Afundixi 11 - O Mikanda Ikola

Jefete u kudila Izalaiele

¹ Kiki-phe Jefete mukua Ngiliiade u kala kindanda, dizonda ku ita, mamʼâ-phe ua mu vuala, muhatu ua kidianzunga, tatʼâ muene Ngiliiade.

² O muhatuʼa Ngiliiade muene anga u mu vualela ue dingi ana mala; anʼa muhatuʼê enhá kia zubha kukula, a kaia Jefete, a mu ambela, exi: Eie ku tena kulundula mu dibhata dia tatʼetu; kuma eie u mona ua muhatu uengi.

³ Jefete bhenhobho u lenga o jiphange jê, u tunga mʼoxi ia Tobe; anga bhu kala iiala ia bhumu a di banda kua Jefete, a kala mu baluka ni muene.

⁴ Kubhanga izuua, anʼa Amone eza mu kúlua ita ni Izalaiele.

⁵ Kia zubha kuiza anʼa Amone kúlua ni Izalaiele, adiakimi a Ngiliiade aia kutakana Jefete mʼoxi ia Tobe.

⁶ Anga ambela Jefete, exi: Izá, u kale u kilolo kietu, phala tu lue ni anʼa Amone.

⁷ Jefete anga u ambela adiakimi a Ngiliiade, uixi: Manhi enu ki mua ngi zembe, enu mua ngi kàia mu dibhata dia tatʼetu? Leluʼidi ki muala bhu kibhidi kiene kiua ki muiza ku ngi sota?

⁸ Adiakimi a Ngiliiade anga ambela Jefete, exi: Kiene muene ki tua ku kanena, phala uize u tu bande, mu kúlua ni anʼa Amone; eie muene u kale u mútue ua akua bhata oso mu Ngiliiade.

⁹ Jefete anga u ambela adiakimi a Ngiliiade, uixi: Se mu ngi bheka dingi ku bhata mu kúlua ni anʼa Amone, Jihova anga u ngi bhana-u ku a tolola, manhi eme ngà kala ku pholo ia ku mi tumina kifua ngi mútue uenu?

¹⁰ Adiakimi-phe a Ngiliiade anga ambela Jefete, exi: Jihova muene u kala mbangi bhuʼaxaxi ketu nʼeie; kuila kidi muene, kioso ki u zuela kiene ki tu bhanga, hé ki kiene, Nzambi a tu bete.

¹¹ Bhenhobho Jefete anga uia ni adiakimi a Ngiliiade, mundu anga a mu bhanga muene mútue uâ, kifua muene sobha iâ; Jefete anga u zuela dingi bhu pholo ia Jihova, bhu Mixipa, o maka mê moso ma tele ni adiakimi.

¹² Jefete anga u tuma jiphunga kua sobha ia anʼa Amone, uixi: Etu tualʼadi ni mvunda iahi, i ku bheka eie mu kúlua nʼeme kiki mʼoxi iami;

¹³ Sobha ia anʼa Amone anga u vutuila jiphunga ja Jefete, uixi: Mukonda Izalaiele a ngi tambula ixi iami, kia tunda mu Ijitu, tundé ku Anone katé ku Jaboke, ki bhene ngó bhua suku, maji aii muene katé ku Njolodá; kiki-phe jixi jiji ngi bhane-ju sé mvunda.

¹⁴ Jefete anga u tuma jiphunga jê lua mukuá dingi kua sobha ia anʼa Amone;

¹⁵ anga u mu ambela, uixi: Kia zuela Jefete kienhiki: Izalaiele ka tambula ixi ia Mouabhe, ka tambula ue ixi ia anʼa Amone.

¹⁶ Kuma kioso-phe Izalaiele kia tundile mu Ijitu, ua bhitile mu kikangalakata bhu Musanza Ukusuka, katé bhu Kadexi.

¹⁷ Bhenhobho Izalaiele anga a katula jiphunga jiia kua sobha ia Edomo, exi: Tua ku diondo, u tuʼehele kubhita mʼoxi ié, sobha ia Edomo-phe ka xikina ku a evua. Kiene kimoxi u tuma kua sobha ia Mouabhe, muene-phe ue ka xikina; Izalaiele anga a xikama bhu Kadexi.

¹⁸ Ku izuua anga a vutukila mu kikangalakata, ixi ia Edomo a i kondoloka, ni ixi ia Mouabhe; o ixi ia Mouabhe anga a i kunga ku mbandu ia thunda, eza a ta kibangu kiâ ku sámbua dia Anone; mbambe-phe ka i bokona ia ixi ia Mouabhe, kuma Mouabhe mbambe iê Anone.

¹⁹ Izalaiele hé a tuma jiphunga kua Sihone, sobha ia Mamodi, u kala ni mbanza iê ia Hexebone; Izalaiele anga a mu ambela, exi; Tua ku diondo, u tuʼehele kubhita, mʼoxi ié, mu kuia bhu kididi kietu.

²⁰ Sihone-phe ka xikina kuʼehela Izalaiele kubhita mu mbambe iê; inda Sihone-phe ua bhongolola mundu uê uoso, u ta kibangu mu Jahaza, u kuata kúlua ni Izalaiele.

²¹ O Jihova phe, Nzambi ia Izalaiele, u bhakula Sihone ni mundu uê uoso bhu lukuaku lua Izalaiele, anga a a nemeka; Izalaiele anga a tambula ixi iii ku Mamodi ió a kexile ene akua ʼxi iâ.

²² Anga a bhingana mʼoxi ioso ia Mamodi katé bhu mbambe iê, tundé ku Anone katé ku Jaboke, tundé mu kikangalakata katé ku Njolodá.

²³ Kala kiki Jihova, Nzambi ia Izalaiele, muene ua tubhula Mamodi bhu pholo ia mundu uê ua Izalaiele, kifua ua tokala kubhingana-mu, eie?

²⁴ Eie ku bhingana ixi ioso i ku bhana nzambi ié Kemoxi ku i bhingana? Oso phe a a tubhula kuala Jihova Nzambi ietu, a a kaie bhu pholo ietu, etu tu a bhingana.

²⁵ Eie manhi ua tundu Balake, monʼa Zipolo, sobha ia Mouabhe? Muene mua mu ivua kuila ua kuatele mvunda ni Izalaiele? Mba ua luile-nâ ita?

²⁶ Tundé bhuoso bhaná, bhua tunga Izalaiele mu Hexebone ni jisanzala jê, ni mu Alouele ni jisanzala jê, ni mabhata moso ku sámbua kunu dia Anone, hâma jitatu kiá ja mivu jitena; tundé kizuuʼokio ixi iii ki mu i tambuila-hi kiá okulu?

²⁷ Eme-phe ki nga te kituxi ko kué, eie muene ua ngi lokalala ku ngi lua ita; Jihova mukua kubatula milonga, a batule lelu bhuʼaxaxi ka anʼa Izalaiele, ni anʼa Amone.

²⁸ Kiene kimoxi, sobha ia anʼa Amone ka xikina kuívua maka ma tumu Jefete ku mu ambela.

O hâsa ia Jefete

²⁹ Nzambi ia Jihova u tula kua Jefete, muene anga u bhita mu Ngiliiade ni mu Manasa, u bhita mu Mixipa ia Ngiliiade, o kutunda bhu Mixipa ia Ngiliiade, u sambuka kua anʼa Amone.

³⁰ Jefete anga u di hambelela kua Jihova, uixi; Se kidi muene u ngi bhakuila anʼa Amone bhu lukualu luami,

³¹ hinu-phe kioso ki tunda mʼonzo iami, mu ku ngi kauidila, kizuua ki ngi bhongoloka ku paze nga tundu ku anʼa Amone, ki kala kia Jihova, ngi mu satela-kiu, ki kale sata ia kuoha mu túbhia.

³² Kienhiki Jefete u sambuka kua anʼa Amone mu kúlua-nâ; Jihova anga ua bhakuila bhu lukuaku luê.

³³ Muene anga u a beta ni kijibha kionéne tundé mu Alouele katé mu kuia bhu Minite, makuinhi aiadi a mabhata, katè bhu Abele-helami, kihaẋi kia dikota. Kala kiki anʼa Amone a toloka bhu pholo ia anʼa Izalaiele.

³⁴ Jefete anga u vutuka bhu Mixipa bhu bhata diê; bhenhobho-ze monʼê ua muhatu u tunda mu ku mu kauidila ni isaka ni kukina; muene-phe muene monʼê ngó umoxi-elèle, ka moneka dingi mona, né ua diiala, mba ua muhatu.

³⁵ Mu kuiza-ku-phe, kia zubha ku mu mona, u tandujula o izuatu iê, uixi: Aiué! monʼami, tata! ua ngi bheka mu kubhondalala, ua di bhange mukua ni ió ene ku ngi tatesa! kuma nga jikula dikanu diami kua Jihova, ki ngi tena-phe dingi kualuluka.

³⁶ Muene-phe u mu ambela, uixi: Tatʼetu, se eie ua jikula dikanu dié kua Jihova, ngi bhange kioso kia tundile mu kanu dié, kabasa Jihova ua ku toluela jinguma jé, anʼa Amone enhó.

³⁷ Muene anga u ambela tatʼâ, uixi: Ngi bhange ngó kiki: Ngʼehele mu mbeji jiiadi, ngiie mu nhunga mu milundu ni ku dila o undenge uami, ni eme ni ilumba ni akuetu.

³⁸ Uixi-phe, Ndeie. Anga u mu ehela mu mbeji jiiadi; muene anga uia ni ilumba ni akuâ, a kala mu dila undenge uê mu milundu.

³⁹ Kia zubha-phe kubhanga mbeji jiiadi, muene u vutuka kua tatʼâ, anga tatʼâ u mu bhanga kioso kia tangele mu ku di hambelela kuê; monʼê-phe uafu kejiia luua diiala. Kienhiki anga ki xalela kífua mua Izalaiele,

⁴⁰ mukonda ana a ahatu mivu ioso aia jinga mu dila monʼa Jefete mukua Ngiliiade. Ku muvu ilumba ioso a mu dila mu izuua iuana.