Afundixi 13 - O Mikanda Ikola

Akua Fidíxia a bhikisa Izalaiele. Uvadiue ua Sansau

¹ Anʼa Izalaiele anga a tona dingi kubhanga kiaiibha ku mesu a Jihova; Jihova anga u a bhakula bhu lukuaku lua akua Fidíxia mu makuinhi auana a muvu.

² Hé bhu kala muthu, mukua bhata dia Zola, mukua muiji ua Dani, dijina diê Manoua, muhatuʼê mbaku, ka vuala.

³ Anju ia Jihova anga i tukulukila o muhatu muenhú, u mu ambela, uixi: Talesa, eie uala u mbaku, ua kambe kuvuala; kiki-phe ua-nda kuimita, hinu u vuala monʼa diiala.

⁴ Kienhiki-phe di lange, nga ku diondo, kana kúnua vinhu, mba kúnua kuoso-kuoso ku kodiuisa, ku die ue kima kiabolo.

⁵ Mukonda-ze, eie ua-nda kuimita, hinu u vuala monʼa diiala, mona-phe ua bhingi ki ku mu tula phoko ia bhutu ku mútue uê, mbata muene ua-ndu kala Nazilé ia Nzambi, a mu lumbila Nzambi tunde mu divumu dia mamʼâ; muene hinu ua kà kula Izalaiele bhu lukuaku lua akua Fidíxia.

⁶ Muhatu anga uiza u tangela muadi uê, uixi: Kua ngi sange muthu ua Nzambi, o pholo iê iila kala pholo ia anju ia Nzambi; ku mu tala uoma u kuata; ki nga mu ibhula kuoso kua tundu, dijina diê ue ka ngi tangela-diu.

⁷ Muenhú ua ngi tangela-phe, uixi: Talesa eie ua-nda kuimita, hinu u vuala monʼa diiala; kienhiki-phe ku nue vinhu, mba kúnua kuoso-kuoso ku kodiuisa, ku die ue kima kiabolo; kuma mona ió u kala Nazilé a mu lumbila Nzambi tunde mu divumu dia mamʼâ katé bhu kizuua kia ufuilu uê.

⁸ Bhenhobho Manoua usamba u dionda Jihova, uixi: Aii! Ngana, tata! nga ku diondo, muthu ua Nzambi ió uoso ua mu katuile, eze dingi bhu tuala, a tu longese kioso ki tu sasa o mona uoso hinu tu mu vuala.

⁹ Nzambi anga u ívua dízui dia Manoua, anju ia Nzambi anga i sanga dingi muhatu uala ku mábhia; muadi uê Manoua-phe kala-nê.

¹⁰ Muhatu anga u bhanga lusolo, uia ni kunzunzuna u lengela kua muadi uê, uixi: Muthu-ze ua ngi tukulukilile kizuʼokio, lelu ueza dingi.

¹¹ Manoua anga u balumuka, u kaiela mukajiʼê, u sanga muthu iú, u mu ambela, uixi: Eie muene u muthu ua zuelesa muhatu iú? Uixi: Eme muene.

¹² Kuala Manoua: Tamano ki bhita muene kioso ki ua zuela; tu bhane-phe kijila kioso ki tu sasa o mona, ni ioso muene ia kà bhanga.

¹³ Anju ia Jihova anga i ambela Manoua, uixi: Muhatu aluke ngó kioso ki nga mu ambela.

¹⁴ Ka die kima ki tunda ku muvide, ka nue vinhu, mba kúnua kuoso-kuoso ku kodiuisa, ka die ue kima kiabolo; ioso i nga mu tendelela, a i aluke muene.

¹⁵ Bhenhobho Manoua anga u ambela anju ia Jihova, uixi: Nga ku diondo, tu kinge hanji tu ku telekele kahombo.

¹⁶ Anju ia Jihova anga i ambela Manoua, ixi: Né ua ngi kingisa ki ngi di kúdia kué ku u ngi bhana; se uedi-phe u bhana sata ia kuoha, kale u i satela Jihova. Kuma Manoua ka kʼijiia kuila anju ia Jihova.

¹⁷ Manoua anga u ambela anju ia Jihova, uixi: Dijina dié eie nanhi, mbé kizuua kioso ki bhita o kizuelu kié, tu ku bhange ujitu?

¹⁸ Kuala anju ia Jihova, u ngʼibhuila-hi dijina diami, oko dijina di kôla?

¹⁹ Kala kiki Manoua u kuata kahombo, ni fuba ue ia tokala ku sata, iene ioso anga u i satela Jihova ku thandu dia ditadi; bhenhobho anga bhu bhita madiuanu, ni Manoua ni muhatuʼê a ki mona mesu.

²⁰ Kuma mulengu ki ua kuata kulekujuka ku thandu dia kalatódio, u kala mu banda bhulu, ni anju ia Jihova ua bandela kumoxi mu mulengu ua túbhia u tunda ku kalatódio; ni Manoua ni muhatuʼê a ki mona mesu; anga a di bhala, a ta jipholo mu mavu.

²¹ Anju ia Jihova phe ki i tukulukila dingi Manoua mba muhatuʼê. Manoua anga u kʼijiia kuma anju ia Jihova.

²² Manoua anga u ambela mukajiʼê, uixi: Tua-ndu fua, mukonda Nzambi tua mu mono mesu.

²³ Mukajiʼê-phe u mu ambela, uixi: Se Jihova uandalele ku tu jibha, keji kuxikana sata i tua mu satela ia kibhaku ni fuba, keji ku tu idikiza ima ioso iii, keji ku tu ambela maka kala iá.

²⁴ Muhatu iú anga u vuala monʼê ua diiala, u mu luka dijina dia Sansau; mona anga u kula, Jihova u mu bhana kuzediua.

²⁵ Nzumbi ia Jihova anga i mateka ku mu vunza moxi ku izuua ni izuua, bhu Kibangu kia Dani, bhuʼaxaxi ka Zola ni Xitaole.