Afundixi 14 - O Mikanda Ikola

Sansau u sota muhatu

¹ Sansau anga u kulumuka ku Timinate; ku Timinate-phe anga u mona-ku muhatu ua tokala ku mbutu ia akua Fidíxia.

² O kia zubha kutunda-ku, u ambela tatʼâ ni mamʼâ, uixi: Nga mono muhatu ku Timinate, ua tokala ku mbutu ia akua Fidíxia; ngi bhengedienu-nê a kale muhatuʼami.

³ Tatʼâ-phe u mu vutuila, ni mamʼâ, exi: Kifua ku akua muiji uenu kunu, mba ku mbutu ietu ioso, kua kambe muhatu, kuila uia mu kubhenga muhatu ku akua Fidíxia, o muiji ua akua mabolo? Sansau-phe u ambela tatʼâ, uixi: Ngi bhengele-nê, kuma muene ua ngi uabhela.

⁴ Tatʼâ-phe ni mamʼâ ka kʼijiia kuila kia tundu kua Jihova; mukonda Sansau uala kusota bhuoso bhua kuatela mvunda ni akua Fidíxia. Mbata thembu ienhoio akua Fidíxia ene ala mu tumina Izalaiele.

⁵ Ku izúua Sansau u kulumuka ku Timinate, ni tatʼâ ni mamʼâ, anga u tula bhu mivide ia Timinate; kiedi-phe u bhixila bhenhobho u takana ni munzangala ua hoji, i kala mu ku mu zumina.

⁶ Nzumbi ia Jihova anga iza ni nguzu kua Sansau, u di takuila ku hoje anga u i kuata, u i sauna kala monʼa hombo a mu kuata; o bhu maku-phe muene ka kuata kima, uala ngó maku a hatu. O kia bhange-phe kiki, ka ki tangela ue tatʼâ mba mamʼâ.

⁷ Kia zubha-phe kukulumuka, u ta maka ni muhatu ua mu uabhela muene.

⁸ Ku izúua-phe, mu kuvutukisa phala kubhenga kiá muhatu, u bhambuka mu tala bhua xile o kisasu kia hoji; hé u sanga kiunda kia jinhuki ja tungu mu kisasu kia hoje, muala kiá uiki.

⁹ Anga u katula-mu uiki bhu makuʼê anga uia ni kúdia mu njila muala kuila; u tula ue bhuala tatʼâ ni mamʼâ, u a bhana-ku, ene ue a dia; ka a tangela-phe kuila uiki ua u katula mu kisasu kia hoji.

Nongonongo ia Sansau

¹⁰ Tatʼâ kia zubha ku kulumuka kuala muhatu, Sansau-phe anga u bhangela-bhu fesa, kuma kiene kiene mu bhanga o minzangala ioso ia mala.

¹¹ O kia mu mono ua mu kuiza, a mu bhana makuinhi atatu a munzangala nʼakuá kukala-nê kumoxi.

¹² Sansau anga ua ambela, uixi: Iza ngi mi tele nongonongo iami; se mu tena ku ngi lombuelela-iu mu sambuadi dia izuua ia fesa, hé mu i fokola muene kiambote, eme ngi mi bhana makuinhi atatu a malasola a linhu, ni makuinhi atatu a izuatu ia kukemba;

¹³ o ki kala-phe mua i lémbua ku ngi lombuelela-iu, enu mu ngi bhana makuinhi atatu a malasola a linhu, ni makuinhi atatu a izuatu ia kukemba. Kuala ene; Nongojoka, tu kuívue.

¹⁴ Muene anga u a ambela, uixi; Moxi dia mukua kúdia, mua tundu kudia; o moxi dia mukua nguzu, mua tundu kutouala. Ene-phe a bhanga izuua itatu, nongonongo a lémbua ku i lombolola.

¹⁵ Kutula mu kizúua kia mukuá, ambela muhatuʼa Sansau, exi: Muadi uê mu bhombe a ku lomboluele nongonongo iê; o ki u kamba ku ki bhanga, ni eie muene ni dibhata dioso dia tatʼenu, tu di ta mu túbhia. Kifua kiene manhi ki mua tu ixanena-bhu, phala ku tu tambula o izuatu ietu, kuambe?

¹⁶ Muhatuʼa Sansau anga u kala mu kudila bhu pholo iê, uixi: Ua ngi zembe, ku ngi zolo kana. Kuma nzangi bhu bhata dietu ua a tela nongonongo, eme-phe kua ngi tangela-iu luua. Muene-phe u ambela muhatuʼê, uixi: Ni tatʼetu ni mamʼetu ki nga a tangela, kifua ngi ku tangela—iu eie?

¹⁷ Muhatu-phe u jijila kudila bhu pholo ié mu sambuadi dia izuua ioso ia ubhanga (fesa); kutula-phe kizuua kia kasambuadi muene u mu tangela, mukonda ua mu tatesa kiavulu; muhatu-phe uia, nongonongo ié u i tangela nzangi ia akua bhata diê.

¹⁸ Ene-phe akua bhata eza kua Sansau kizúua kia kasambuadi, kioso dikumbi kiluua di tula, exi: Mu kutouala ihi ki tunda uiki? Mu nguzu ihi ki tunda o hoji? Muene-phe u a vutuila, uixi: Hé ki seseme iami ia ngombe ia mi sungila ditemu, hinu ki mua fokola nongonongo iami.

¹⁹ Nzumbi ia Jihova bhenhobho iza ni nguzu kua Sansau, u kulumuka ku Axikilone, u jibha-ku makuinhi atatu a mala, u a tambula izuatu iâ anga u bhana makuinhi atatu a izuatu kua iá oso a lombolola o nongonongo iê. Njinda anga i mu kuata, u banda ku bhata dia tatʼâ.

²⁰ Muhatu a Sansau-phe a mu bhana diiala dia mukuá ua kexile kuphatele kuê, ua tokala mu imbalambi.