Afundixi 20 - O Mikanda Ikola

Anʼa Izalaiele a di bhongolola mu bhesa kaxtiku ku iiala ia akua Ngibeia

¹ Kienhokio ana Oso a Izalaiele hé a tunda, kilombo kioso anga ki bhongoloka kala muthu umoxi ngó, tundé ku Dani katé ku Bele-seba, ni ixi ia Ngiliiade kumoxi, a bhongoloka kua Jihova bhu Mixipa.

² Makotʼathu ku mundu, ni miiji ioso ia Izalaiele, a diʼongolola bhu kionge kia mundu ua Nzambi, hâma jiuana ja midi ia mala, akua kuendela bhoxi, a tena kufomona mukuale ua kubhânga.

³ Anʼa Bejamí anga a kiʼvua kuila anʼa Izalaiele a bande bhu Mixipa. Anʼa Izalaiele anga a zuela, exi: Tu tangedienu, mba kubhukumuka kuenhuku kua bhiti kiebhi?

⁴ Levita, munumeʼa muhatu a mu jibha, u kumbulula, uixi: Nga tudile bhu Ngibeia bhua tokala mua Bejamí, ni eme ni mukamʼami, mu ku zekela-bhu.

⁵ Mala ma akua Ngibeia anga a ngi balukila, inzu a i kondoloka mu usuku; eme muene andalele ku ngi jibha, o mukamʼami a mu bhange undumbu ni kusuina kuoso, katé uafu muene!

⁶ Bhenhobho ngi kuata mukamʼami, eme nga mu bhange ku idiandu-idiandu, eme nga mu tumukisa katé ku maẋokololo a ixi ia undundu ia Izalaiele; kuma ene a te kituxi, a bhange ufusa mua Izalaiele.

⁷ Talesenu-phe, o kiki enu oso mu anʼa Izalaiele muala bhabha, mu bhana-bhu kizuelu kienu, tu mone kioso kia tokala ku ki bhanga.

⁸ Mundu uoso anga a balumuka kala muthu umoxi ngó, exi: Ki bhu kale muthu uia ku balaka iê, ki bhu kale muthu u vutuka ku bhata diê.

⁹ Ngibeia-phe tu i bhanga kiki: tu di tungula mu hasa, kioso ki tuia ku a solomona.

¹⁰ Kala hâma ku tunda kuinhi dia muthu, miiji ioso ia Izalaiele; ku midi ku tunda hâma, ku kuinhi dia midi ku tunda midi, mu sota huta ia kifuẋi kioso ki bhinga kuia kubeta Bejamí kala kia tokala mu kituxi kia ufusa uê kia bhange ene mua Izalaiele.

¹¹ Kala kiki, mala oso a akua Izalaiele a di bhongolola kala muthu umoxi ngó mu bhesa kaxtiku ku dibhata diodio, anga a takana muene miẋima kala muthu umoxi ngó.

¹² Miiji ia Izalaiele anga a tuma athu kuibhula mu muiji uoso ua Bejamí, exi: Kuku kubhukumuka kuahiʼuku, kua bhiti muʼaxaxi kenu?

¹³ Kiki-phe mala enhó a sekala, ala mu Ngibeia, tu bhakuidienu-nâ, tu a jibhe, phala kituxi kiki tu ki bhuise mua Izalaiele. Bajamí-phe ka xikina kuivua o dízui dia akuâ, o phange jê anʼa Izalaiele.

¹⁴ Inda anʼa Bejamí a tunda ku mabhata mâ, a bhongolokela bhu Ngibeia, mu kuia mu kúlua ni anʼa Izalaiele.

Ilombo iiadi i di kuata

¹⁵ Anʼa Bejamí anga a alula kizuua kienhokio, ku mabhata mâ moso kua tundu makuinhi aiadi a midi ni midi jisamanu ja mala a tena ku fomona xibhata phala kubhânga. Akua bhata ene bhu Ngibeia engi, kuma o a tungula-bhu ngó a tena hâma sambuadi ia mala a mazonda ósole kiambote.

¹⁶ O muʼaxaxi ka mundu uosʼú anga mu kala athu òtungule, hâma sambuadi ia mala ónone, ene oso akua kiasu, enhá o mu kutakula matadi ni mbalafunda, né lundemba ka lu lueza.

¹⁷ O mala ma akua Izalaiele oso a alula ue a tena hâma jiuana ja midi ia mala, a tena kufomona xibhata phala kubhânga; ene osoʼâ mazonda a ita; a kambe-mu ngó akua Bejami a di katula-mu.

¹⁸ Anʼa Izalaiele anga a balumuka, hé a banda aia bhu Betele, mù kuibhula phangu kua Nzambi, exi: Nanhi u tu tuamenena ku ita mu kúlua ni anʼa Bejamí? Jihova anga u zuela, uixi: Juda muene u tuamena.

Anʼa Izalaiele a a tolola luiadi kuala akua Bejamí

¹⁹ Anʼa Izalaiele anga a di meneka, aia mu ta kibangu kiâ bhua zukama, mu solomona akua Ngibeia.

²⁰ Akua Izalaiele anga a tunda mu kúlua ni Bejamí; a di ta ku mikalatata mu mukáu ua Ngibeia, mvunda anga i matekena bhu mbandu ia sanzala bhene.

²¹ Anʼa Bejamí anga a tunda mu Ngibeia, hé a buikisa ku mundu ua Izalaiele, kizuua kienhokio, makuinhi aiadi a midi ia mala, ni midi jiiadi.

²² Mundu uoso ua ana a Izalaiele anga a di phopha a di suinisa phala kubhânga dingi, a di ta dingi ku mikalatata bhuoso bhua di tele ku mikalatata mu kizuua kia dianga.

²³ Anʼa Izalaiele anga aia hanji mù dila bhu pholo ia Jihova, katé mu ngoloxi; anga ebhula kua Jihova, exi: O kiki tu vutuka dingi mu kúlua ni anʼa Bejamí, o phange jetu? Jihova uixi: Ndenu muene, mua kà a lue.

²⁴ Anʼa Izalaiele anga a bhixila dingi kua anʼa Bejamí mu kúlua-nâ kizuua kia kaiadi.

²⁵ Akua Bajamí anga a tunda mu Ngibeia mu takana-nâ, anga a buikisa dingi ku anʼa Izalaiele kuinhi dia midi ni nake dia midi ia mala, ene oso mala a tena kufomona xibhata mu kubhânga.

Izalaiele utolola akua Bejamí

²⁶ Bhenhobho ana oso a Izalaiele, mundu uoso, a banda ku Betele, a dila, a xikama bhu pholo ia Jihova, hé a jila kizuua kioso kienhókio, ki bhua kúdia ki bhua kunua katé mu ngoloxi; a bhana ni jisata ja kuoha ni jisata ja paze bhu pholo ia Jihova.

²⁷ Anʼa Izalaiele anga ebhula kua Jihova. (Kuma izuua ienhoio o álaka ia kikutu kia Nzambi ii bhobho ni Finehase monʼa Eleazale, monʼa Alá, uemana bhu pholo ia álaka mu dibhezelu izuuʼoio.)

²⁸ Exi: O kiki-phe tuia dingi lua mukuá mu kúlua ni anʼa Bejamí, o phange jetu, inga tu batuka-ku kiá? Jihova uixi: Ndenu-ku dingi; kuma mungu nga-nda ku a bhakula bhu lukuaku luenu.

²⁹ Izalaiele bhenhobho anga a bhaka athu mu ididi ia kubatamena mu jimbandu ja Sanzala ia Ngibeia.

³⁰ Anʼa Izalaiele anga a banda dingi kúlua ni anʼa Bejamí, kizuua kia katatu, a di ta dingi ku mikalatata kala kia diangele kubhanga jinga mu izuua ia mukuá.

³¹ Anʼa Bejamí anga a tunda ue mu kúlua ni mundu, aia ni kusuetuka ku kanga, dibhata diâ ala kuenda ni ku di xia dikanga; anga a kuata kubeta ni kujibha ku mundu ua Izalaiele kala kia diangele kubhanga mu izuua ia mukuá, mu ikoka ia jiphambu jiia mu kubanda ku Betele, ni kubanda ku Ngibeia, ni mu mukáu; hé a jibha-ku makuinhi atatu a muthu ku mala ma akua Izalaiele.

³² Anʼa Bejamí-phe anga amba, exi: A bhi-ku dingi, ala ku tu lenga kiá kala kia bhangele kizuua kia mukuá. Maji anʼa Izalaiele-phe, exi: Tuende ni kusuetuka, mbé ku a sungila mu ikoka, o dibhata diâ a di xie dikanga.

³³ Mala oso a Izalaiele anga a balumuka kiua mu ididi iâ, a di ta ku mikalatata bhu Diie dia Bahale; o iá ue akua Izalaiele ala mu batamena mu jimbandu ja mbonge ia Ngibeia, a fusumuka mu ididi iâ mu Kiphenza kia Ngibeia mua kexi.

³⁴ Kuinhi dia midi ia muthu a a nona oso mua Izalaiele, a tulukila bhu Ngibeia, ita anga i vula, ene-phe akua Bejamí, ka kʼijiia kuila divuua dia a tula.

³⁵ Jihova anga u nemeka Bejamí bhu pholo ia Izalaiele, anʼa Izalaiele anga a buikisa ku akua Bejamí kizuua kienhókio makuinhʼaiadi a midi ni midi jitanu ja muthu ni hama; ene oso mala a mazonda a tena kufomona xibhata mu kubhânga.

³⁶ Kala kiki anʼa Bejamí a mona kuma abhi-ku. Mbata akua Izalaiele a dianga kuenda ni kuila kala ala kulenga Bejamí, mukonda a dielela akuâ a a bhake mu ididi ia kubatamena mu jimbandu ja mbonge ia Ngibeia.

³⁷ Enhá a batama-phe, anga a tunda lusolo mu ididi iâ, a di lukula mu Ngibeia, hé a di zela, anga a beta dibhata dioso ku mazu a xibhata.

³⁸ Akua Izalaiele, ni iá a kexi mu ididi ia kubatamena, a di bhele kijimbuete, kia kuxikitisa dituta dia dikota dia dixi mu dibhata.

³⁹ Akua Izalaiele anga aluluka ku ita kala ala kulenga, kioso kia mateka Bejamí ni kubeta ni kujibha ku akua Izalaiele, anga a jibha-ku kiá makuinhi atatu a muthu osuʼá; kuma akua Bejamí ambe, exi: Akua Izalaiele ábhi-ku muene, ala ku tu lenga kiá kala ku ita ia kizuuʼokio

⁴⁰ Maji kioso-phe kia mateka dituta kubanda mu dibhata, dixi diemana kala philadi, akua Bejamí kia sakuka kuema a mona dibhata diâ diala mu tuka dixi dia bhixila katé mu diulu.

⁴¹ Akua Izalaiele-phe aluluka, akua Bejamí anga a diuana, kuma a mono divuua dia a tula!

⁴² Bhenhobho anga a lunguluka mu kulenga a bhana makunda anʼa Izalaiele, hé a di tela mu njila ia kuia mu kikangalakata; ita-phe i iza ni ku a bhesa lusolo, ni iá a tundu mu dibhata a a bhake mu kaẋi; o a xala mu mbonge ala kuenda ni ku a buikisa ue kala muthu bhu kididi kiê bhene.

⁴³ Kuene kuoso akua Bejamí a a kondela, ni ku a kaia-kaia, a a titidila muene kioso kiandala, katé kuoso kua lengela ku mbandu ku tundila dikumbi, bhua lulama mu Ngibeia.

⁴⁴ Ku akua Bejamí anga ku buika kuinhi dia midi ia muthu, ni nake dia midi; ene oso mazonda a kubhânga mu ita.

⁴⁵ Kia mono kuila ki ki xikina, a lunguluka anga a lengela mu kikangalakata bhu Ndànji ia Dimone; o mu jinjila muejila, a nemeka-mu dingi jimbalu-mbalu ji tena midi jitanu ja muthu; anga aia dingi ni ku a kaia katé bhu Ngidome, a nemeka-bhu dingi midi jiiadi.

⁴⁶ Kia di bhange konda, oso a buika mu kizuua kienhókio ku muiji ua Bejamí, makuinhi aiadi a midi ia muthu, ni midi jitanu; ene oso mala a tena kufomona xibhata, mazonda a kubhânga mu ita.

⁴⁷ Bhu kala-phe Ndànji ia Dimone, anga a kala kuenhokio bhu Ndànji ia Dimone mbeji jiuana.

⁴⁸ Maji akua Izalaiele-phe anga alulukila dingi anʼa Bejamí oso a subhuka-ku a a nemeka ku mazu a mukuale, ni dibhata diene dioso, ni ibhaku iâ ni ima ioso ia sange-mu a i jikinisa muene nzaká; o jisanzala jâ joso hé a ji ta mu túbhia.