Забур 106 - Китоби Муқаддас 1992 1999

ТАРОНАИ САДУ ШАШУМ Ҳамд дар шаъни Худованд барои наҷот додани гуноҳкороне ки тавба кардаанд.

¹ Худовандро ҳамд гӯед, зеро ки некӯст; зеро ки эҳсони Ӯ то абад аст.

² Растагорони Худованд бигӯянд, ки онҳоро Ӯ аз дасти аду раҳо кардааст;

³ Ва онҳоро аз мамлакатҳо ҷамъ овардааст: аз шарқ ва ғарб, аз шимол ва ҷануб.

⁴ Дар биёбон, дар роҳи бероҳа овора буданд; шаҳри маскуне намеёфтанд.

⁵ Гурусна ва ташна монданд, ҷонашон андарунашон аз ҳол рафт.

⁶ Вале дар тангии худ сӯи Худованд фарьёд кашиданд; онҳоро аз мусибатҳошон раҳо кард.

⁷ Ва онҳоро ба роҳи рост андохт, то ки ба шаҳри маскун равона шаванд.

⁸ Бигзор Худовандро барои эҳсони Ӯ ҳамд гӯянд, ва барои корҳои аҷоиби Ӯ аз баҳри банӣ‐одам!

⁹ Зеро ки ҷони иштиёқмандро сер кардааст, ва ҷони гуруснаро аз нозу неъмат пур кардааст.

¹⁰ Дар торикӣ ва зулмот менишастанд; бандиёни мусибат ва оҳан буданд.

¹¹ Зеро ки ба суханони Худо беитоатӣ карданд, ва раъи Ҳаққи Таолоро хор диданд.

¹² Ва дили онҳоро бо меҳнат фурӯ нишонд; бемаҷол шуданд, ва мададгоре набуд.

¹³ Вале дар тангии худ сӯи Худованд фиғон карданд; онҳоро аз мусибатҳошон наҷот дод.

¹⁴ Онҳоро аз торикӣ ва зулмот берун овард, ва бандҳошонро барканд.

¹⁵ Бигзор Худовандро барои эҳсони Ӯ ҳамд гӯянд, ва барои корҳои аҷоиби Ӯ аз баҳри банӣ‐одам!

¹⁶ Зеро ки дарҳои мисинро шикастааст, ва ғалақаҳои оҳанинро пора кардааст.

¹⁷ Беақлон аз боиси роҳи ҷинояткоронаи худ ва аз боиси гуноҳҳои худ азият мекашиданд.

¹⁸ Ҷони онҳо аз ҳар хӯрок нафрат дошт, ва ба дарвозаи мамот расида буданд.

¹⁹ Вале дар тангии худ сӯи Худованд фиғон карданд; онҳоро аз мусибатҳошон наҷот дод.

²⁰ Каломи Худро фиристод, ва онҳоро шифо бахшид, ва онҳоро аз гӯрҳошон халос кард.

²¹ Бигзор Худовандро барои эҳсони Ӯ ҳамд гӯянд, ва барои корҳои аҷоиби Ӯ аз баҳри банӣ‐одам!

²² Ва қурбониҳои шукрона забҳ кунанд, ва аъмоли Ӯро бо тараннум васф намоянд!

²³ Касоне ки бо киштиҳо баҳр мепаймоянд ва дар обҳои бисьёр кор мекунанд,

²⁴ Онҳо аъмоли Худовандро диданд, ва корҳои аҷоиби Ӯро дар қаърҳо:

²⁵ Амр фармуд, ва боди тунде бархезонд, ва мавҷҳои онро бардошт.

²⁶ Ба осмонҳо мебароварданд, ба вартаҳо мефуроварданд; ҷонашон дар мусибат ба ларза афтод.

²⁷ Мисли мастон чарх мезаданд ва мекалавиданд, ва тамоми ҳикматашон саргум шуд.

²⁸ Вале дар тангии худ сӯи Худованд фарьёд кашиданд; ва онҳоро аз мусибатҳошон берун овард.

²⁹ Тундбодро ба хомӯшӣ мубаддал кард, ва мавҷҳои онҳо сокит шуд.

³⁰ Ва шод шуданд, ки хомӯш гардид; ва онҳоро ба мавзеи дилхоҳашон бурда расонд.

³¹ Бигзор Худовандро барои эҳсони Ӯ ҳамд гӯянд, ва барои корҳои аҷоиби Ӯ аз баҳри банӣ‐одам!

³² Ва Ӯро дар ҷамъомади қавм болобардор кунанд, ва дар маҷлиси пирон Ӯро мадҳ намоянд!

³³ Дарьёҳоро ба биёбон табдил медиҳад, ва чашмаҳои обро ба ташназамин,

³⁴ Замини ҳосилхезро ба шӯрзамин, аз боиси бадии сокинони он.

³⁵ Биёбонро ба кӯли об табдил медиҳад, ва замини хушкидаро ба чашмаҳои об.

³⁶ Ва гуруснагонро дар он ҷо ҷойгир мекунад, ва шаҳри маскун месозанд;

³⁷ Ва саҳроҳоро кишт мекунанд, ва токзорҳо мешинонанд, ва онҳо ҳосили фаровон меоваранд.

³⁸ Ва онҳоро баракат медиҳад, ва онҳо бағоят борвар мешаванд; ва чорпои онҳоро кам намекунад.

³⁹ Вале камшумор мешаванд ва аз фишори бадӣ ва ғаму ғусса ба залолат меафтанд.

⁴⁰ Забуниро бар мирон мерезад, ва онҳоро дар бодияи бероҳа сарсону саргардон мекунад.

⁴¹ Валекин мискинро аз залолат боло мебардорад; ва хонаводаҳоро мисли рамаи гӯсфандон сершумор мегардонад.

⁴² Росткорон инро дида, шод мешаванд; ва ҳамаи ноинсофон даҳони худро мебанданд.

⁴³ Касе ки соҳиби ҳикмат аст, ба ин чизҳо диққат медиҳад; ва эҳсонҳои Худовандро хоҳанд фаҳмид.