Забур 148 - Китоби Муқаддас 1992 1999

ТАРОНАИ САДУ ЧИЛУ ҲАШТУМ Тамоми ҷаҳон Худовандро ҷалол медиҳад.

¹ Ҳалелуёҳ. Худовандро аз осмонҳо мадҳ кунед; Ӯро дар афрозҳо мадҳ кунед.

² Ӯро мадҳ кунед, эй ҳамаи фариштагони Ӯ; Ӯро мадҳ кунед, эй ҳамаи лашкарҳои Ӯ.

³ Ӯро мадҳ кунед, эй офтоб ва моҳ; Ӯро мадҳ кунед, эй ҳамаи ситорагони нур.

⁴ Ӯро мадҳ кунед, эй фалакулафлок, ва эй обҳои фавқи осмонҳо.

⁵ Исми Худовандро мадҳ мекунанд, зеро ки Ӯ амр фармудааст, ва онҳо офарида шудаанд.

⁶ Ва онҳоро қоим доштааст то абад; ва қонуне муқаррар намудааст, ва аз он нахоҳанд даргузашт.

⁷ Худовандро аз замин мадҳ кунед, эй наҳангон ва ҳамаи вартаҳо;

⁸ Эй оташ ва жола, эй барф ва дуд, эй боди тунд, ки каломи Ӯро ба ҷо меоварӣ;

⁹ Эй кӯҳҳо ва ҳамаи талҳо, эй дарахтони мевадор ва ҳамаи арзҳо;

¹⁰ Эй ҳайвонҳо ва ҳамаи чорпоён, эй хазандагон ва мурғони болдор;

¹¹ Эй подшоҳони замин ва ҳамаи қабилаҳо, эй мирон ва ҳамаи доварони замин;

¹² Эй ҷавонон ва бокираҳо низ, эй пирон ва наврасон.

¹³ Исми Худовандро мадҳ мекунанд, зеро ки танҳо исми Ӯ олишаън аст, шукӯҳи Ӯ бар замин ва осмон аст.

¹⁴ Ва Ӯ шохи қавми Худро баланд бардоштааст, то ки ҳамду саное шавад дар шаъни ҳамаи порсоёни Ӯ, дар шаъни банӣ‐Исроил, ки қавми муқарраби Ӯ ҳастанд. Ҳалелуёҳ.