?

⁸ Anga a zuela, exi: Muiji kuxi-phe, ku miiji ia Izalaiele, ua kambele kubanda kua Jihova bhu Mixipa? Mu kuibhula-phe anga a mona kuila bhu kibangu ki bhuala muthu ua tundu bhu Jabezi dia Ngiliiade iu ueza bhu kionge.

⁹ Mukonda kialula o mundu, akua-bhata bhu Jabezi dia Ngiliiade ki bhuala muthu.

¹⁰ Kilombo anga ki katula kuinhi dia midi ni midi jiiadi, ja mala a tundu akuâ oso mu uzonda, anga a a tuma, exi: Ndenu ka nemekienu akua-bhata bhu Jabezi dia Ngiliiade ku mazu a xibhata, katé ni ahatu ni ana-ndenge.

¹¹ Mua kà bhanga-phe kiki: Mala oso mua kà a buidisa, ni ahatu oso a zeka kiá ni mala.

¹² Anga aia a sanga muʼaxaxi ka akua-bhata bhu Jabezi dia Ngiliiade hâma jiuana ja ana a ahatu, hanji anʼandenge, kejiia luua mala mu kuzeka-nâ; enhá anga eza-nâ bhu kibangu mu Silu, mʼoxi ia Kanana.

¹³ Kilômbo kioso anga ki tuma kuzuelesa anʼa Bejamí ala bhu Ndànji ia Dimone a di tambulula-nâ anga a a kolela paze.

¹⁴ Akua Bejamí anga a vutuka thembu ienhoio, eza ku bhata, anga a a bhana ahatu, oso kiá a a bhulula ni muenhu ku ahatu a Jabezi dia Ngiliiade; maji hanji kiene kimoxi, ka soko.

¹⁵ Mundu anga a diela, henda ia a kuata mukonda dia Bejamí, kuma Jihova ua tebhununa-ku athu mu miiji ia Izalaiele.

¹⁶ Adiakime bhu kilômbo anga amba, exi: Enhá-phe a subhuka-ku tua kà a sotela kuebhi ahatu, ki alʼiki ahatu oso mua Bejamí a buila?

¹⁷ Exi: Oso a bhuluka kua Bejamí ki bhinga tu a iudikila dingi o undundu uâ, o kulengesa kuila muiji uâ uoso ki u jime o mbutu muʼaxaxi ka Izalaiele.

¹⁸ Etu-phe ki tu tena ku a bhana ahatu ku anʼetu; kuma anʼa Izalaiele a lokele, exi: Uoso u bhana muhatu ku akua Bejamí, muenhó a mu bhubhidile.

¹⁹ Anga a a longesa, exi: Talesenu, kuala fesa ia Jihova, ene ku i bhanga mivu ioso mu Silu. Silu u kala ku kusuku, o Betele u xala ku sulu, o ikoka i tunda mu Betele i banda ku Xikeme mu i xia ku kiasu, o Libona ku pholo.

²⁰ Anga a tuma anʼa Bejamí, exi: Ndenu, ka suamienu mu mivide, mu kale mu tala;

²¹ o ki mu mona anʼa ilumba mu Silu a tundu mu kukina mu fesa, enu-phe mu tunda mu mivide, kala diiala u kuata-bhu muhatuʼê ku anʼa ilumba ia akua Silu, muie-nâ ku ixi ienu ia Bejami.

²² O ki kala a-tatʼâ, ni phange jâ ja mala, eza kudikola kókuetu, tua kà ambela, kuma: Tu bhanienu-nâ mu henda; kuma ene ka tenene ku ahatu oso a a kuatela mu ita mumu, enu uenu ki enu mua a bhana-nâ mu vondadi; kuma se enu mua a bhele-nâ mueji kukala ni kuêla.

²³ Anʼa Bejamí anga a ki bhanga; a kuata ahatuʼâ ku ana ilumba ala mu kina, katé ene oso a sokelà-ku. Anga aia-nâ a vutuka mu undundu uâ, a bhanga dingi mabhata, hé a tunga momo.

²⁴ Anʼa Izalaiele ue anga a muangana kiua, aia thembu ienhoio, kala muthu ku muiji uê, ni ku dianda diê; ene oso anga a muanganena mu maundundu mâ.

²⁵ Izuua ienhoio mua Izalaiele ki mu kexile sobha, kala muthu-phe u bhanga kioso kia mono kuila kiene kia mu iukila ku mesu-mê.