Tite 2 - Testament ke Siki 1960 (Kabba Laka)

¹ A mbata loi, etòdjou tar ke to ase tar ke gaté gaté.

² Epa are bouka dingaodjé ta to boo ke da ròdè té, ta kisi dèkèkè ke kedji ke madji, ke ko mè té ke gaté gaté, ke ndiki, ke mè ke enge ang.

³ Epa are bouka dènèdjé tokou ban to ta kisi madji, ta toula do dooudjé ang, aséh beredjé lo koto ang. To tar lodè ta tòdjou tar ke to madji.

⁴ Bana ta tòdjou ngamandédjé ta ndiki ngaodèdè ke ngandè.

⁵ Ta kisi ke kedji ke madji, ta da kaiya ang, ta da koula kei lodè, ta da mè madji, ke ta ko tar lo ngaodèdè, baa ta kare tar lo Allah dé to né tadji ang.

⁶ Tokou ban to, ndedji basädjé ta to boo ke da ròdè té.

⁷ Etòdjou tar loi ndja ke né toï tokou né tòdjou koula ke madji, deo tòdjou tar loi etòdjou tar ke gaté gaté, ke tar kisi dèkèkè.

⁸ Ke tar ke gaté gaté ke dase gange saria dè té ang, baa ta kare ròkoul doou ke ndjè mbeténa, ke ta kare nè néh ke tar ke madjang ta pa dòdjè té ang.

⁹ Epa are beredjé ta ko tar lo ebèèdèdè, ke ta karedè koukou ke né toï, to tar lodè ta maitar ang.

¹⁰ Aséh ta boukou ang, a ta da ke mè ndaa kaï ke tokoro toï, baa ta kare dèdè dòsou gadji tar lo Allah, ndjè kadjidjè ke né toï.

¹¹ Mbata tokou mè madji lo Allah téh daka ta kadji dooudjé toï.

¹² Ke ntodjoudjè ta mbeté né ke mbeté Allah ke boo ke nange nèn, ke ta kisi dèkèkè, ta da gaté gaté ke ta ngem tar lo Allah ke nange nèn.

¹³ Ta ngebe tar mè ngebe ke madji lodjè, téh lo ndokoo té lo Allah ke boui, ke ndjè kadjidjè Jésus Christ.

¹⁴ Nè ke nare rè ndja mbata lodjè ta kadjidjè ke né té ke madjang toï, ke ta toko mbata la ndja mare dooudjé ke boo dadè mbata koula ke madji.

¹⁵ Epa tar nèn toï, ndedji, ndange ke singa toï. Are doou kada mbeti ang.