Afundixi 17 - O Mikanda Ikola

Mika ni kiteka kia bhata diê

¹ Kua kexile muthu, mukua bhata ku milundu ia Ifalaime, dijina diê Mika.

² Muene anga u ambela mamʼâ, uixi: Kitadi kié kia ku nhanene, o midi ia xikulu ia itadi ia phalata ni hâma, kia ku bhangesele kuila mu mátui mami muene, u mu bhubhidila uoso ua ki nhana, talesa, eme ngala na-kiu, eme muene nga ki nhana. Mamʼâ anga u mu ambela, uixi: Jihova a ku zediuise monʼami.

³ Mona anga u vutula kitadi kua mamʼâ, midi ia xikulu ia itadi ia phalata ni hâma; mamʼâ-phe anga u amba, uixi: Phalata ienhiʼii nga i lumbila Jihova, i tunda kiá bhu lukuaku luamu mu dijina dia monʼami kuma muene nga mu bhela-iu mu kuiudika kiteka kiósonge mba kióuiẋike; kala kiki kitadi kiki ngi ku bhana-kiu dingi.

⁴ Mona kia zubha kuvutula itadi ia phalata, u i bhana mesene ia kuzunza, muene anga u iudika na-iu kiteka kia kuseta kióuiẋike. Kiteka anga a ki bhaka mʼonzo ia Mika.

⁵ Diiala dienhidi, Mika, anga u kala ni inzu iê ia jinzambi; u iudika ni efodi ni jitelafini, u xingidisa monʼê umoxi ua diiala mu ku kala nganga iê.

⁶ Mu izúua ienhoio ki muala sobha mua Izalaiele; kala muthu-phe u bhanga kioso kia mu uabhela, kia mu iukila mu mesu mê.

Levita mʼonzo ia Mika

⁷ Anga ku kala munzangala ua diiala u tunda mu Beleme ia Juda, mukua muiji ua Juda maji u kala levita, ueza mu nakina bhu bhata bhenhabha.

⁸ Kuma muthu iú ua tundile kokuâ, ku Beleme ia Juda, mu nakina kuoso kua-nda kumona kididi kiambote; anga u bhixila mu milundu ia Ifalaime, u tula bhu bhata dia Mika, uala kutunda mu kuenda mu uenji uê.

⁹ Mika anga u mu kunda, uixi: Ua tundu kuebhi? Muene anga u vutula, uixi: Ngi levita, nga tundu mu Beleme ia Juda, ngala kuia mu nhunga kuoso ku ngi mona kididi kiambote.

¹⁰ Mika-phe anga u mu ambela, uixi: Tunga kiá bhabha ni eme kumoxi, u ngi kale u tata, u nganga iami, eme ngi ku bhane kuinhi dia xikulu ia itadi ia phalata ku muvu, ni kuzuata, ni kúdia kuasoko. Kala kiki levita anga u bokona mʼonzo ia Mika.

¹¹ Levita anga ki mu uabhela kutunga ni muthu iú, o munzangala muenhú anga u kala mukuâ ni monʼê.

¹² Mika anga u xingidisa levita muenhú, munzangala iú anga u kala nganga iê, anga u xikama mu dibhata dia Mika.

¹³ Mika anga u amba, uixi: Kiki nga kʼijiia kiá kuma Jihova ua-nda ku ngi bhanga mbote, kuma ngala ni levita u kala nganga iami.