Afundixi 1 - O Mikanda Ikola

Anʼa Izalaiele enda dingi ni kutolola jixi jâ mu Kanana

¹ Mu kukala-kukala, Josuué kia zubha kúfua, anʼa Izalaiele ebhula kua Jihova, exi: Nanhi u tu kalela ku pholo mu kubanda ku Makanana, ni kúlua-nâ?

² Jihova-phe, uixi: Juda muene u banda; talesenu, ixi ioso iii nga i bhakula bhu lukuaku luè.

³ Juda anga u ambela phangʼiê Ximinhá, uixi: Ndoko, u bandele kumoxi ni eme mu kibatu kiami kia ngi bhana ku muondona, tu lue ni Makanana; eie ue hinu ngi ku bheke mu kibatu kiê.

⁴ Juda anga u banda; Jihova anga u bhakula Makanana ni Mapelezi bhu lukuaku luâ; anga a beta-ku mu Bezeke, kuinhi dia midi dia muthu.

⁵ Anga a sanga Adoni-bezeke, mu Bezeke, anga a lua-nê, anga a beta Makanana ni Mapelezi.

⁶ Adoni-bezeke anga u lenga; anga a mu kaia, a mu kuata, a mu batula milembu ia ikota ia maku ni ia inama.

⁷ Adoni-bezeke anga u zuela, uixi: Makuinhi sambuadi a sobha a kumbuka milembu ia ikota ia maku ni ia inama, a kexi mu nona jisesekenha mʼoxi a meza ami; kioso ki nga bhangele eme, Nzambi ua ngi futu-kiu. Anga a mu bheka mu Jeluzaleme, hé u fuila momo.

Juda u tolola Jeluzaleme ni Hebolone

⁸ Mbata anʼa Juda a lua ni Jeluzaleme anga a i tambula, a i beta ni mazu a xibhata, mbonge iene a i ta mu túbhia.

⁹ Kia zubha ku ki bhanga, anʼa Juda a kulumuka mu kúlua ni Makanana a tungu mu milundu ni mu sulu, ni mu jixi ku luiji.

¹⁰ Juda anga uia mu kúlua ue ni Makanana a tungu mu Hebolone (Hebolone-phe dijina diê mʼokulu Kidiata-Halaba); anga a beta Sesai, ni Ahimane, ni Talamai.

Otoniiele u tolola Ndebile hé u sakana ni Akaza monʼa Kalebe

¹¹ Ku tunda bhobho uia mu kúlua ni akua Ndebile. (Ndebile-phe dijina diê mʼokulu Kidiata-sefele).

¹² Kalebe anga u zuela, uixi: Uoso u beta Kidiata-sefele nʼa mu tambula, ngi mu bhana monʼami ua muhatu, Akaza, mu kala muhatuʼê.

¹³ Otoniiele monʼa Kenaze, ndenge ia Kalebe, anga u mu tambula; anga u mu bhana Akaza, monʼê ua muhatu, mu kala muhatuʼê.

¹⁴ Kia zubha ku mu bhenga-phe, muene u mu longesa kubhinga díbhia kua tatʼâ; muhatu anga u tuluka ku bulu iê, Kalebe anga u mu ibhula, uixi: Ohi i ua mesena?

¹⁵ Monʼa muhatu anga u mu ambela, uixi: Ngi bhane kizediuise; kuma ua ngi tungisa mʼoxi ia thothuena, ngi bhane ue ni majiia a menha. Kalebe anga u mu bhana ni majiia ma thala ni majiia ma luiji.

O jixi ja mukuá ja tambula anʼa Izalaiele

¹⁶ Anʼa Kene, ukouakime ua Mozé, anga a tunda bhu Mbonge ia Maie, a bandela kumoxi ni anʼa Juda katé mu kikangalakata kia Juda, kiakexila mu sulu ia Halade; anga aia a tunga kumoxi ni akuaʼxi.

¹⁷ Juda anga u ila kumoxi ni phangʼiê Ximinhá, anga a beta Makanana akua Zefate, dibhata dioso a di buidisa. Mbonge ioio anga a ixana dijina diê Hóloma.

¹⁸ Juda anga u tambula dingi Ngaza ni jisanzala jê, ni Axikilone ni jisanzala jê, ni Ekolone ni jisanzala jê.

¹⁹ Jihova anga u kala kumoxi ni Juda, u kaia athu a tungu ku milundu, a tungu ku luiji-phe mu dikôlo ua lémbua ku a kaia, mukonda ala ni makalu a felu.

²⁰ Hebolone anga a i bhana Kalebe, kala kia zuela Mozé; muene anga u kaia-mu ana atatu a Anake.

²¹ Anʼa Bejamí-phe anga a lémbua kukaia o Majebuzi mu Jeluzaleme; Majebuzi-phe ió, a kala mu tungila kumoxi ni anʼa Bajamí mu Jeluzaleme katé mu kizuua kia lelu.

Zuze úlua hé u tambula Betele

²² Dibhata dia Zuze anga di banda mu kúlua ni Betele; Jihova anga u kala-nâ kumoxi.

²³ Dibhata dia Zuze anga a tuma ilolo kulonda mu Betele. (Mbonge ióio-phe mʼokulu dijina diê Luze).

²⁴ Ala mu londa anga a mona muthu iú tunda mu mbonge, anga a mu ambela, exi: Tua ku diondo, tu idikize bhuoso bhu tu bokuena mu mbonge, eie tu ku bhange mbote.

²⁵ Muene anga u a edikiza dibokuenu dia kubhiẋila mu mbonge; mbonge anga a i kuama ni mazu a xibhata; muthu iú-phe a mu eha ni família iê.

²⁶ Muene-phe uia ku ixi ia Mahiti, u tunga-ku mbonge, u i luka dijina dia Luze; diene dijina diê katé mu kizuua kia lelu.

O jixi anʼa Izalaiele ja kambe kukaia jinguma

²⁷ Manasa-phe u kamba kukaia akua Bete-Sane ni jisanzala jê, ni Taanake ni jisanzala jê, ni akua Ndole ni jisanzala jê, ni akua Ibeleiamu ni jisanzala jê, ni akua Mejidu ni jisanzala jê; Makanana-phe ia a jijila hanji kutunga mʼoxi ioso ioio.

²⁸ Ku izuua-izuua-phe, Izalaiele kia sunga dingi nguzu, u bhangesa makanana ku kala abhika a kuenda ni ku futa lubhaku, kuma enʼoso ka a kaie katé kia a zubha.

²⁹ Ifalaime ue u kamba kukaia Makanana a tungu mu Ngezele; o Makanana-phe anga a tungʼâ mu Ngezele ni ene kumoxi.

Ita ia kutambula oxi mu miji iamukuá i di sanha

³⁰ Nzebulone ue u kamba kukaia akua Kitolone, ni akua Nahalole; Makanana-phe anga a tunga-nâ kumoxi, a kala mu ubhika, ua kukalakala, ni kufuta dijimu.

³¹ Asele ue u kamba kukaia akua Haku, ni akua Sidone, ni akua Akalabu, ni akua Akezibe, ni akua Heliba, ni akua Afeka, ni akua Lehobo;

³² akua Asele-phe a kala mu tunga ni Makanana kumoxi, kuma ene akua ʼxi; ka a kaie, kana.

³³ Nafitali ue u kamba kukaia akua Bete-seme, ni akua Bete-Anate; u tunga-phe kumoxi ni Makanana kuma ene akuaʼxi a tungile-mu; maji-phe akua Bete-seme ni akua Bete-Anate a kala mu ubhika ua kukalakala, ni kufuta madijimu ku anʼa Izalaiele.

³⁴ O akua Mamodi anga a bhinjika anʼa Dani kusuka mu milundu; mukonda ka ehela, ni ngó kuiza mu luiji mua tungu ene.

³⁵ Akua Mamodi-phe a jijila ue kutunga mu mulundu ua Helese, ni mu Ajalone, ni mu Salabimu; maji ue kiene kimoxi, lukuaku lua dibhata dia Zuze lua a lende, katé kia kala mu ubhika ua kukalakala, ni kubhana lubhaku lua dijimu.

³⁶ O mbambe ia Mamodi (akua Idumeia) anga i tunda mu phaka ia jimbalanganza mu kubanda bhu Akalabini, anga i bhita bhu ditadi, iia muene ni kubanda ku pholo.