Забур 149 - Китоби Муқаддас 1992 1999

ТАРОНАИ САДУ ЧИЛУ НӮҲУМ Ҳамаи порсоён Худовандро ҷалол медиҳанд.

¹ Ҳалелуёҳ. Дар шаъни Худованд суруди наве бихонед; ва ҳамду санои Ӯро дар шӯрои порсоён.

² Бигзор Исроил дар Офаридагори худ шодӣ кунад; фарзандони Сион дар Подшоҳи худ хурсандӣ кунанд;

³ Исми Ӯро дар рақс мадҳ намоянд; бо даф ва барбат Ӯро бисароянд,

⁴ Зеро ки Худованд ба қавми Худ таваҷҷӯҳ мекунад, ҳалимонро бо наҷот шукӯҳ мебахшад.

⁵ Бигзор порсоён дар ҷалол хушнӯд шаванд, бар бистарҳошон тараннум кунанд;

⁶ Мадҳияҳои Худо дар даҳонашон бошад, ва шамшери дудама дар дасташон,

⁷ То ки аз халқҳо интиқом гиранд, қабилаҳоро мазаммат намоянд:

⁸ Подшоҳони онҳоро бо занҷирҳо бандӣ кунанд, ва калоншавандаҳои онҳоро бо завлонаҳои оҳанин;

⁹ Бар онҳо довариро, ки навишта шудааст, ба амал оваранд; ин барои ҳамаи порсоёни Ӯ шавкат хоҳад буд. Ҳалелуёҳ!