Tite 3 - Testament ke Siki 1960 (Kabba Laka)

¹ Olè mèdè ta ko tar lo mbaidjé ke ndjè ko béhdjé, ta ko tar lodè, ta ngem ta da koula ke madji toï.

² Ta pa tar ke madjang dò doou té kada ang, ta mbeté kòlna, ta kisi dèkèkè, ke ta da mè madji ke dooudjé toï.

³ Mbata djèdjè ndja nto mbedjé leo, djèdjè djo tar ang, djèdjè djao go tar kere té, beredjé ke boo ke da rò dang dang ke tar ndam dang dang, ke ndò lodjè toï mèdjè dousou ke madjang ke mè, dooudjé mbetédjè ke djèdjè mbeté maredjé.

⁴ A tokou mè madji lo Allah ndjè kadjidjè ke ndiki ke madji la téh daka mbä,

⁵ Nè nadjidjè mbä, a to mbata koula ke gaté gaté ke djèdjè nda ang, to mbata mè madji la ndja, deo tar toko té ke koudjoudjè ke siki, ke dadjè to ke siki deo Ndil té ke madji toï.

⁶ Nè ke nè nongou dòdjè té nya, deo té lo Jésus Christ ndjè kadjidjè.

⁷ Baa ta karedjè ndé gaté gaté deo tokou mè madji té la, ke ta dé ndjè kwaa né ndouba ke mè ngebe lo tébe ke ke ndò ke ndò.

⁸ To tar ke tokoro. Mam ndiki i ta pa tar nèn ngeng, baa ta kare dèdè ke do mèdè té ke Allah da ngem madji ta da koula ke madji. Mbata yèn to madji ke da madji mbata dooudjé.

⁹ A mbeté doudjou tar dabe mbe, gel tar ke leo, mainatar, kòlna mbata tar ndedji, mbata dèdè nda madji ang, ke nto né ke ba.

¹⁰ A mbata doou ke da ta kare tar kaina ï gè té i ndedjè gar kada aséh gar djo, mbetè, eda sa mare né ang.

¹¹ I geré doou ke tokou ban ao kere té dang dang, ke nè nto ndjè né da ke madjang, nè ndja ngange saria dè té.

¹² Tokou ma moula Artémas aséh Tychique ròi té, eda madji ta dé rom té Nicopolis té ndjange, mbata ma medji ta kisi nou nai koul té.

¹³ Eda madji ta koula Zénas ndjè gange saria ke Apollos deo té lodè ndjange ndjange, wo madji ta kare mare né doudè ang.

¹⁴ Ase kare dooudjé lodjè da ta geré ta da koula ke madji, tokou ban dase kouma dèdè ke né doudè nya, ke ta kan kandé.

¹⁵ Dèdè toï ke déh sem ndai laphia. Eda laphia dèdè ke ndikidjè ke ko mè té. Tòkou mè madji éh kesè toï.