Забур 69 - Китоби Муқаддас 1992 1999

ТАРОНАИ ШАСТУ НӮҲУМ Дуо дар бораи мадад ва халосӣ додан аз душманон.

¹ Барои сардори муғанниён. Таронаи Довуд барои ёдоварӣ.

² Худоё! Маро халосӣ деҳ; Худовандо! Ба мадади ман шитоб кун.

³ Бигзор толибони ҷонам хиҷил ва шарманда шаванд; бадхоҳонам қафо гарданд ва расво шаванд;

⁴ Онҳое ки «ҳай‐ҳай» мегӯянд, ба сабаби шармандагии худ ақиб гарданд;

⁵ Ҳамаи толибони Ту дар Ту шодӣ ва хурсандӣ кунанд, ва дӯстдорони наҷоти Ту доимо гӯянд: «Афзун бод кибриёи Худо!»

⁶ Валекин ман камбағал ва мискин ҳастам. Худоё! Сӯи ман шитоб кун: мададгор ва раҳокунандаи ман Ту ҳастӣ; Худовандо! Таъхир накун.