Afundixi 10 - O Mikanda Ikola

Tola ni Jaile a kala afundixi

¹ Kutunda mu izúua ia Abimeleke, u zangalala mu kudila Izalaiele Tola monʼa Puua, monʼa Dodo, mukua muiji ua Isakale; dibhata diê ua tungile mu Xamidi, ku milundu ia Ifalaime.

² Anga u fúndisa Izalaiele mu makuinhi aiadi a muvu ni itatu, anga u fua, hé a mu funda mu Xamidi.

³ Kutunda kua muene, kua zangalala Jaile mukua Ngiliiade, anga u tundisa Izalaiele mu makuinhi aiadi a mivu ni mivu iiadi.

⁴ U kala ni anʼê a mala, makuinhi atatu a muthu, a kala mu mondala makuinhi atatu a bulu, anga a kala ue ni jisanzala jâ, makuinhʼatatu a sanzala, a jʼixana Jisanzala ja Jaile katé mu kizúua kia lelu, u ji sanga mʼoxi ia Ngiliiade.

⁵ Jaile muene anga u fua, hé a mu fûnda mu Kamone.

Ubhika ua kubhikila anʼa Amone ni akua Fidíxia

⁶ Anʼa Izalaiele anga a tona dingi kubhanga kiaiibha mu mesu a Jihova, a kala mu bhikila Jibaale, ni Jitalote, o iteka, ni jinzambi ja Sídia, ni jinzambi ja Sidone, ni jinzambi ja Mouabhe, ni jinzambi ja anʼa Amone, ni jinzambi ja akua Fidíxia, Jihova anga a mu baluka, a mu xa, ngua-uâ ku mu bheza.

⁷ Njinda ia Jihova anga i uama ku thandu dia Izalaiele, anga u a sumbisa bhu lukuaku lua akua Fidíxia, ni bhu lukuaku lua akua Amone.

⁸ Ene anga a kala mu bhana malebhu ku anʼa Izalaiele ni ku a bhondeleka, a kala mu ku a tatesa ni ku a bhikisa, muvu uenhó. O anʼa Izalaiele ene ku sámbua dia Njolodá, mʼoxi ia Mamodi mu Ngiliiade, a a bhikisa muene mu kuinhi dia muvu ni nake.

⁹ Anʼa Amone anga a zaúka Njolodá, mu kúlua ue Juda, ni Bejamí, ni muiji ua Ifalaime. Izalaiele anga u kala mu tata kiavulu.

¹⁰ Anʼa Izalaiele anga a di kola kua Jihova, exi: Tua te kituxi ko kué, kuma tua ku baluka eie u Nzambi ietu, etu tua bhikila Jibaale.

¹¹ Jihova anga u vutuila anʼa Izalaiele, uexi: Manhi ki eme nga mi kudila ku akua Ijitu, ni ku Mamodi, ni ku anʼa Amone, ni ku akua Fidíxia?

¹² Ni kia mi bhikisa akua Sidone, ni Mamaleke, ni Mamodi, kienhokio enu ki mu di kola kó-kuami anga ngi mi kudila bhu makuʼâ?

¹³ Sumbala kiene, maji eme mua ngi baluka, muala kubhikila nzambi jengi; kala kiki-phe eme uami nguami dingi ku mi kudila.

¹⁴ Ndenu, ka di kodienu ku nzambi jojo ji mua solo, jene ji mi kudile mu thembu ienu ia kubhondalala.

¹⁵ Anʼa Izalaiele-phe anga ambela Jihova, exi: Tua te ituxi; tu bhange kioso ki ua mono kia ku uabhela; maji tua ku diondo, tu kudile ngó kizuua kia lelu.

¹⁶ Anga a tubhula o jinzambi ja jixi jengi muʼaxaxi kâ, a kala mu bhikila Jihova; muene anga u kala ni muẋima ua kuxinganeka o kusebuluka kua Izalaiele anga u kala ni henda iâ.

¹⁷ Thembu ienhoio anʼa Amone a di bhongolola a ta kibangu kiâ mu Ngiliiade. Anʼa Izalaiele anga a di bhongolola uâ, a ta kibangu kiâ mu Mixipa.

¹⁸ Bhenhobho ni mundu ni anʼa jingana mu Ngiliiade, a di ambela mudiâ, exi: Nanhi muene u tu kala ku pholo mu kúlua ni anʼa Amone? Muenhó muene u kala mútue ua akua bhata oso mu Ngiliiade.