Afundixi 2 - O Mikanda Ikola

Mukunji ua Ngana u bazela anʼa Izalaiele

¹ Mukunji ua Jihova anga u tunda bhu Jidingale u banda ku Betele. Uixi: Eme nga mi katula mu Ijitu, nga mi bheka mʼoxi i nga lokela ku jitata jenu, ngixi; Kikutu kiami kioso, ki nga te ni enu, ki ngi ki tondala kana, kate ku miji ni miji.

² Enu-phe uenu, kana kuta kikutu ni akuaʼxi ienhiʼii, kalatódio jâ mu ji bula. Enu-phe ki mua ngʼivu dízui diami; mua ki bhangela-hi kienhiki?

³ Mukonda dia kiki, eme uami ngambe kuma: Nguami dingi ku a kaia bhu pholo ienu; a xale muene kienhokio, a kale mínha mu jimbanji jenu, jinzambi jâ ji mi kale mubhetu ua ku mi kuata.

⁴ Kia zubha mukunji ua Jihova kuzuela makʼama kua ana oso a Izalaiele, mundu uoso uta nzôngo, a suina dízui ni kudila.

⁵ Kididi kienhiki anga a ki luka dijina dia Bokimu; Jihova anga a mu satela bhenhobho.

O ufilu ua Josuué

⁶ Kiki kia zubha Josuué muanganesa mundu, anʼa Izalaiele aia muthu ni muthu ku undundu uê, phala oxi i kale kiá iâ ene mu ku i tunga.

⁷ Mundu anga a bhikila Jihova izuua ioso ia Josuué, ni izuua ioso ue ia adiakimi kia kolo hanji o muenhu, kia zubha Josuué kúfua, oso a muene kukalakala kuavulu kua Jihova mu bhângela Izalaiele.

⁸ Josuué monʼa Nune, selevende ia Jihova, anga u fua, kuma uala mu hâma ia muvu ni kuinhi.

⁹ Anga a mu funda bhu mbambe ia undundu uê mu Timinate-Helese, mu milundu ia Ifalaime, ku mbandu ia kusuku ia ʻmulundu ua Ngahaxi.

¹⁰ Ni muiji uoso uenhó a a bhongolola kuʼaia jitata jâ; anga kuiza muiji uengi úa kulu bhu kididi kiâ, a kambe kuijiia Jihova, a kambe kuijiia ue ikalakalu iê ia bhange mu bhângela anʼa Izalaiele.

Izalaiele u sanduka Nzambi. O kikalakulu kia Afundixi

¹¹ Bhenbhobho anʼa Izalaiele anga a bhanga kiaiibha ku mesu a Jihova, a kala mu bhikila Jibaale.

¹² Jihova, Nzambi ia jitata jâ, ua a katula mʼoxi ia Ijitu, a mu xi; a kaiela jinzambi jengi, o jinzambi ja mundu uamukuá ua a kala mu jimbandu, a kala mu ji fukamena; Jihova anga a mu thathamesa.

¹³ Kuma a xisa muene Jihova, hé a kala mu bhikila Baale ni Jitalote.

¹⁴ Njinda ia Jihova anga i uamena Izalaiele, Muene hé u a bhakula bhu maku a ingumba i kala mu ku a bhûnda; anga u a tambuisa bhu maku a jinguma jâ, ja a kala mu jimbandu, katé ka tena dingi kuimana mu kubhânga ni jinguma jâ.

¹⁵ Kuoso-kuoso ku a di tela a sanga lukuaku lua Jihova luala ku a bhanga kiaiibha, kaia Jihova muene kia a zuelelele ni kia a lokela, anga a kala mu tata kiavulu, kuma ku mbandu joso a a phopheka.

¹⁶ Jihova anga u bhangesa kuila ku moneka afundixi, a kala mu ku a kudila bhu lukuaku lua ió oso ene ku a bhûnda.

¹⁷ Maji ene hanji-phe, nguauâ né ngó kuívua afundixiʼâ; kuma a kala mu bhanga undumbu ni jinzambi jengi, a ji fukamena; kindala a bhambuka kiá mu njila mua kexile kuenda o jitata jâ, ia kutumaka o ijila ia Jihova; ene-phe a bhanga kiengi, a lémbua kubhanga kia bhanga jinga o jitata jâ.

¹⁸ Jihova kia a zangelekela jinga afundixi, Jihova u kala ni mufundixi uoso uala-ku, u a kudila bhu lukuaku lua jinguma jâ, izúua ioso ia mufundixi muenhó; kuma Jihova u a kuatela henda mukonda dia kukema kuâ, mukonda hadi ia iá ala ku a bhikisa ni ku a zukutisa.

¹⁹ Anga aia ni kuila ku izúua-phe, kuila mufundixi uafu, a vutuka dingi kudima, a vula dingi kubhanga ufusa, jitata jâ ndenge, mu kukaiela jinzambi jengi ni ku ji bhikila ni ku ji fukamena; ka xikina kubatuka ku imbamba iâ iene kubhanga, ni ku uendelu uâ ua kuxibhaka.

²⁰ Njinda ia Jihova anga i uama ku thandu dia Izalaiele, uixi: Mukonda dia mundu uenhú kutondala kikutu kiami, kioso ki nga lekela o jitata jâ, ni kukamba kuívua dízui diami;

²¹ eme uami ku pholo ku tuia, nguami dingi kukaia akuaʼxi oso a xala-ku tunde kiʼáfua Josuué,

²² a kale, nda ngi lole-nâ o muẋima ua Izalaiele, mba a xikina kukuata njila ia Jihova ni kuendela-mu, kala kia i kuatele o jitata jâ, mba kana.

²³ Kala kiki Jihova u xia-ku ku akua ʼxi, ka zubha ku a kaia lusolo kindala, ka a bhakula dingi ene oso bhu lukuaku lua Josuué.