Afundixi 12 - O Mikanda Ikola

Mvunda ia akua Ifalaime ni Jefete

¹ Akua Ifalaime anga a di bhongolola, a zaúka ku tunda bhu Zafone, anga ambela Jefete, exi: Phala-hi eie uaii mu kúlua ni anʼa Amone, etu ua kambe ku tu ixana? Dibhata dié tu di ta mu túbhia ni eie muene.

² Jefete anga u a ambela, uixi: Ni eme ni mundu uami tua kexile mu mvunda ia dikota ni anʼa Amone; enu nga mʼixana, maji ki mua ngi kudila bhu lukuaku luâ.

³ O ki nga mono enu mua kambe ku ngi kudila, nga te o muenhu uami bhu lukuaku luami nga sambuka mu kúlua ni anʼa Amone, Jihova-phe ua a bhakula bhu lukuaku luami; o ki tualʼiki-phe kima kiahi ki mi bhangesa ku ngi sanga kiki ni jimvunda?

⁴ Jefete anga u bhongolola mala oso a akua Ngiliiade anga a beta Ifalaíme, mukonda a âmbela, exi: Enu mu akua Ngiliiade mua lenge mu Ifalaíme, mu jinzuangiza muʼaxaxi ka Ifalaime ni Manasa.

⁵ Akua Ngiliiade anga a kuata matabhu oso a kuzaúka ni kuvuua, a Njolodá, mu batuila akua Ifalaime a mesena kulengela ko kuâ. Bhenhobho akua Ifalaime ala kulenga, ela a tula bhu tabhu, uoso uedi: Ngandala ngi zauka; akua Ngiliiade a mu ibhula hanji, exi: U mukua Ifalaime?

⁶ Hé uedi: Kana, a mu ambela dingi exi: Tumbula hanji Xibolete; muene-phe uila: Sibolete, mukonda ene mu tumbula kiki ka tena kubatulula kiambote; bhenhobho-phe a mu kuata, a mu jibhila bhu tabhu dia Njolodá. Thembu ienhoio anga ku buika makuinhi auana a midi ia akua Ifalaime, ni midi jiiadi.

⁷ Jefete anga u fundisa Izalaiele mu mivu isamanu. Jefete mukua Ngiliiade anga a fua, a mu fûnda ku bhata diâ mu sanzala ia tokala ku madiembu ma Ngiliiade.

Ni Ibizani, ni Elone, ni Abidoni, a kala afundixi a Izalaiele

⁸ Kutunda mu izuua ia Jefete, Ibizani mukua Beleme u kala mu fúdisa Izalaiele.

⁹ Muene u kala ni makuinhi atatu a mona, a mala; anga u bhana makuinhi atatu a mona, a ahatu mu kusakana ku mabhata mengi, o ku mabhata mengi u bhenga-ku ue makuinhi atatu a mona, a ahatu phala kusakana ni anʼê a mala. Anga u fundisa Izalaiele mu sambuadi dia mivu.

¹⁰ Ibizani anga u fua, a mu fûnda mu Beleme.

¹¹ Kutunda mu thembu ia muene, Elone mukua muiji ua Nzebulone u kala mu fundisa Izalaiele. Muene anga u fundisa Izalaiele mu kuinhi dia muvu.

¹² Elone mukua muiji ua Nzebulone anga u fua, a mu fûnda mu Haijalone, mʼoxi ia Nzebulone.

¹³ Kutunda mu thembu ia muene, Abidoni monʼa Hilele, mukua bhata bhu Pilatone, u kala mu fundisa Izalaiele.

¹⁴ Muene u kala ni makuinhi auana a mona, a mala; ni makuinhi atatu a mulaula a mala; enhá anga a kala mu sambela makuinhi sambuadi a bulu. Muene anga u fundisa Izalaiele mu nake dia muvu.

¹⁵ Abidoni monʼa Hilele, mukua bhata bhu Pilatone, anga u fua, a mu fûnda bhu Pilatone, mʼoxi ia Ifalaime, ku mulundu ua Amaleke.