Afundixi 18 - O Mikanda Ikola

Akua Dani a taúla mu sota ixi iâ iengi

¹ Mu izuua muenhomo ki muala sobha mua Izalaiele; mu izuua muenhomo-phe ue muiji ua akua Dani a kala mu sota ixi ia undundu uâ ia kutungila; kuma katé kizuua kienhokio undundu uâ ka u tambuile luua mu miiji ia Izalaiele.

² Anʼa Dani anga a katula ku jindandu jâ, malʼatanu a a nona mu kaẋi ka mundu, mazonda ma kubhânga, a a katula bhu Zola ni bhu Xitaoli, a a tuma kulonda ixi ni kusota-bhu kididi kia ku tunga; anga a ambela, exi: Ndenu ka londienu ixi ioso. Enhá anga a bhixila bhu bhata dia Mika, mu milundu ia Ifalaimi, a zekela-bhu usuku.

³ Kioso kiala bhu inzu ia Mika, evua dízui dia munzangala, o levita, kuma a muʼijiia; anga a mu kana, a mu ibhula, exi: Nanhi ua ku bheka kunu? Uala kubhanga-hi bhu bhata bhabha? O bhene eie uala-bhu ni kima kiahi?

⁴ Muene anga u a ambela, uixi: Kiki ni kiki kia ngi bhange Mika, mukonda uala ku ngi futa, eme ngala ngi nganga iê.

⁵ Ene anga a mu bhomba, exi: Tu zambuile hanji kua Nzambi, tua ku diondo, phala tu ijiie se njila i tuala kuia mba i kala ia kubhanduluka.

⁶ Nganga anga u a ambela, uixi: Endenu kiambote; njila ioso i muala kuila iala bhu pholo ia Jihova.

⁷ Kia zubha kubhanga kiki, malʼatanu enhá a katuka, a bhixila mu Laixi, a sanga athu a tungu-mu kala ni hele ia kima, ukalelu uâ uene umoxi ni akua Sidone, a dixibhʼâ, ki bhuala kima kia a zukutisa. Mʼoxi iâ ki muala muthu u kuata kutumina, mba u a kuatesa jisonhi ja kima kioso-kioso mu ixi momo; o akua Sidónia ue a di sanduka-nâ a a kalela dikanga; athu engi ka di tambulula-nâ mu ima ioso-ioso.

⁸ Mala iá anga a vutuka ku akuâ, o jiphange jâ a xala bhu Zola ni bhu Xitaoli; akuá anga a ebhula, exi; Kuambe, o ku muele muedi kiebhi?

⁹ Kuala ene: Balumukenu, tuienu ku a solomona; kuku ku tuele, o ixi tua i sange, iauabha muene; kifuá mu xikamenunu kunu, kuambe? Kana kukala ni usudi ua kuia kutambula ixi ioio, ni ku i bhingana.

¹⁰ O ki muia, mua kà sanga athu kala ni hele ia kima, ixi iene ia kulu muene, Nzambi-phe ua mi bhana-iu enu ku i vua, ixi ia bhingi ima iene ioso iii momo, kana kima kia kambe-mu.

¹¹ Kienhokio anga kukatuka athu ku muiji ua akua Dani, a tundu bhu Zola ni bhu Xitaoli, hâma jisamanu ja mala, a maneka ibhakatu ia ita.

¹² Mu kubanda anga a ta kibangu kiâ bhu Kidiate-jadimi, mu Juda; mukonda dia kiki kididi kiókio a kʼixana Kibangu kia Dani, katé mu kizúua kia lelu; ʼkí kuema dia Kidiate-Jadimi.

¹³ Mu kutunda bhobho a bhita mu milundu ia Ifalaimi, a tula bhu bhata dia Mika.

Mika a mu tambula kiteka ni levita kuala akua Dani

¹⁴ Bhenhobho malʼatanu a diangele kuia kulónda ixi ia Laixi, ambela akuâ, exi: Mua kʼijiia kuma mu jinzu jojo muala efodi, muala telafini, muala ue ni kiteka kia iudika mesene ia kuzunza; o ki tualʼiki xinganekenu kioso ki mua tokala kubhanga.

¹⁵ Anga a bhambuka, a bhixila bhu kanga dia munzangala, o levita, bhene bhu bhata dia Mika, anga a mu menekena.

¹⁶ O hâma jisamanu ja mala a maneka ibhakatu ia ita, ene o anʼa Dani, emana bhu muelu ua kithâdi.

¹⁷ Malʼatatu a diangele kuia kulónda ixi, anga a bokona mʼonzo, a katula-mu o kiteka kia kuseta, kióuiẋike, ni efodi, ni jitelafini, kioso nganga muene kiemana bhu muelu ua kithâdi kumoxi ni hâma jisamanu ja mala a maneka ibhakatu ia ita.

¹⁸ Enhá-phe kia bokona mʼonzo ia Mika iá a katula-mu o kiteka kia kuseta kióuiẋike, ni efodi, ni jitelafini, nganga u a ebhula, uixi: Muala kubhanga-hi?

¹⁹ Ene-phe a mu vutuila, exi: Di xibhe! Xita lukuaku lué ku dikanu, uile kumoxi ni etu, u tu kale u tata, u nganga ietu; kuma eie ki ku kala kota o kukala u nganga ia dibhata dia muthu umoxi, inga o kukala u nganga ia mundu, ia muiji ua dikota mua Izalaiele?

²⁰ Nganga u sanguluka mu muẋima uê, u ambata ni efodi, ni jitelafini, ni kiteka kia iudika mesene, u di ta mu kaẋi ka mundu u ila-nâ kumoxi.

²¹ Kala kiki a tunda bhenhobho, a: suluka, ni anʼâ ni ibhaku, ni imbamba iâ, a i tuamekesa ku pholo.

²² O ki edi dibhata dia Mika a di xi kiá dikanga, akua bhata a di zukama ni inzu ia Mika, a di bhongolola, anga a kaiela anʼa Dani, a a kuata.

²³ Anga a kuata kukola-kola anʼa Dani. Ene anga a sakuka, hé ambela Mika, exi: Ihi kia ku kuata? Ua tu kaielela-hi ni mundu uosʼú u ua bhongolola kiki?

²⁴ Muene-phe, uixi: Mua ngi tambula jinzambi jami ji nga iudika, kumoxi ni nganga, iene ioso muaii na-iu; eme kua ngi xala-hi? Muala kuila kiebhi; uandala-hi, mba ihi kia kukuatʼá?

²⁵ Anʼa Dani a mu ambela, exi: Kana kubhanga dingi jibuia bhabha! O mbimbi ié ki tuandala ngó ku ivua; imoxi bhu kala ni iiala iasaluka mudietu i ku lundama, anga u ta-mu ni muenhu ué, ni mienhu ia mukuá ia bhata dié.

²⁶ Anʼa Dani kia zubha kuzuela kiki, a suluka anga aia ni kuenda njila iâ; o Mika kia mono kuila mala ió a mu tundu nguzu, u batuka-ku, u vutuka ku bhata diê.

²⁷ Ene-phe, o hama jisamanuʼojo ja muthu, anga ambata ioso ia iudika Mika, ni nganga iê ia kexile na-iu, hé a bhixila na-iu ku Laíxi. A sanga mundu koko a dixibhâ, kala ni hele ia kima, anga a a buikisa ku mazu a xibhata, mbonge iâ a i ta mu túbhia.

²⁸ Akuaʼxi ki bhuala ua tena ku a kudila, mukonda ku Sidone kua a kexile dikanga, o athu engi ue ka di tambulula-nâ. Mukáu uâ, o honga ia zukama mu Bete-lehobo. Akua Dani anga a tunga dingi o mbonge ienhoio, ene kiá hé a bhingana-mu.

²⁹ Mbonge ioio anga a i luka dijina dia Dani, diene dijina dia tatʼâ Dani a mu vuala kuala Izalaiele; mʼokulu-phe mbonge ioio dijina diê Laixi.

³⁰ Anʼa Dani anga a bhaka muenhomo o kitekʼokio kia iudika mesene ia kuzunza; o Jonatane monʼa Ngelexone, monʼa Manasa ni muene ni anʼê hé a kala jinganga ja muiji ua Dane katé bhu kizúua kieza ixi ioso mu ku i balakala.

³¹ Kienhiki-phe o kitekʼokio kia Mika kia iudikile, a ki bhaka kididi, anga ki kala muenhomo thembu ioso iala o inzu ia Nzambi mu Silu.