Afundixi 16 - O Mikanda Ikola

Sansau a mu tobhesa kuala Dalila

¹ Sansau anga uia ku Ngaza, u mona-ku muhatu kuenhoko ua kidianzunga, u bokona muoso muala.

² Hundu iê anga i di muangena mu mbonge ioso. Akua Ngaza anga a kʼivua, exi: Sansau ueza kunu. Anga a mu kondela, a mu batamena bhu muelu ua kimbaka usuku uoso; a di xibha usuku uoso, exi: Ki kúkia tu mu kuata, tu mu jibha.

³ Sansau anga u zeka katé mu kaẋi ka usuku, mu kaẋi ka usuku-phe u balumuka, u kuata ku mabhitu a kimbaka, u a tukula ni jingunji jê, ni mulangaji kiá kumoxi, u a ta bhu isuxi iê, u a bheka bhu thala ia mulundu ua lulama ni Hebolone.

⁴ Kia zubha o kubhanga kiki, u zola dingi muhatu mu honga ia Soleke, dijina diê Dalila.

⁵ Jisobha ja akua Fidíxia anga jiza ku muhatu muenhú, exi: Mu bhombe katé ki u kʼijiia kioso kia mu bhana o nguzu iê iavulu, mba tu mu bhanga kiebhi mu ku mu tolola, ni ku mu kuta phala ku mu talesa hanji hadi; hé u ki bhanga, tu ku bhana kala muthu midi ni hama ia itadi ia phalata.

⁶ Dalila anga u ambela Sansau, uixi: Ngi tangele hanji, nga ku diondo, kioso kia ku bhana o nguzu ié iavulu kiki, mba a ku kuta nʼihi nʼa tena ku ku talesa hadi?

⁷ Sansau anga u mu ambela, uixi: Se a ngi kuta ni sambuadi dia ngoji ja jimbamba ja uisu, kilúua ji kukuta, ngi bhuila muene nguzu i ngi bhua, hé ngi kala ngó muene kala kiala akuetu oso.

⁸ Bhenhobho jisobha ja akua Fidíxia a mu bhekela sambuadi dia ngoji ja jimbamba ja uisu kiluua ji kukuta, muene anga u mu kuta na-ju.

⁹ Kienhokio-phe sai athu a suama mu xilu dia muhatu muenhú, ala mu kinga kioso kia-nda kubhita. Muhatu anga u mu ambela, uixi: Akua Fidíxia a ku tula, Sansau! Muene anga u batula jingoji kala dínha ia kidinhaji ia tula ku túbhia. Kala kiki nguzu iê ka ijiia lúua kuoso ku iala.

¹⁰ Dalila anga u ambela Sansau, uixi: Ua ngi bhange kasekelu, ua ngi tangela makutu; kiki-phe ngi tangele muene, nga ku diondo, kioso kia tena ku ku kuta na-kiu.

¹¹ Muene-phe u mu ambela, uixi: Se a ngi kuta muene kiambote ni mikolo ia ubhe, kilúua a bhanga na-iu kikalakalu kioso-kioso, ngi bhuila-phe kiá, nguzu i ngi bhua ngi kala ngó kala kiala akuetu oso.

¹² Kienhiki Dalila u katula mikolo ia ubhe, hé u mu kuta na-iu, anga u dikola u mu ambela, uixi: Akua Fidíxia a ku tula, Sansau! Athu-phe iá mu xilu, ala mu kinga kioso kia-nda kubhita. Muene-phe u batula mikolo mu maku mê kala jidínha.

¹³ Dalila anga u ambela Sansau, uixi: Tunde bhuoso bhanhá ni ku ngi bhanga kasekelu ua mu ngi tangela makutu; ngi tangele-phe kiá kioso kia tena ku ku kuta-na-kiu. Muene u mu ambela, uixi: Kikale o sambuadi dia jingindu dia ndemba iami ku mútue u ji lekela kumoxi ni jingoji ja thanga ku mulongo, anga u ji kuikila ku phapha i ua kubu ii ia kolo kiambote bhoxi.

¹⁴ Muhatu anga u ki bhanga muene, jindemba u ji bhila-bhila mu jingoji ja mulongo u ji kolesa ni phapha, u mu ambela u dikola, uixi: Akua Fidíxia a ku tula, Sansau! Muene anga u thathumuka ku kilu, ni mulongo ni thanga u i vuzila kumoxi.

¹⁵ Muhatu anga u mu ambela, uixi: Uala ku ngʼila kiebhi kuma ua ngi zolo, maji o muẋima ué ki uala kumoxi nʼeme? Ua ngi bhange kiá kasekelu lutatu luosʼulu, kua ngi tangela kima kioso kia mu ku bhana o nguzu ié iavulu kiki.

¹⁶ Ku izuúua-phe, mukonda ua mu bhinjika kiavulu ni kuzuela izuua ioso, ua mu jijidika kinéne, Sasangu kia mu kumu kiavulu katé u sola kúfua.

¹⁷ Anga u mu tangela ni muẋima uê uoso, uixi: Kilúua mu ngi bhita phoko ia bhutu mu mútue uami, kuma ngi Nazilé ia ngene ia Nzambi, a ngi lumbila Nzambi tunde mu divumu dia mamʼetu. Se kuila a ngi bhuta, nguzu i ngi bhua, ngi bhuila kala kiala akuetu oso.

¹⁸ Dalila kia mono kuma ua mu tangela ni muẋima uê uoso, u tuma kuixana jisobha ja akua Fidíxia, uixi: Bandenu kunu lumoxiʼulu kiá ngó, kuma ua ngi tangela kiá ni muẋima uê uoso. Jisobha ja akua Fidíxia-phe anga ji banda kua muene, ni kitadi eza na-kiu bhu maku.

¹⁹ Dalila anga u mu isa ku kilu, ni ku mu njunjana ni ku mu ta ifunhe, ua bhetuila ku jiphuna jê. Anga u ixana muthu u mu bhuta o sambuadi dia jingindu ja jindemba jê ja kexi na-ju mu mútue; nguzu-phe anga i mu sosoloka ua tobhoʼê kiá, kuma katé ni Dalila muene kia mu teza ngó ua mu lende kiá.

²⁰ Muhatu anga u dikola u mu ambela, uixi: Akua Fidíxia a ku tula, Sansau! Muene anga u thathumuka ku kilu, uixi: Ngi tunda, kala ki ngene kubhanga kiá, ngi di kukumuna mu kudibhangela. Mukonda muene ka kʼijidile kuila Jihova ua mu ehelela kiá,

²¹ Akua Fidíxia anga a mu kuata, a mu tufula mesu, a mu bheka ku Ngaza, a mu kuika ni jingidinhá ja ngondo; u kala mu nhungisa matadi a kuzukila fuba mu kaleia.

Sasangu u lundumuna tembulu ia Dangoni anga u fua

²² O jindemba jê-phe ja mu bhutu mu mútue, ja kuata dingi o kukula.

²³ Jisobha ja akua Fidíxia-phe anga ji bhongoloka mu bhana sata ia dikota kua Dangoni nzambi iâ, ni kubhanga fesa; kuma ambe, exi: Nzambi ietu ua tu bhakuila nguma ietu Sasangu bhu lukuaku luetu.

²⁴ Mundu ue kia zubha ku mu mona, a ximana nzambi iâ, exi: Nzambi ietu ua bhakula bhu lukuaku luetu ngumʼoio ua kexi mu kubuikisa ixi ietu, ua jibha jinga athu avulu ku mundu uetu.

²⁵ Mu kubhanga kiki, kia a bhekela kusanguluka kua vulu mu muẋima, exi: Sasangu muene eze tu mu mone hanji kiaia ni kutonoka phala a tu zubhe ngunzu. Anga a takana Sasangu mu kaleia, u kala mu tonoka bhu pholo iâ. Hé a mu imanesa bhu kaẋi ka jiphiladi.

²⁶ Sasangu anga u ambela kaiala ka mu kuata mu lukuaku, uixi: Ngʼidikize jiphiladi ja fikidila inzu ioso, ngi xamenene-ku hanji.

²⁷ Inzu-phe bhenhobho iezala athu ni mala ni ahatu; ni jisobha joso ja akua Fidíxia ji bhobho; athu ngó ala ku thandu dia ʼnzu a tena midi jitatu ja muthu, ni mala ni ahatu, ila mu tala kioso kiala kutonoka Sasangu.

²⁸ Sasangu anga u dikola kua Jihova, uixi: Ngana iami, Jihova, tata! ngi xinganeke, nga ku diondo, u ngi bhane dingi nguzu mu lumoxi ngohʼulu, Nzambi iami, phala akua Fidíxia ngʼa futise diesu dimoxi ngó ku mesu ami aiadi.

²⁹ Sasangu anga u kuata philadi jiiadi ja kaẋi, jene ja fikidila inzu ioso, anga u xamenena-ku, iii ua i kuata ni lukuaku lua kúdia, o iii ua i kuata ni lukuaku lua kiasu.

³⁰ Sasangu anga u amba, uixi: Ngi fuile kiá kumoxi ni akua Fidíxia. Kia zubha kuzuela kiki inzu u i nhikisa ni nguzu ioso katé ia di bula-bula imisula, inzu anga i lundumuka, ni jisobha ni mundu uoso ala-mu ia a xina. Kala kiki athu a jibha mu ufuilu uê kota mu kuvula, a a jibha jinga ku muenhu uê ndenge.

³¹ O ki kia zubha kubhita, jiphange jê ni dibhata dioso dia tatʼâ a kulumuka, a mu zangula, a banda-nê, hé a mu fûnda bhuʼaxaxi ka Zola ni Xitaoli, mu jimbila ja tatʼâ Manoua. Muene-phe ua fundisa izalaiele mu makuinhi aiadi a muvu.